 Yaxud, hər abonentdən on manatdan yığılan pullar doğrudanmı Əli Abbasovun cibinə gedir?
Əsəblərimə hakim ola bilmədim. Əziz həmvətənlər, istəkli oxucular! Guman edirəm ki, bu yazıda işlətdiyim bəzi senzurasız ifadələrə görə məni bağışlayarsınız. Bildiyiniz kimi, mən tənqidçi olsam da heç vaxt yazılarımda, çəkdiyim karikaturalarda, tənqid hədəfinə tutduğum şəxsin şərəf və ləyaqətinə toxunmamışam. Çalışıram ki, Azərbaycan Respublikası Kütləvi İnformasiya Vasitələri haqqında qanunun maddələrini rəhbər tutaraq qanun pozuntuluğuna yol verməyim. Düşünürəm ki, tənqid hədəfinə tutduğum şəxs, hər şeydən öncə insandır. Digər tərəfdən isə Allah da yaratdığı insanı sevir. Bəzi insanlar isə etdikləri naqis hərəkətlərinə görə heç olmasa vicdanı qarşısında da hesabat vermirlər.
Sirr deyil ki, ölkənin təhsili, səhiyyəsi, hüquq mühafizə orqanları, bir sözlə desək, bütün dövlət strukturları şikəst bir orqanizmdir. Söhbətim dövlət obyekti sayılan "Aztelekom”dakı qanun pozuntuluğundandır.
Əsrimizin ən böyük nailiyyətlərindən olan İnformasiya və Telekommunikasiya sahəsi hər bir müasir düşüncəli insanın gündəlik həyatında mühüm əhəmiyyət kəsb edən sahədir. Baxın görün ölkənin Rabitə və telekommunikasiya Nazirliyi hansı formada vətəndaşlara qan uddurur.
Sözügedən "Aztelekom” naziri, cənab Əli Abbasov respublika telekanalizasiyalarında, digər həmkarları kimi rəhbərlik etdiyi sahənin uğurlarından ağzı köpüklənə-köpüklənə, bizim bəzi mollalar kimi boğazında qaynada-qaynada elə danışır ki, dinlədikcə, dinləmək istəyirsən. Onun alovlu çıxışından sonra, sənə oğul deyərəm, on metr məsafədə olan qonşuna zəng et. Ay etdin ha !...
Heç uzaqdan danışmıram. Yaşadığım Masallı rayonun rabitə sahəsində gördüyüm və bildiyim yarıtmaz işlərdən söz açıram. Rabitədən bir qədər az yazdığımdan nəinki sizlər, hətta "Göydə mələklər də qınayar məni”. Bilirəm hamının ürəyi doludur, lakin dərdinizi deməyə dürüst bir ünvan tapmırsınız. Yeni bir ünvanın yerini tapmışdım ki, bu da alt-üst oldu. Heç bir səbəb olmadan internet xəttimi kəsdilər, nəzərdə tutduğum ünvanın yarıtmaz işləri barədə də sosial şəbəkələrdə "DİTDİLİ bəy” rubrikası altında tənqidi foto, karikatura və yazılarla çıxış edirdim. Bu "sevdam” da baş tutmadı.
Ay kişilər, "Wikilleaks” saytı Azərbaycanın iç üzünü açdı, bu məmurlar həya etmədi. Bunların mədəsi daşı, dəmiri, on üç milyard pulu, indi də internetdən oğurlanan pulları necə həzm edir? Bu ölkənin yer altı, yer üstü, sərvətlərini yeyirlər, doyduq da demirlər. Mən isə onlara deyirəm, haram xoşunuz olsun!
Əli Abbasov da digər həmkarları kimi mədəsini sazlayıb, rabitənin "kabel” və avadanlıqlarını həzm borusundan keçirir. Bəzi ağzı göyçəklər deyəcək ki, faktlara istinad et, ay yazar!...
Axı sözümün əvvəlində dedim ki, KİV- haqqında qanuna hörmətlə yanaşıram. Amma bunlar qayda-qanun deyilən anlayışı dərk etmirlər. Məcburam ki, onların öz dili ilə danışım.
Mərhum atam altımışıncı illərdə dövlət işində işlədiyi üçün, kəndimizdə ilk dəfə telefon xətti bizim evə çəkildi. Kaş heç çəkilməyəydi. Ona görə ki, indi əsəblərim də yerində olardı. O dövürdən bu günə kimi mənim ev telefonum heç normal işləməyib. Həmişə telefondan şikayətçi olsam da, şikayətimə baxan olmayıb. Son dövürlər işimlə əlaqədar məcbur oldum ki, internetdən istifadə edim. Bu istəyim də mənə ancaq əsəb gərginliyi verməkdədir. Verilən internet surəti 19,7kb. yaxşı halda 26,6 kb. olur. Bilirsiniz bu nə deməkdir? Bu o deməkdir ki, Əli Abbasov vaxt hesabı ilə abonentin cibinə girib, oğurluq edir. Etməsin neyləsin bu binəva? Xalqın qanı ilə gombul balalar bəsləməsin? "Ə...bə... Qardaş, müsəlmançılıx dəyil, hi"?!
Rayon rabitə- telekommunikasiya qovşağının rəhbərliyinə dəfələrlə yazılı və şifahi şikayət etsəm də daşdan səs çıxdı, onlardan səs çıxmadı. Ötən il başladılar kənd yollarının qırağından bir metr dərinlikdə xəndəklər qazmağa. Guya həmin xəndəklərlə yeni, yeraltı telefon xəttləri çəkiləndən sonra bəxtəvər olub, telefonun pis işləməsi problemi ilə üzləşmərik. Camaatın şəxsi vəsaiti hesabına düzəldilən asvalt yollar viran edildi, qazılan xəndəklər birtəhər örtüldü, işlər yarımçıq qaldı, yeraltı xətt çəkilişi tam icra olunmadı. Guya kəndlərdə elektronlaşma aparıldı (?). Xəndəkqazma "əməliyyatında” korrupsiyaya əməllibaşlı yol açıldı. Sabiq telekom müdiri Əmanət Əzizov qaz vurub, qazan doldurmağa başladı. İdarənin daxilində gedən "saray” çəkişmələri, axırda telekommunikasiya qovşağının partlamasına səbəb oldu. O vaxtdan hər abonentin boynuna on manat "sənədləşmə” borcu yazılıb (?). İndi kim həmin on manatı vermirsə, onun telefonu kəsilir (?).
Sözümün əvvəlində dediyim kimi, sosial şəbəkələrdə bu barədə kifayət qədər yazmışam. 09 oktyabr 2011-ci il tarixdə, foto şəkillərlə, dolğun faktlarla "facebook” sosial şəbəkədə bu olayları lazımımca ictimailəşdirdim. Ertəsi gün mənim rabitə xəttim tamamilə kəsildi.
Kənd rabitə qovşağında işləyən Səxavət Abdinov adlı işçidən razılığını alıb, müsahibə almağa nail oldum. S. Abdinova deyəndə ki, mənim telefonumu niyə kəsmisiniz? Cavabında, sizin adınıza on manat borc yazılıb ifadəsin işlətdi. Mən isə iki gün öncə abunə və internetdən istifadə etdiyimə görə hesablanan borclarımı ödəmişdim. Bu sözdən sonra kompüterdən çıxan uzun bir siyahı mənə göstərdi. Siyahıda 152 abonentin adına 10 (on) manatdan pul yazılmışdı. Həmin siyahı səliqəli yazılmasına baxmayaraq, nə möhürü, nə də müəssisə rəhbərinin imzası yox idi.
ATS-dən çıxıb, "telekom” qovşağının müdiri cənab Nizam Bağırovla telefon əlaqəsi saxladım. Nizam müəllim konkret olaraq bildirdi ki, bu on manat, sənədləşmə puludur. Bizə aidiyyəti yoxdur, nazirin göstərişidir. Sözügedən məsələ ilə əlaqədar çoxlu sayda vətəndaşların şikayəti olsa da, Əli Abbasov 10 (on) manatı camaatdan almaqda israrlıdır.
Hal-hazırda mənim telefonum işləmir, internetdən istifadə edə bilmirəm. Əli Abbasov isə 10 (on) manat üçün dilənir. Nə məsləhət bilirsiniz, o on manatı balalarımın başına fırladıb, verimmi?
Bilirəm, deyərsiniz ver, itaparan olsun!
Ay mənim əzizlərim, söhbət tək məndən getmir. Bir kənddən əgər 152 adamdan on manatdan dilənilirsə, onu vurun kəndlərə, rayonlara və şəhər abonentlərinin sayına, hesablayın görün dilənçilik necə biznesdir?
Yaxın vaxtın söhbətidir, "Xəzər- Tv"-nin reportyoru Bakıda düşmüşdü bir əlil arabasında oturub dilənən sağlam, cavan oğlanın dalınca. Teleaparıcı "əlil” oğlanı "şmon” etdikdən sonra, oğlanın beş yüz manat "qazanmağına” heyrətini gizlədə bilmədi...
Deyirəm bu "Xəzər-Tv” Bir halda ki, dilənçilərlə iş aparmaq missiyasını öz üzərinə götürüb, növbəti reportajını "Aztelekom”un başqanı Əli Abbasova həsr etsin. Bu iş məzlum xalqın lap ürəyincən olardı...
  
Şəkildə, bir metr dərinlikdə qazılıb-bastırılan telefon xətləri, "analoqu” olmayan qaydada, lap az qala beynəlxalq standartları da ötüb keçsin.
DADAŞİ Mətləb,
metleb.dadasov.56@mail.ru
|
