 Yaxud, "QAZEL" maşını ilə yolu kəsib alma satan, nədən kameramı alıb sındırmaq istədi?
Kütləvi İnformasiya Vasitələrinin, internet sosial şəbəkələrində uzun illərin aktual mövzularından olan Masallının "Köhnə bazar”ın mətbəxində "bişirilən bozbaş” siyasətinin aşbazları İH-də işləyən yerli kadrların olması heç kimə sirr deyil.
Bu bazarda baş alıb gedən özbaşınalıqlar, antisanitariya vəziyyəti, bəzi satıcıların hədsiz qudurğanlığı, maşın və piyada yolunu dükan sahibləri tərəfindən inhisara alınmasını hamı görür, heç kim səsini çıxartmır.
Ötən illər bu bazardakı dükanların sabiq İHB-sı Q.Ağayevin göstərişi ilə üç dəfə sökülüb, təkrarən həmin dükan sahiblərinə baha qiymətə satması barədə mütəmadi olaraq, silsilə məqalələr yazmışdım.
Həmin "söküntü-tikinti və satıldı” əməliyyatı vaxtı, doğrusu o dükan sahiblərinə eləcə də küçədə alver edənlərə lap yazığım gəlirdi.
"Masallıda müharibə gedir ?” başlıqlı yazını yazanda bir nurani ağsaqqal mənə yaxınlaşıb dedi ki, ay oğul, çox aktual mövzuya toxunmusan, oxudum xoşum gəldi, cəsarətlə yazmısan. Unutma ki, "xalq üçün ağlayan göz kor olar”!
 Doğrusu həmin vaxt o ağsaqqal kişidən heç xoşum gəlmədi. Yalnız bunu dedim ki, gözəl peyqəmbərimiz buyurub ki, "Haqqı bilə-bilə batil etməyin”, "Zülmə baş əyən, zülümkara bərabərdir”!...
Ağsaqqal isə başını bulayıb, Allah köməyin olsun deyib, məndən uzaqlaşdı.
Nə başınızı ağrıdım, bazardakı dükanlar 15 metr maşın yoluna çıxarılaraq piyada yolu da daraldı. İndi maşınla bazara girmək mümkün deyil. Bu da azmış kimi, dükan sahibləri satdıqları malları piyada və maşın yoluna səpələyiblər. Bu anormallığa bir kimsənin etiraz etməsi görünmür.
Bunu da qeyd edim ki, rayon İHB-sı Rafil Hüseynov rayona gələn kimi, onu başa saldılar ki, rayonun siyasəti bu "Köhnə bazarda” həll olunur. Gözünə döndüyüm Rafil müəllim də bazara giriş yollarını polis vasitəsi ilə bağlatdırdı. Dükan sahibləri alış-verişin olmadığını görüb, yuxarıların "dolyasını” toplayıb, çatdırandan sonra başladılar alıcılarla qarşı "başkəsmə” əməliyyatını həyata keçirməyə. Dükanlarda vaxtı keçmiş ərzaq məhsullarını çəkinmədən satmaları, qəssabların isə mənşəyi bəlli olmayan ətin antisanitariya vəziyyətində satmasna kimsənin nəzarəti də görünmür. Bu bazara məsul olan rəsmilərə yaxınlaşıb nəsə soruşmaq da mümkün deyil. Bu "qoçu” dükançılar elə bir həşir qopardırlar ki, qanunsuz hərəkətlərinə mat qalırsan.
 01.02. 2013-cü il tarixdə yolumu bazara saldım. Gördüyüm vəziyyətin çəkilişinə başlamışdım ki, mənə hücumlar başladı. Çəkiliş edəndən sonra özümü maşına çatdırıb, aradan çıxmaq istəyəndə tanımadığım bir şəxs, təhqiredici ifadələrlə mənə hücum etdikdə maşını saxlayıb, kimliyini soruşsam da özünü təqdim etmədi. Aydın oldu ki, həmin şəxs yolun ortasında "QAZEL –də” alma dolu yük maşınını saxlayıb, alver edəndir. Bu almasatan bildirdi ki, camaatın razılığı olmadan niyə çəkiliş aparırsan, kim sənə ixtiyar verib?...
Əlbəttə ki, özümü təqdim edib, vəsiqəmi gösərtsəm də qane olmadı, təkid etdi ki, şəkilləri silim. Alverçilər də üstümə gəlib, kameramı alıb, sındırmağa cəhd etsələr də mənim də onlara deməyə sözüm oldu.
 Xatırlatdım ki, siz alverçilərin çətin anında hüquqlarınızı məndən başqa bir kimisə dilə gətirib ictimailəşdirdimi?
Bu gün də nə edirəmsə, sizin xeyrinizədir ki, ziyanınıza deyil. Həmin özünü dəliliyə vuran almasatan isə sanki hakimiyyətin ona etdiyi zülmün qisasını məndən almağa çox çalışsa da insident kəskin xarakter almadı.
Amma heç bir işi qanun çərçivəsinə sığmayan bu köntov insan bağıra-bağıra qalsa da, mən ona əhəmiyyət vermədən bazardan çıxdım.
P.S. Fikirləşdim ki, məni təhqir edən həmin alverçinin hərəkətləri barədə polisə müraciət edim. Çox çək-çevir etdim, ona yazığım gəldi. Çünki polisə şikayət etsəydim, polis onun dərisini necə soyduğunu yəqin ki, Siz də anlayırsınız. Ziyan çəkən isə onun ailəsi olardı. Bu baxımdan, şikayət etməkdən vaz keçdim. Allah belələrinə şəfa versin deyirəm. Siz oxucular da AMİN deyin !
Mətləb Dadaşov
Azərbaycan Jurnalistlər Birliyinin üzvü
metleb.dadasov@mail.ru
01.02.2013-cü il
|
