Güclü küləklə müşaiyət olunan qar yağışı Bakıda və ölkənin bir çox rayonlarında həyatı, demək olar ki, iflic edib.
Hələ dünən axşam saatlarından paytaxtda yollar buz bağlayıb. Qar yağışı vəziyyəti bir az da çətinləşdirib. Əlverişsiz hava proqnozlarına baxmayaraq, şəhər rəhbərliyi nəqliyyatın hərəkətinin və digər həyati xidmətlərin işinin təmin edilməsi üzrə ciddi tədbirlər görməyib. Yalnız paytaxtın əsas küçə və prospektlərinə qismən qum səpilib. Qaryığan texnikadan demək olar ki, istifadə olunmur.
Enerji təchizatında ciddi fasilələr var. Xüsusən, Əhmədli, Binə, Lökbatan, Əmircan, Xətai rayonu NZS qəsəbələrində, habelə Bakının mərkəzində bir sıra yerlərdə elektrik enerjisi verilməsi dayandırılıb.
"Bakıelektrikşəbəkə” SC-nin mətbuat katibi Tanrıverdi Mustafayev bunu əhalinin elektrik qızdırıcılarından istifadə etməsi ilə əlaqədar şəbəkənin həddindən artıq yüklənməsi ilə izah edib.
Onun sözlərinə görə, əlverişsiz hava şəraiti ilə əlaqədar təmirçilər qəza yerlərinə operativ çata bilmirlər.
Bakıətrafı bölgələrdə qaz verilməsi dayandırılıb və ya məhdudlaşdırılıb.
Bakı hava limanında cümə axşamı səhər saatlarında bir çox aviareyslər təxirə salınıb.
Bu arada, sinoptiklərin proqnozları ürəkaçan deyil. Gün ərzində qar yağışı davam edəcək, şimal-qərb küləyi isə daha da güclənəcək.
Güclü qar yağışı ilə əlaqədar ölkənin cənub, şimal və qərb istiqamətlərində əsas magistrallarda avtomobillərin hərəkəti çətinləşib, bəzi yerlərdə isə tamamilə dayanıb.
Şaxtalı hava şəraiti cümə günü də davam edəcək (Turan).
