Главная » 2011»Февраль»13 » ”Neftçi” və ”Xəzər Lankon” meydandan sülhlə ayrıldılar
21:38
”Neftçi” və ”Xəzər Lankon” meydandan sülhlə ayrıldılar
Son günlərin ən çox müzakirə olunduğu "Neftçi” – "Xəzər Lankon” qarşılaşması nəhayət ki, baş tutdu. Gözləndiyi kimi maraqlı keçən qarşılaşmada heç bir komanda hesabı aça bilmədi və ilk dəqiqədən sonadək gərgin keçən "böyük oyun” 0:0 hesablə heç-heçə ilə yekunlaşdı.
Oyuna gəldikdə, "Xəzər Lankon” matça 4-2-3-1 taktiki sxemi ilə çıxdı. Yeni transferlərin bir çoxu bu görüşdə start heyətində yer almışdı. Müdafiənin mərkəzində Elvin Beqiri ilə yanaşı Adrian Skarlatake, sol cinahda isə Simao Bruno qərarlaşmışdı. Meydanın mərkəzində Rahid-Mureşan cütlüyünə cinahlardan Pits və Kyaku dəstəkləyirdi. İrəli çəkilmiş yarımmüdafiəçi rolunda Julius Vubay çıxış edirdisə, mərkəz hücumçusu Uinston Parks idi.
İlk dəqiqələrdən gərginlik hiss olunduğu oyunun birinci hissəsində hər hansı bir komandanın üstünlüyünü qeyd etmək olmazdı. İlk 45 dəqiqədə komandamız bir neçə qol imkanı əldə edə bildi. Xüsusilə yeni transfer Julius Vubayın oyununu qeyd etməyə dəyər. Meydan boyu müxtəlif hissələrdə aktivlik nümayiş etdirən Vubay topla fərdi davranışı sayəsində bir-neçə dəfə rəqib müdafiəçilərin arasından ustalıqla çıxmağı bacardı. Uinston Parks da hər zamankı kimi öz mövqeyində rəqib müdafiəçilərinə problemlər yarada bilirdi. Fiziki göstəriciləri hesabına topu özündə yaxşı saxlayan Kosta-Rikalı forvard hissənin sonlarına yaxın qapıya təhlükəli zərbə endirsə də, top müdafiəçilərə tuş gəldi.
Ikinci hissəyə komandamız daha aktiv başladı. Meydanda yerlərini vaxtaşırı dəyişən Pits və Kyaku hər iki cinahda rəqibə çətinlik yaşada bilirdi. Ümumən, cinahlar bu oyunda "Xəzər Lankon”ın oyununun ən yaxşı tərəfi oldu. Həmçinin Simao Bruno da te-tez hücumlara uğurla qoşulmağı bacarırdı. Bir epizodda isə Kamran Ağayevin də oyuna müdaxiləsi lazım oldu. Yaranmış böyük boşluq nəticəsində Bahodir Nasimov qapıçımızla təkbətək çıxsa da, kapitanımız səhvsiz oynadı.
Az sonra baş məşqçi Mirça Rednik oyunda ilk dəyişikliyi etdi – Parksı Emeka Opara əvəzlədi. Nigeriyalı hücumçu oyuna yaxşı qoşula bildi və məhz onun ötürməsindən sonra Kyaku az qala hesabı açacaqdı. Daha bir qol imkanı isə Elvin Beqirinin cərimə zərbəsindən sonra yarandı. Adəti üzrə topu doqquzluğa yollayan Elvin Rauf Mehdiyevin müdaxiləsi nəticəsində adını tabloya yazdıra bilmədi.
Daha sonra meydana Elnur Abdullayev və Aleks Pitsurka da daxil oldu. Qarşılaşmanın son dəqiqələrinə kimi oyunun mənzərəsi dəyişmədi, qarşılıqlı hücumlar təşkil edən rəqiblər qapılara yol tapa bilmədilər.
"Həmişəki kimi gərgin oyun keçdi. "Neftçi” yüksək səviyyəli oyunçulardan qurulmuş təşkilatlanmış komandadır”, - baş məşqçimiz Mirça Rednik oyundan sonra təşkil olunan mətbuat konfransına bu sözlərlə başladı. "Oyunçularımdan ümumiyyətlə razı qaldım. Onu da qeyd etmək lazımdır ki, "Xəzər Lankon artıq yenilənmiş komandadır, 12 yeni oyunçu cəlb etmişik. Bundan başqa yığma komandada iştirak edən 4 oyunçu da yalnız 2 gün əvvəl komandamıza qoşulublar. Odur ki, uyğunlaşma ilə bağlı bəzi problemlər qalmaqdadır. Komandam bu gün 60 faiz hazır olduğunu hesab edirəm və düşünürəm ki, pley-off oyunlarına artıq 100 faiz hazır olacağıq”, - deyə Rednik vurğuladı. O bildirdi ki, xüsusilə ikinci hissədə olan oyundan razı qalıb: "Nəticəni normal sayıram. Azarkeşlərə də təşəkkürümü bildirirəm ki, belə havada stadiona gəlib komandamıza dəstək oldular”.
Öz növbəsində "Neftçi”nin baş məşqçisi Arif Əsədov birinci oyunun həmişə çətin olduğunu bildirdi: "Amma fikrimcə maraqlı oyun alındı. Hər iki komanda yaxşı oyun nümayiş etdirdi. Öz komandama gəldikdə isə düşündüklərimizin 70-80 faizini reallaşdıra bildik”, - Əsədov bildirdi. Onun sözlərinə görə belə oyunlarla Azərbaycan futbolu udur. "Nə qədər belə oyunlar çox olsa çempionatın səviyyəsi daha da artacaq. Rəqib komanda da çox yaxşı oyun göstərdi və həqiqətən də "Xəzər Lankon” liderliyə layiq komandadır”, - Əsədov vurğuladı.
