Dünən Nərimanov rayon məhkəməsinin məhkəmə icraçıları Xural qəzetinin əmlakını siyahıya alıb və iş günü başa çatdıqdan sonra saat 19-da qəzetin əmlakını müsadirə edərək aparıblar.
Xural qəzetinin baş redaktoru Əvəz Zeynallı Turana bildirib ki, məhkəmə icraçıları redaksiyada olan 9 dəst kompüteri, skanerləri, printerləri, telefon aparatlarını, diktofonları, hətta flaş kartları belə müsadirə ediblər. "Məhkəmə icraçılarının hərəkətləri qanunsuzdur. Biz məhkəməyə müraciət edəcəyik. Çünki apardıqları avadanlıqların heç biri redaksiyanın mülkiyyəti deyil”, - deyə o qeyd edib.
Baş redaktor təzyiqlərə baxmayaraq, qəzetin çapının dayandırılmayacağını bildirib. "Biz müsadirədən sonra oxucuların, dostlarımızın notbuklarının köməyi ilə qəzetin çapını həyata keçirdik. Bundan sonra da Xural qəzeti gündəlik çapını davam etdirəcək”, - deyə Əvəz Zeynallı vurğulayıb.
Xatırladaq ki, son illər məhkəmələr Xural qəzetinə qarşı 30-dək iddiaya baxıb. Qəzetə qarşı 19 min manat cərimə icraya yönəlib. Son olaraq qəzeti Prezident Administrasiyasının rəhbəri Ramiz Mehdiyev məhkəməyə verib. Bu ilin sentyabrında Nərimanov məhkəməsi qəzeti Ramiz Mehdiyevin iddiası ilə 10 min manat, Prezident yanında Mətbuata Dövlət Dəstəyi Fondunun sədri Vüqar Səfərlinin iddiası üzrə isə 5 min manat cərimə edib.
"Xural” qəzetinin əmlakı siyahıya alınır
Nərimanov rayonunun məhkəmə icraçıları çərşənbə axşamı Azərbaycan Prezident Administrasiyasının rəhbəri Ramiz Mehdiyev və Prezident yanında KİV-ə dəstək Fondunun sədri Vüqar Səfərli ilə məhkəmə çəkişməsi davam edən "Xural” qəzetinin əmlakını yenidən siyahıya almağa başlayıblar.
Yarım il əvvəl məhkəmə icraçıları artıq əmlakı siyahıya almışdılar və təkrar prosedur həftəlik "Xural” qəzetinin sentyabrın 19-dan etibarən hər gün çıxmağa başlaması ilə əsaslandırılır. "Məhkəmə qərarlarının icrası İdarəsi hesab edir ki, günlük formata keçməklə qəzet əlavə texnika əldə edib”, deyə qəzetin redaktoru Əvəz Zeynallı bugünki mətbuat konfransında bildirib.
Səhər saatlarından qəzetin ofisi Ədliyyə Nazirliyinin nümayəndələri və mülki geyimli naməlum şəxslər tərəfindən mühasirəyə alınıb, sanki hansısa cinayətkar axtarılır. Qəzet əməkdaşları deyiblər ki, bu əməliyyatın iştirakçılarına müntəzəm olaraq zəng edir və redaksiyada olan hər şeyi diqqətlə qeyd etməyi tələb edirdilər. Eyni zamanda bütün məkan və əmlak videoya çəkilirdi. "Hətta binada "Xural”ın redaksiyasına aidiyyatı olmayan otağı icarə edən yeni müstəqil liberal.az saytının üç kompüteri də siyahıya salınıb”.
Ramiz Mehdiyev və Vüqar Səfərli "Xural”a qarşı şərəf və ləyaqətin təhqir edilməsi ittihamı ilə mülki iddialar qaldırıblar və 10 min və 5 min manat pul kompensasiyası tələb edirlər. Redaksiya bütün instansiya məhkəmələri uduzub, lakin bununla razılaşmayaraq, qarşılıqlı iddia qaldırıb. "Bu halda məhkəmə icraçılarının əmlakı siyahıya almaq hüququ yox idi”, deyə Zeynallı qeyd edib.
Bütün səviyyəli məmurların ünvanına kəskin tənqidlərlə fərqlənən "Xural” qəzeti daim məhkəmə təzyiqləri ilə üzləşir. Qəzet artıq 30 məhkəmə prosesi keçib. Sentyabrda yerli mollaları tənqid edən və Azərbaycanın cənub bölgəsində narkomaniyanın tüğyan etdiyi barədə yazan qəzetin Lənkərandakı müxbiri Aydın Canıyev xuliqanlığa görə həbs edilib.
Redaktor özü hesab edir ki, əmlakın hazırki siyahıya alınması qəzetin prezident İlham Əliyevin "Əl-Cəzirə” telekanalına müsahibəsi ilə bağlı kəskin şərhinə reaksiyadır.
Azərbaycanda müxalifət qəzetlərinə qarşı məhkəmə təqibləri çoxdan normaya çevrilib. Hakimiyyəti və yüksək vəzifəli məmurların sui-istifadəsini kəskin tənqid edən "Yeni Müsavat”, "Azadlıq” qəzetlərinə qarşı məhkəmə prosesləri olub. Bu, KİV-ə təzyiq üçün ən mühüm alətlərdən biridir və buna görə hakimiyyət diffamasiya haqqında qanun qəbul etməkdən imtina edir.
"Xural”ın əmlakının siyahıya alınması səhər saatlarından başlayıb və günorta saat 15.00 radələrində başa çatıb. Amma bu təzyiqlərə baxmayaraq, Zeynallı bildirib ki, qəzetin kiçik kollektivi ştat rejimində işləməyə davam edir.
Redaktorlar Şurası baş verənlərlə bağlı narahatlığını bildirib və bunu hökumətin Azərbaycanda azad mətbuata təzyiqi üzrə növbəti addım adlandırıb. KİV rəhbərləri hakimiyyəti "Xural” qəzetinin və digər KİV-lərin təqibinə son qoymağa və Azərbaycan mətbuatının iqtisadi və yaradıcılıq böhranından çıxarılmasının yolları haqqında dialoqa başlamağa çağırıb.
