Şirvan Apelyasiya Məhkəməsi ilk instansiyanın yol verdiyi qanun pozuntularını aşkar edib, işi geri qaytardı;
vəkil Osman Kazımov: "Lənkəran məhkəməsinin hakimi Elçin Kazımov haqda qərar çıxarılmalı idi”
Martın 4-də Şirvan Şəhər Apelyasiya Məhkəməsində Müsavat başqanının müşaviri Yadigar Sadıqovun şikayətinə baxıldı. Hakim İsmayıl Əhmədovun sədrliyi ilə keçirilən prosesdə apelyasiya şikayətinə ilkin baxış idi.
Məhkəmə prosesinə Y.Sadıqovun özü gətirilməmişdi. Prosesə Müsavat başqanı İsa Qəmbər, müavini Gülağa Aslanlı, AXP sədri Pənah Hüseyn, Müsavatın Divan üzvü Tural Abbaslı, gənclər üzrə müşavirlər Əhəd Məmmədli, Rüfət Hacıbəyli, vəkil Osman Kazımov, partiyanın Sabirabad təşkilatının sədri Azər İsmayıl qatılmışdı.
Y.Sadıqovun vəkili Xalid Bağırov qeyd etdi ki, məhbus məhkəmə iclas protokoluna qeydlər verib. Lakin həmin qeydlərə Lənkəran rayon məhkəməsi baxmayıb. Ona görə də Şirvan Apelyasiya Məhkəməsi həmin qeydlərə baxılması üçün işin hərəkətsiz saxlanması haqda qərar çıxardı, iş Lənkəran rayon məhkəməsinə qaytarıldı.
Vəkil Y.Sadıqova işlə tanış olmaq üçün məhkəmə protokolunun surətinin verilməsi barədə vəsatət qaldırdı. Hakim protokolun veriləcəyini dedi.
Vəkil Osman Kazımov "Yeni Müsavat”a bildirdi ki, ciddi pozuntuya yol vermiş Lənkəran rayon məhkəməsinin hakimi Elçin Kazımov haqda qərar verilməli idi: "Bu, aşkar pozuntudur. Məhkəmənin etməli olduğu işi icra etməyib. Yadigar Sadıqova məhkəmə protokolu ilə tanış olmağa şərait yaradılmayıb. Gələcəkdə prosesə hazırlaşmaq üçün yaxşı şərait yaradılmayıb. Beləliklə, işə baxan Lənkəran məhkəməsinin hakimi sübuta yetirilməmiş cinayətlə bağlı hökm çıxarıb, amma özü iki qanun pozuntusuna yol verib”.
O.Kazımov qeyd etdi ki, tək işdə qanun pozuntusu qeydə alınmayıb: "Lap elə cinayət törədib. İlk dəfə məhkum olunan şəxsə kimisə telefonu ilə vurmasına görə niyə ağır cəza verilib? Deməli sifarişdir. Məhkəmə ona belə ağır cəza verə bilməzdi. Ona görə də həm məhkəmə işində qanun pozuntuları var, həm də sifariş icra olunub, Yadigar bəyi şərləyib həbsə atıblar. Şirvan apelyasiya məhkəməsi qanun pozuntusuna yol verən hakim qərar çıxarmalıydı”.
Qeyd edək ki, 10 gün ərzində bu qanun pozuntusuna Lənkəran rayon məhkəməsi baxıb, qiymət verməlidir. Daha sonra məhbusun iştirakı ilə apelyasiya şikayətinə baxılacaq. Y.Sadıqov Qarabağ əlili kimi təqdim edilən, narkoman olduğu üzə çıxarılan Rəşid Kərimov adlı Lənkəran sakinini döyməkdə ittiham olunur. Müsavatçı məhbus barəsində 6 il həbs cəzası çıxarılıb.
Müsavat başqanı Yadigar Sadıqovun məhkəmə prosesi ilə bağlı özünün Facebook-dakı səhifəsində belə yazıb: "Yenə məhkəmədəyik. Bu dəfə Şirvan apellyasiya məhkəməsində. Dostumuz Yadigar Sadıqovun məhkəməsində. Hakimlərin, prokurorların yalanlarından yorulduq. Mənim ümumən yalana allergiyam var. Amma dostlarımızla bir yerdəyik. Yadigar bəyi gətirməmişdilər. Məsələ 1-2 həftə uzanır”.
E.SALAMOĞLU
Şirvan
