Avropa Şurasının Nazirlər Komitəsi fevralın 3-də Azərbaycanın Milli Azlıqların Qorunması haqqında Çərçivə Sazişinin icra etməsinə dair qətnamə (tövsiyə) qəbul edib.

Qətnamə adı çəkilən Çərçivə Sazişinin məşvərət komitəsinin 2019-cu ildə hazırladığı hesabatın əsasında tərtib edilib.

Sənəddə Avropa Şurasının Nazirlər Komitəsi Azərbaycana “dərhal” tədbir görülməsi üçün tövsiyələr verilib.

Tövsiyələrdə bildirilir ki, Azərbaycan 2019-cu il əhalinin siyahıya alınmasında adamların azad və könüllü özünüidentifikasiyana, çoxtərəfli milli bağların ifadəsinə və adamlardan danışdıqları bir əsas dildən başqa digər dilləri də qeyd etdirməsinə şərait yaratmalıdır.

Tövsiyə edilir ki, Azərbaycan milli azlıqların nümayəndələri ilə əlaqədə milli azlıqların hüquqlarının qorunması üçün hüquqi çərçivənin yaradılmasını və bu işlərin koordinasiyası üçün xüsusi orqanın qurulmasını təmin etsin.

Sənəd Azərbaycan hökumətinə milli azlıqlarla bağlı qərarların verilməsi prosesinə həmin milli azlıqların nümayəndələrinin cəlb olunmasını tövsiyə edir. Tövsiyələrin arasında milli azlıq dillərinin tədrisinin genişləndirilməsi də var.

Qətnamədə tövsiyə edilir ki, hökumət milli azlıqların milli çoxluqlarla birgə yaşayışı əsnasında cəmiyyətin müxtəlif qrupları arasında hörmət və mədəniyyətlərarası anlaşmaya dəstək versin, hər cür dözümsüzlük və nifrət hallarından şikayətlərə diqqətlə yanaşsın.

Tövsiyələrdən biri də milli azlıqların dilində yayınların, medianın inkişafına dəstək verilməsidir.

Qətnamə həm də milli azlıq nümayəndələrinin rəsmilərlə təmaslarda öz ana dilindən istifadəsinə şərait yaradılmasını, lazım gəldikdə bu dillərdən topoqrafik işarələrin yazılmasında istifadəni tövsiyə edir.

Xatırladaq ki, Azərbaycan 2000-ci ildən etibarən Milli Azlıqların Qorunması haqqında Çərçivə Sazişinin iştirakçısıdır. Amma təəssüflər olsun ki, bu sənədin heç bir norması ölkənin aparıcı xalqlarından biri olan talışlara münasibətdə indiyə kimi realizə olunmayıb. 

TALISH.ORG