 Əssalamun-əleykum, ey Adəm övladları!
Salamın cavabın da almırsız, olmaya məndən küsmüsünüz? Məndən niyə küsürsünüz, xeyli vaxtdır siz tərəflərə gəlmirəm ki, Masallı rayonuna yeni təyin olunan İHB-sı Rafil Hüseynovun Kolatanlılara verdiyi vədin nəticəsini gözləyirdim.
Məlumunuz olduğu kimi, bir tikə çörək dalınca Rusiya Federasiyasının soyuq Sibirinə öz ayaqları ilə "sürgün”ə gedən Kolatanlı gənclərin, burda ölümlərinin yolunu gözləyən valideynlərinin evinə təbii qaz xəttinin çəkilməsi məqsədi ilə, 2009-cu ildə 87 min ABŞ-dollar pul göndərmişdilər. Bu puldan da əlavə, hər təsərrüfat başçısından 100 (yüz) manat yığmaqla, təxminən 280 min ABŞ-dolları məbləğində nəğd pul yığılıb verilmişdi kənd ərazi nümayəndəsi Vale Mikayılova.
Gözünə döndüyüm Vale müəllim həmin vaxt üz qoydu Kəbə ziyarətinə tərəf. Ziyarətdən qayıdandan sonra, sözügedən 280 min dolların müəyyən hissəsini sabiq İHB-sı Qəzənfər Ağayevə, bir hissəsini də sabiq rayon qaz təchizatı idarəsinin müdiri Tofiq müəllimə verdikdən sonra qaz çəkilişinə başladılar. Xatırladım ki, keçmiş SSRİ hökuməti dönəmində Kolatan kəndi bir sovetlik olaraq, tabeliyində olan Sığdaş, Babakücə, Ninalov, Xanaliyan, Seyidoba kəndlərinə dəmir borudan qaz xətti çəkilmişdi. Kolatandan başladılar həmin dəmir boruları söküb, bala-bala satmağa. Qoşa çəkilən boruların biri xırda təmir edilib, ikinci ehtiyat xətti kökündən sökülərək satıldı. Yuxarıda adları çəkilən qonşu kəndlərin bələdiyyəçiləri Kolatanın sökha-sökünü görüb, onlar da başladılar eyni söküb-satma əməliyyatına. Camaat da fikirləşirdi ki, söküb satsalar da verilən nəğd pulun hesabına yeni qaz xətti çəkiləcək...
Sonra nə oldu? Ay canınıza daraşım, necə nə oldu. O oldu ki, camaatın verdiyi pulları Ğəzi müəllim həzm hülğumundan keçirtdi, mən də daimi KİV-də bu korrupsiya və rüşvət barədə başladım yazmağa. Sosial şəbəkələrdə bu haqsızlığı vaxtaşırı olaraq bölüşürəm. Mənə qarşı təqiblər, təhdidlər indi də ara vermir.
Çox keçmədi ki, ərazi nümayəndəsi Vale Mikayılov işdən azad edildi. Məsələ şişdi, "boz kordinala” çatdı, ölkə başçısı da özünün Naxçıvan-Klanından olan Ğəzi müəllimi Masallı "yaylağından” çıxardıb, Astara "oylağına” İHB-sı təyin etdi. Masallıya təyin edilən yeni İHB-sı Rafil müəllimə bu "qaz” çəkilişi məsələsi yaxşıca anladılmışdı ki, Kolatanlıların tələbi KİV-nin gündəmindən çıxmır. O, da ilk görüşünü Kolatandan başladı. Kolatanlıların qarşısında söz verdi ki, bu cinayət işində əli olanlar məsuliyyətə cəlb ediləcək.
Təkrarçılıq etmək fikrim yoxdur, bu barədə kifayət qədər yazsam da müsbət nəticəsi olmadığından xronoloji ardıcıllığı pozmaq istəmirəm.
Bunu da diqqətinizə çatdırım ki, Talış bölgəsində az qala, yalnız süpürgəçilər yerli əhalidən olsun, qalan vəzifələrə təyin olunanların hamısı Naxçıvan-Klan mafiyasından gəlmişlər. Bu qalmaqallı "qaz” məsələsi tez-tez gündəmə gəldiyindən, Ğəzi müəllim həmyerlisi olan, Lənkəran prokurorunun müavini Taleh Osmanova məsələni pıçıldayandan sonra qərara gəldilər ki, məni də digər talışlar kimi Hilal Məmmədovsayağı şərləyib, onun kamerasına transfer etsinlər. Mən də bu məsələni ictimailəşdirəndən sonra hələlik sakitçilik olsa da, bilirəm ki, mənə qarşı təqiblər səngimir.
Qeyd etdiyim məsələlər barədə Avropanın mötəbər təşkilatları da məlumatlandırılıb.
Sirr deyil ki, Kolatanlıların bu günə kimi nə qazı var, nə də pulları qaytarılır. Rafil müəllim də məlum məsələdir ki, nəyin bahasına olursa olsun, yuxarılarda verdiyi rüşvəti Masallıdan çıxartmalı olduğundan, bütün gələn İHB-rı kimi o da, əvvəl masallı bazarını başladı sıxışdırmağa. Çox sıxdı, hətta bir həftə bazara girişi məhdudlaşdırdı. Həmin ərəfədə yol polislərimiz lap "bankrot” oldular. Ona görə ki, bazar qapısında zəncirlənmişdilər, heç tərəfdən rüşvət gəlmirdi bu səmtə. Rafil müəllimin bazardakı haq-hesabı çatandan sonra başladı kadr dəyişikliyinə. Çox adamları "çörəkvay” etsə də, indi həmin yerlərə Ali təhsilli adam tapılmır ki, rüşvət dağarcığını doldursun. Son günlər Kolatanın ərazi nümayəndəsini Səyavuş Ağayevi işdən çıxarıb, Vale Mikayılovun "səxavətli” olduğuna rəğmən, deyilənə görə ondan 10 000 (on min) manat alıb, 09 oktyabr 2012-ci il tarixli əmri ilə yenidən Kolatana ərazi nümayəndəsi təyin edib.
Kolatanlılara bu təyinat münasibəti ilə "gözaydınlığı” verməklə işiniz, avand olsun deyirəm, "qazınız” gür yansın. Bu işlərə isə necə deyərlər Memati yaman əsəbləşib, hər an soruşur, "napalım usta?"
Bən də diyorum ki, yapılası bi iş yok MEMATİ, bunlar Naxçıvanlı!...
Ditdili BƏY,
13 oktyabr 2012 ci il
Masallı rayonu |
