Türkiyə Cumhuriyyətinin Prezidenti Abdulla Gül cənabına
Sürəti: Türkiyə Cumhuriyyətinin baş naziri Rəcəb Təyyub Ərdoğan cənabına
Sürəti: Azərbaycan Respublikasının Prezidendti İlham Əliyev cənabına
Azərbaycan Respublikası, Lerik rayonu İsmayıl Yaqubov küçəsi ev 23 ünvanda yaşayan
Əliyeva Mail Səlim qızı tərəfindən
ƏRİZƏ
Cənab Prezident!
Yazıb nəzərinizə çatdırıram ki, mən Lerik rayonunda 2010-cu ilin may ayında bələdiyyənin keçirdiyi torpaq hərracında bələdiyyədən alqı-satqı müqaviləsinə əsasən, qanuni yolla öz adıma 1 sot (0,01 ha) torpaq sahəsi almışam. Həmən torpaq sahəsinin bütün sənədlərini mövcud qanunvericiliklə nəzərdə tutulmuş qaydada əldə etmişəm. 2011-ci ildə həmən ərazidə tikintiyə başlamaq istədikdə bələdiyyə sədri Hüseynbala Şahıyev həyat yoldaşımı yanına çağırtdırıb, bizdən, dövlət rüsumundan əlavə olaraq 1500 manat rüşvət tələb edib. Yoldaşım, qanuni yolla dövlətə rüsum olaraq 75 manat ödədiyimizi bildirdikdə bələdiyyə sədri "Dövlətin torpağı var? Torpaq bizimdir, 75 manata torpaq olar? Ya 1500 manat verəcəksən, ya da sən orda tikinti apara bilməyəcəksən” deyib, həyat yoldaşımı otağından qovub. Və bundan sonra bizim Lerikdə qara günlərimiz başlayıb. Bələdiyyə sədri bir müddətdən sonra mənim qanuni yolla əldə etdiyim torpaq sahəsini Sucayev Rüfət Qulam oğluna satıb. Mən, həm dövlət başçısı cənab İlham Əliyevə, həm də digər aidiyyatı orqanlara bu barədə şikayət məktubu yazdım, bundan sonra bu işə Lerik rayonunun mədəniyyət şöbəsinin müdiri, Rüfət Sucayevin qardaşı Aqil Sucayev və onların dayıları, Milli Məclisin deputatı Hüseynbala Mirələmov qarışaraq, öz yüksək səlahiyyətlərindən sui-istifadə edərək məhkəmədən mənim həmən torpağa mülkiyyət hüququmun olmaması barədə saxta hökm alaraq, işi öz xeyirlərinə həll etdilər.
Möhtərəm Prezident!
Sizə müraciət etməkdə məqsədim odur ki, Azərbaycan Prezidentinə ünvanladığım məktublar, Azərbaycanda şikayətçilərin olmaması görüntüsünü yaratmaq məqsədi ilə Prezidentə çatdırılmır və şikayət edilən orqana göndərilir. Konkret olaraq Prezidentə ünvanladığım bütün şikayət məktubları Lerik rayon icra hakimiyyətinə və bələdiyyəyə göndərilmiş, nəticədə mənə qarşı bu boyda haqsızlıq edənlər mənim şikayət ərizələrimi mənə göstərərək, məni mənəvi terrora sürükləmişlər. Bunun nəticəsi olaraq mən Lerik rayonunun mərkəzində öz üzərimə bir vedrə benzin tökərək, özümü yandırmaq istəmişəm, ətrafdakılar mənə bu imkanı verməmiş, nəticədə mən ağır beyin sterssi keçirmişəm.
Cənab Prezident!
Sizin Allah adamı olduğunuzu, kimsənin haqqını yemədiyinizi, həmçinin Azərbaycan Respublikasının Prezidenti İlham Əliyevlə yaxşı münasibətdə olduğunuzu bilirəm və buna görə də öz dərdimi Sizə bildirirəm, bildirirəm ki, Siz də mənim bu şikayətlərimi Azərbaycan Prezidenti İlham Əliyevə çatdırıb, bu işin sonu ilə maraqlanasız!
Hörmətlə: Əliyeva Mail Səlim qızı
08 may 2013-cü il
