"Tolışi sədo” qəzetinin redaktoru Hilal Məmmədovun işi üzrə prosesdə vəkillərin yekun çıxışları başlayıb.
Vəkil Ramiz Məmmədov müvəkkilinin təqsirinin sübutu olmadığını bildirib. Onun sözlərinə görə, istintaq kobud prossesual pozuntularla həyata keçirilib və bir çox uyğunsuzluqlar olub.
H.Məmmədov saxlandıqdan dərhal sonra ona hüquqları izah olunmayıb, vəkili ilə görüşməyə icazə verilməyib.
Bundan başqa, saxlanılma özü qanun pozuntusu olub.
Onun mobil telefonun müsadirə edildiyi protokollaşdırılmayıb, sonradan telefonun hafizəsindəki məlumatlardan onun əleyhinə istifadə olunub. Lakin bu məlumatları mobil telefona Məmmədov saxlandıqdan sonra telefonu alan polislərin özləri tərəfindən daxil edilə bilərdi və polis həmin telefonla Məmmədovun evinə zəng edib.
Müstəntiq H.Məmmədovun kirayə evində axtarış zamanı qanunu pozub və axtarışı məhkəmə qərarı olmadan həyata keçirib.
Məmmədovun həbsi üçün həmin vaxt həbsdə olan Elman Quliyevin dəlilsiz iddiaları əsas olub.
Vəkil xatırladıb ki, Quliyev məhkəmədə çıxış edərkən Hilal Məmmədova qarşı "qisas” üçün ifadə verib.
Vəkil həmçinin Quliyevin 1973-cü ildən KQB, sonradan isə MTN casusu oduğu haqqında etiraflarına diqqət çəkib.
Vəkil H.Məmmədovun Avropa İnsan Hüquqları Konvensiyasının bir sıra maddələrində zəmanət verilmiş hüquqlarının – azadlıq hüququ, səmərəli hüquqi müdafiə vasitəsi ilə təmin edilmək hüququ, ifadə azadlığı hüququ, ayrı-seçkiliyin qadağan edilməsi, işgəncələrin qadağan edilməsi haqqında müddəaların pozulduğunu bildirib.
Vəkil bildirib ki, H.Məmmədov ifadə azadlığına görə həbs edilib. Belə ki, onun İnternetdə yerləşdirdiyi "Tı, kto takoy, davay do svidania!” klipi çox məşhurlaşıb.
Bununla əlaqədar olaraq, NTV-nin çəkiliş qrupu gəlib, folklor festivalı haqqında reportaj hazırlayıb. Bundan sonra Hilal Məmmədov videomaterialın altına qeyd yazıb ki, o, bir kliplə Azərbaycanı hakimiyyətin böyük vəsait xərcləyərək "Eurovision” keçirməklə məşhurlaşdırdığından daha çox məşhurlaşdırıb.
Vəkil Xalid Bağırov həmçinin Hilal Məmmədovun təqsirsiz olduğunu və ona qarşı irəli sürülmüş ittihamların uydurma olduğunu bildirib.
Digər vəkillər yazılı formalda yekun fikirlərini təqdim ediblər və bəraət qərarı çıxarılmasını tələb ediblər.
Məmmədovun yekun çıxışı 27 sentyabr saat 12.00-a təyin edilib, elə həmin gün onun barəsində hökm oxunacaq (contact.az).
