 Azərbaycan Dövlətçiliyi Naminə Demokratik Talış Birliyi (ADN DTB) Gənclət Təşkilatının 8 yanvar 2013-cü il tarixdə Bakı şəhərində ilk təsis yığıncağı keçirilmişdir.
Yığıncaqda təşkilati məsələlər üzrə qərar qəbul olunmuş və strukturun fəaliyyət proqramı müzakirə edilmişdir.
ADN DTB-nin Gənclər Təşkilatının sədri Birliyin İdarə Heyətinin üzvu Mirfayaz Vahabov seçilmişdir.
ADN DTB-nin Gənclər Təşkilatının fəaliyyət proqramı ilə bağlı bəyanat müzakirə edilmiş və səsvermə nəticəsində qəbul olunmuşdur. Bəyanatın mətnini Azərbaycan Respublikası İctimayətinə çatdırılması üçün mətbuatda dərc olunması məqsədəuyğun hesab olunmuşdur.
Redaksiyamıza daxil olan Bəyanatın mətnini oxucularımızın nəzərinə çatdırırıq.
Azərbaycan Dölətçiliyi Naminə Demokratik Talış Birliyi Gənclər Təşkilatının təsisi ilə bağlı
B Ə Y A N A T
Biz, Azərbaycan Dövlətçiliyi Naminə Demokratik Talış Birliyi Gənclər Təşkilatının üzvləri, doğma Vətənimiz Azərbaycanın demokratik inkişafında maraqlıyıq və onun dövlətçilik ənənələrinə, dövlət rəmzlərinə, eləcə də dilinə, tarixinə və mədəniyyətinə böyük hörmətlə yanaşırıq.
İnkarolunmaz faktdır ki, talışlar min illər boyu Azərbaycanın coğrafi ərazisində yaşayan digər etnoslarla daima dostluq-qardaşlıq şəraitində yaşamışlar; Respublika istiqlaliyyəti uğrunda birgə, çiyin-çiyinə mübarizə aparmış, mərhumiyyətlərə qatlaşmış və müstəqillik mücadiləsində qurbanlar, şəhidlər vermişdir. Biz gənclər, ölkəmizin müstəqillik mübarizəsində keçdiyi şanlı qəhrəmanlıq yolu ilə fəxr edirik.
Bununla bərabər, ölkəmizin talış kökənli gəncləri olaraq, ANAmızın bizə bəxş etdiyi, ULUlarımızın əmanəti olan DİLə və bu DİLdə oxunub ruhumuzu yaşadan laylalara, bayatılara və xalq mahnılarına çox böyük həssaslıqla yanaşır, onu göz-bəbəyimiz kimi qorumağı özümüzə müqəddəs borc bilirik. Düşünürük ki, Azərbaycan xalqının tərkib hissəsi olan talış etnosu da Konstitusiyamızda təsbit olunmuş qanunlar çərçivəsində, öz milli-mənəvi irsinin və etnik xüsusiyyətlərinin tədqiqi və təbliği yönündə ümumi hüquqlara malikdir.
Biz bu hüquqlardan, o cümlədən ADN DTB-nin Məramnaməsindən yararlanaraq, geniş fəaliyyətə başladığımızı bəyan edirik!
ADN DTB-də təmsil olunan Gənclər Təşkilatı öz fəaliyyətini gənc nəslin mütərəqqi maraq və istəklərinə uyğun olaraq, daha səmərəli həyata keçirmək arzusundadır. Təşkilat özünün strateji fəaliyyət proqramını ADN DTB-nin Məramnamə və Nizamnaməsində təsbit olunmuş müddəalara istinad edərək, aşağıdakı prinsiplər əsasında qurmaq niyyətindədir:
- gənclərin asudə vaxtlarının səmərəli və mənalı keçirməsi üçün talış dilində özfəaliyyət mahnı, musiqi və teatr dərnəkləri təşkil etmək;
- özünəməxsusluğu ilə tanınan və əsrlərin yaddaşına həkk olunmuş talış kulinariyasının özəlliklərini araşdırmaq, bu sahədə təcrübəsi və zəngin bilgisi olan yaşlı kulinarların tövsiyyələrindən bəhrələnərək, sağlamlığın və uzunömürlülüyün vacib şərtlərindən sayılan qidalanma mədəniyyətini qoruyub hifs etmək;
- tədricən unudulan qədim mərasimləri - toy şənliklərinin, xalq sənətkarlıq nümunələrinin və başqa adət-ənənələrin öyrənilməsi, təhlili və gənclər arasında təbliğ olunması yollarını aramaq;
- milli-mənəvi və dini dəyərlərin qorunması istiqamətində maarifləndirici tədbirlər keçirmək;
- ADN DTB-nin fəaliyyət məramı ilə səsləşən, eləcə də ölkədə vətəndaş cəmiyyəti quruculuğunda maraqlı olan Respublikamızın digər gənclər təşkilatları ilə birgə internet forumları, müxtəlif təcrübə mübadilələri və tədbirlər keçirmək;
- vətəndaşlarımızın hüquq və azadlıqlarının qorunması istiqamətində, habelə onların sosial-ictimai və psixoloji problemlərinin həlli məsələsində əməli işlər görmək;
- Azərbaycan, o cümlədən Talış tarixini, dilini, dinini, ədəbiyyatını, mədəniyyətini hərtərəfli bilən mütəxəssislərin, elm və incəsənət xadimlərinin iştirakı ilə mütəmadi olaraq Dəyirmi Masalar, diskusiyalar, elmi konfranslar və görüşlər keçirmək;
- Talış Gənclər Təşkilatının "VƏTƏNİM – DİLİM – TALIŞIM” adlı internet portalını təsis etmək və s.
Biz, ADN DTB Gənclər Təşkilatının üzvləri, Azərbaycanımızın işıqlı gələcəyinə inanır və bu YOLDA qətiyyətlə addımlayacağımızı bəyan edirik!
ADN DTB-nin Gənclər Təşkilatı
Bakı şəhəri,
08 yanvar 2013-cü il |
