Главная » 2012»Июнь»18 » Vəhhabilər Azərbaycanı İrana qarşı birləşməyə çağırdı
01:09
Vəhhabilər Azərbaycanı İrana qarşı birləşməyə çağırdı
Xarici işlər nazirinin müavini şahzadə Xalid bin Səud bin Xalid: "Biz İranın qonşu ölkələrin işlərinə müdaxiləsinin qarşısını almaq üçün uğurlu əməkdaşlıq edə bilərik”
ABŞ-ın Yaxın Şərqdəki əsas müttəfiqi olan Səudiyyə Ərəbistanı Azərbaycana İrana qarşı əməkdaşlıq təklif edib. Səudiyyə Ərəbistanı xarici işlər nazirinin müavini şahzadə Xalid bin Səud bin Xalid "Trend”ə müsahibəsində bildirib ki, region ölkələri İranın qonşu ölkələrin işinə müdaxilə etməsinin qarşısını almaq üçün öz səylərini birləşdirməlidirlər".
"Azərbaycan regionun digər ölkələri kimi, İranın onun daxili işlərinə müdaxilə etməsindən əziyyət çəkib. Bu müdaxilənin qarşısının alınması üçün region ölkələri birgə fəaliyyət göstərməlidirlər” deyə, bin Səud bildirib. Onun fikrincə, İran bütün ölkələrin ona heç bir aidiyyəti olmayan daxili işlərinə qarışır. Şahzadə qeyd edib ki, İran bilməlidir ki, başqa ölkələrin daxili işlərinə müdaxilə etməsi beynəlxalq arenada ona qarşı müsbət rəy yaratmayacaq və onun maraqlarına xidmət etməyəcək, əksinə, ölkəyə və onun xarici siyasətinə xələl gətirəcək. "Əgər İran qonşu ölkələrlə mehriban qonşuluq münasibətləri qurmaq istəyirsə, başqa ölkələrin işinə müdaxilə siyasətindən imtina etməlidir. İran Bəhreynin işlərinə qarışır, BƏƏ-nin üç adasına iddia edir, Səudiyyə Ərəbistanının və Küveytin daxili işlərinə müdaxilə edir. Tehran, habelə İraqda və Suriyada daxili münaqişələri qızışdırır” deyə, o hesab edir. Bin Səud qeyd edib ki, Səudiyyə Ərəbistanı və Azərbaycan İranın region ölkələrinin işlərinə müdaxilə etməməsi üçün uğurlu əməkdaşlıq edə bilərlər.
İlk dəfədir Səudiyyə Ərəbistanı Azərbaycana İranın təhdidlərinə qarşı bu cür açıq şəkildə kömək təklif edir və Bakını Tehrana qarşı onunla birləşməyə çağırır. Səudiyyə Ərəbistanı ilə Azərbaycanın İranın qonşu ölkələrin işlərinə qarışmaması üçün birgə əməkdaşlığının nədən ibarət olacağı aydın deyil. Lakin mühüm olanı Səudiyyənin Azərbaycanı onunla birlikdə anti-İran cəbhəsində yer almağa çağırmasıdır. Bəlli olduğu kimi, Səudiyyə Ərəbistanı ilə İran arasında ciddi münaqişə var, Ər-Riyad Tehranın körfəz ölkələrində şiəliyi yaymaq və İslam inqilabı "ixrac etmək” siyasətini öz maraqlarına təhlükə hesab edir. Təsadüfi deyil ki, ABŞ və ya İsrailin İrana qarşı mümkün hərbi əməliyyatlar planlarında Səudiyyənin rolu həmişə öndə olub. Belə ki, Səudiyyə kralının İsrail və Amerika aviasiyasına İrana qarşı öz hava məkanını açmağa hazır olduğu barədə xəbərlər var. ABŞ İrana qarşı müntəzəm olaraq Səudiyyə Ərəbistanı və körfəzdəki digər müttəfiqlərini silahlandırır. Səudiyyə Ərəbistanının İrana qarşı cəbhədə yer aldığına heç kimin tərəddüdləri yoxdur. Bu baxımdan şübhə yoxdur ki, Ər-Riyaddan Bakıya edilən təklif İranın Azərbaycana qarşı qəzəbini daha da artıracaq. Digər tərəfdən, mümkündür ki, Ər-Riyadın bu təklifinin arxasında əslində Amerika dayanır. Amerika özü İranın təzyiqlərinə qarşı hələ Azərbaycanı açıq müdafiə etməsə də körfəzdəki müttəfiqlərinin əliylə bunu edə bilər.
Xatırladaq ki, ABŞ-ın Azərbaycandakı yeni səfiri vəzifəsinə namizəd Riçard Morninqstar da Senatdakı dinləmələrdə Bakının İranın təhdidlərindən müdafiə olunmasının vacibliyindən danışıb. O deyib ki, vəziyyət günü-gündən mürəkkəbləşir. Belə görünür ki, Azərbaycan İranla münasibətlərin kəskinləşməsindən istifadə edərək ABŞ-ın və onun regiondakı müttəfiqlərinin diqqətini özünə çəkə bilib.
