 Əziz dostlar! Əziz qardaş və bacılar!
İlk öncə, son günlər müşahidə etdiyim qəribə bir olayı Sizə nəql etmək istəyirəm: hər sübh cağı saxlandığım kameranın pəncərəsini açıb, dəmir barmaqlılar arxasında "cikkildəşən” o mübarək quşların mübarək sədalarına uyduqca, bir anlıq mən də o bəxtəvərlərdən olub, bizə vəd olunan o əbədi VƏTƏNin cənnəti-məkanın müjdəçilərindən birinə çevrilmək istəyirəm... Sübh vaxtlar, insanlar tərəfindən heç cürə "əhliləşdirilə” bilinməyən çöl (vəhşi) göyərçinləri kameramın pəncərəsindən təxminən 4-5 metrlik məsafədə olan gəzinti otağının ön divarları üstünə qonub, bir anlıq diqqətlə mənə baxır (yəqin ki, salamlayır) və sonra da orada onlar üçün ayırdığım Allah ruzisindən dadırlar…
Sizə bu bayram təbrikli sətirləri yazmağa (səhər saat 7.00-da) hazırlaşırdım ki, bir dəstə göyərçin yenə də o divarlar və barmaqlılara qonub məni seyr (salamladıqlarını) etdiklərini və nədənsə ruzilərinə tərəf baxmadıqlarını müşahidə etdim. Onların boyunlarındakı rəngarəng tüklər yenicə doğulmaqda olan günəşin nuruyla par-par şəfəq saçırdı. Qəfildən bir göyərçin nəfsinə uyub dimdiyini ruzisinə tərəf uzatmaq istəyirdi ki, digərlərinin tənbehli nəzərlərinə tuş gəlib, oranı birgə tərk etmələriylə nəticələndi... Heç 1-2 dəqiqə ötməmişdi ki, onları bir dəstə sərçələrin və digər kiçik quşların (əfsus ki, adlarını bilmədim) "cik-cik”li xoş ciyiltisi əvəz etdi... Maraqlıdır ki, onlar da dimdiklərini ruzilərinə tərəf yönəltmədilər. Qəfildən bir sərçə onlardan ayrılıb pəncərəmdən içəri (kameraya) daxil oldu və çarpayının kənarına qondu. Digərləri kimi bir an mənə baxıb (salamlayıb) uçub getdilər...
Əziz dostlar! İnanın, demək olar ki, mübaliğəsiz təsvir etdiyim bu maraqlı səhnə barədə xeyli düşünüb, min-bir hikmətlərindən bir-ikisini dərk edərək, onları Sizinlə də bölüşmək qərarına gəldim. Əvvəla, bu mübarəklərin yalnız məni yox, həm də Sizin hamınızı – bu sətirlərimi oxuyan hər birinizi salamlamağı məndən rica etdiklərini anladım. Axı, bəşəriyyətin bəlkə də ən xoş, ən mübarək günlərindən biri olan AXİR ÇƏRŞƏNBƏni və NOVRUZun gəlişinin ilk müjdəçiləri də bu mübarək quşlar olub, sanki onlar insanları xəlq olunub-qovuşduqları və oradan da dirçələcəkləri TORPAĞA bu əziz günlərdə bir daha diqqətlə nəzər yetirməyə çağırırlar. Belə ki, məhz bu son Çərşənbədə TORPAQ tamamən canlanır, cəmi bitki və ağaclar XALİQİNDƏN cücərib, tumurcuqlanmaq əmrini alır ki, insanlar bunlardan bir nümunə, bir ibrət dərsi götürsünlər. Çaylar, dənizlər, bulaqlar da saflaşır bu axır çərşənbə gecəsi. Ona görə də bu gecəni xeyli əziz qarşılamaq, ev-eşiklərdə yalnız və yalnız xeyirli sözlər, xeyirli fikirlər, xeyirli əməllər işlətmək lazımdır.
AXIR ÇƏRŞƏNBƏ ritualı həm də o sabahkı Novruza, göylərin də necə canlandığını ifadə edən mübarək bir günə hazırlıq prosesidir. Belə ki, məhz bu NOVRUZda NUR (gündüz) Zülməti (gecəni) yarıb, tədricən hər yanı öz mübarək işığına qərq edir. Başqa sözlə desək ,əgər axır çərşənbə insanları bir gün yenə torpaqdan cücərəciyi ilə xəbərdar edirsə, NOVRUZ onları həm də əbədi NURlu həyatın – o əsil VƏTƏNin mövcudluğu ilə müjdələyir. ”Vətəni sevmək imandandır!” hədisi bilavasitə o əbədi axirət yurdu olan VƏTƏNə sevgini əks etdirir…
Əziz həmvətənlərim! Əziz qardaş və bacılar! Bizi salamlayan və o əbədi xoşbəxt VƏTƏNə müjdələyən o mübarək quşlara qoşularaq, Axır Çərşənbənizi və qarşıdakı NOVRUZ bayramınızı səmimi-qəlbdən təbrik edir və Allaha dua edirik ki, cəmi HAQQsevərləri o ƏBƏDİ XOŞBƏXT VƏTƏNdə məskun etsin ,inşallah! Allaha dua edirik ki,HAQQ yolunu azmış bəndələrin də qəlblərini peşimançılıq və tövbə hissləriylə doldursun, haqsız həbs, təqib və təzyiqlərə son qoyulsun, inşallah!
Bu mübarək günlərin xətrinə, cəmi məhbusların, o cümlədən siyasi (və vicdan) dustaqlarının da tezliklə ailələrinə və yaxınlarına qovuşmaqlarını Allahdan diləyirik!
Əziz dostlar! Hər sabahınız qapı və pəncərələrinizə qonacaq o mübarək NOVRUZ elçilərinin mübarək sədalarıyla açılsın, inşallah! Lütfən, biz dustaqlar üçün də dua etməyi unutmayın...
Xoşbəxt olun! Hər sabahınız xoş ovqatla açılsın,xoş ovqatla da gününüzü yaşayasınız,inşallah! AXİR ÇƏRŞƏNBƏNİZ və NOVRUZ bayramınız mübarək olsun!!!
Hamınıza dərin hörmətlə,
Hilal Məmmədov
P.S. Fürsətdən istifadə edərək, elə bu yazımın sözardı olaraq bildirim ki, martın 21-də atamın yubileyidir. 80 yaşı tamam olur. 5 il öncə, 75 illik yubiley məclisində yarı ciddi-yarı zarafatla ondan soruşdum: nə əcəb 55 illik pedaqoji fəaliyyəti ilə seçilən ölkənin tanınmış alim-proessoruna hakimiyyət tərəfindən bir mükafat verilməyib?! Atam belə cavab verdi: Bala, ən böyük mükafat Allahın yanındadır (3:əl-İmran:195). Bu gün, atamın 80 illik yubileyi münasibətiylə Allha dua edirik ki, 7 övladını min-bir əziyyətlə böyüdüb-ərsə çatdıran, 7 fərqlənmə ali məktəb diplomunu və 3 alimlik diplomunu onlara bəxş etdirən atamı ən böyük mükafatıyla – Nəim cənnətinin gözəllikləriylə müjdələsin, inşallah!
|
