Yaxud BMT-dəki səsvermənin uğuruna sevinən seçki saxtakarları
Öz vətəndaşları üçün təhlükə mənbəyi olan, onların hüquqlarını kobud şəkildə pozan bir dövlət BMT Təhlükəsizlik Şurasına müvəqqəti (2 illik) üzv seçilməsini böyük qələbə kimi qeyd edir. Dəsmal götürüb bu xalqın halına ağlamağa 7 ana lazımdır. Bu, uşaq başı yozmaqdır axı...
Bu xalqın malı talan edilsin, səsini çıxarmaq hüququ olmasın, üstəlik, ona deyəsən: sevin, sevin, sənin dövlətin BMT Təhlükəsizlik Şurasına müvəqqəti üzv seçilib. Özü də cari bir üzvlükdür. Enində-sonunda nəyisə həll etmir. Bizim ölkədə az qala heç kimin tanımadığı Qabon adlı Afrika ölkəsi 4 dəfə seçilib bu yerə. Biz də seçilmişik, lap yaxşı. Bizə nə bundan? Axı xalqa nə bundan?
Buna sevinmək əvəzinə, öz vətəndaşının keçəlinə bir dərman sürtsən daha yaxşı deyilmi?
Sən bu xalqın hüquqlarını qaytar, sən onu rüşvətin, korrupsiyanın caynağından al, sən onu haqsız polisin, məhkəmənin, prokurorun hiyləsindən qurtar, sonra da Birləşmiş Millətlər Təşkilatının Təhlükəsizlik Şurasına müvəqqəti üzv seçilməkdən danış.
Dünyanın ən bədbəxt, ən zəif, ən kasıb ölkələri də bu Şuranın üzvü olub. Nigeriya daimi üzvlük tələb edir. Ilham Əliyev isə "böyük qələbə” adlandırıb bu hadisəni: "Nəticədə 155 ölkə Azərbaycanın namizədliyini dəstəkləyərək, etimad göstərərək bizi bu mötəbər təşkilata üzv seçdi.”
Bəlkə onu da yada salaq ki, bu ölkədə səsvermə ilə indi harasa seçilmək mümkün deyil. Parlamenti siyahı ilə təyin edirsiniz. Bundan sonra biz sevinməliyik də?
Indi biz BMT-dəki səsvermədə qazanılan uğura sevinən seçki saxtakarlarını necə anlayaq? Axı həmin BMT-nin qurumları dəfələrlə öz hesabatında bu ölkədəki problemləri qaldırıb və siz onu rədd etmisiniz. Açın baxın, BMT-nin bütün hesabatlarında Azərbaycan insan haqlarının durumuna, söz azadlığına basqılara görə tənqid edilir.
*** Azərbaycanın BMT Təhlükəsizlik Şurasına müvəqqəti üzv seçilməsi heç bir uğur deyil. Buna enerji sərf etmək, buna ümid bəsləmək isə mənasız bir işdir. Üstəlik, bu hadisə hələlik ziyanlı rol oynayır. Çünki bizim hakimiyyət bu sintetik və müvəqqəti üzvlükdən istifadə edib böyük uğur hekayəsi düzəldir və bunun fonunda ölkədəki gerçək problemləri gizlədir. Bu hadisə indi yalnız və yalnız xalqın başını uşaq kimi yozmağa xidmət edir.
Bunun yalnız bir xeyri ola bilər - vətəndaş cəmiyyəti ölkədə azadlıqların vəziyyətini BMT-də tez-tez gündəmə gətirsin.
*** Buyurun. Nədən BMT Təhlükəsizlik Şurasının üzvü olan bir dövlət növbəti qəzetin üzərinə hücum edib? Nədən onun baş redaktoruna qarşı süni cinayət işi açır? Son günləri yada salaq. Tənqidçi mövqeyi güclənən və gündəlik nəşrə başlayan "Xural” qəzetinə dövlət bütün gücü ilə hücum edib. Əmlakı yağmalanıb. Nəşrinə əngəl yaradılıb. Baş redaktoru Əvəz Zeynallıya isə cinayət işi açılır. Yəni eləmi böyük təhlükədir bu qəzet. Bütün millətlərin təhlükəsizliyini qoruyan bir dövlət qorxdumu "Xural” qəzetindən?
Hiylənin quyruğu burada görünür. BMT sənəd və konvensiyalarına məhəl qoymursan, onun qəbul etdiyi Ümumdünya Insan Hüquqları Bəyannaməsini hər addımda tapdayırsan, özün də bu təşkilatın şura üzvü olmağını böyük qələbə sayırsan.
Bəli, Azərbaycanın adı bizim adımızdır. Amma bu adla alver edənlər, bu adın arxasında oyun quranlar tarixin ironiyasına və tənəsinə layiqdir...
