Bu gün Azərbaycan Xalq Cəbhəsi Partiyasının (AXCP) Ali Məclisinin sədri Həsən Kərimov, partiya sədrinin müavini Gözəl Bayramlı, Ali Məclisinin üzvləri Təzəxan Mirələmli və Ağaseyid Hüseynov Lerik rayonunda yerli cəbhəçilərlə müşavirə keçirmək istəyiblər. Ancaq, əvvəlcədən "hazırlıq” görən rayon polisi və İcra Hakimiyyətinin nümayəndələri sözün həqiqi mənasında cəbhəçilərə divan tutublar.
Məlumatlara görə, yerli polis AXCP rəhbərliyini mühasirəyə alaraq, rayona buraxmaq istəməyib. Ali Məclis sədri Həsən Kərimovu itələyərək, kobudluqla maşına mindiriblər. Həsən Kərimovun halı pisləşib, ona bir stəkan su içməyə də icazə verilməyib. Digər cəbhəçi Ağaseyid Hüseynovun avtomobili yarasız hala salınıb və özü polislər tərfindən döyülülb.
Gözəl Bayramlı qəzetimizə açıqlamasında bildirdi ki, onlara qarşı hücum əməliyyatını icra hakimyyətinin müavini Cəlil Baxışov və Heydər Əliyevin dostu çoban Xanışın qızı koordinasiya edib. Hətta rayon təhsil şöbəsinin müdiri də öz avtomobili ilə əməliyyata cəlb olunub.
"Bu qədər qanunsuz, qeyri –insani hərəkətlər hakimiyyətin mahiyyətini göstərir. Biz cəbhəçilərlə dinc şəkildə müşavirə keçirmək istəsək də, polis bizimlə düşmən kimi rəftar etdi. Hazırda 4 maşın arxamızca düşüb. Həsən bəyin halı pisləşib. Xüsusi hazırlanmış adamlara yumurta verib yollara düzüblər ki, bizə hücum etsinlər”, - deyə G.Bayramlı qeyd etdi.
AXCP Lerik rayon şöbəsinin sədri Firudun Səmədov isə bildirdi ki, onları yumurta və pomidor atəşinə tutublar: "Bizi maşına mindirib təhqir etdilər, xüsusi adamlara yumurta verib üstümüzə göndərdilər. İndi də məni ucqar bir kənddə atıb gediblər. 150 nəfər cəbhəçi ilə müşavirə keçirməyimiz hakimiyyəti narahat edib. Bizim qanuni yığıncağımıza, qeyri –qanuni şəkildə müdaxilə etdilər. Ölkədə qanun işləmir, insanların həyatına dəyər verilmir”.
Məsələni diqqətdə saxlayacağıq.
