Avropalı diplomatlar «gizli nömrə» vasitəsilə Prezident Administrasiyasının işçilərini ifşa etdi
Ryan Heath: «Bu, gizlətməyə heç nəyi olmadığını iddia edən hökumətin məyusedici davranışıdır»
"Əli Həsənovun dedikləri doğru deyil və bu məsələ həbsxanada yatan insanlar üçün ”kiçik məsələ" hesab olunmamalıdır". Bunu Avropa Komissiyasının vitse-prezidenti Neelie Kroesin sözçüsü Ryan Heath "BBC Azərbaycanca”ya açıqlamasında deyib.
Internet Idarəçiliyi Forumunda iştirak etmək üçün Bakıya səfəri çərçivəsində xanım Kroes cəzaçəkmə müəssisələrinə baş çəkərək, siyasi məhbuslarla da görüşmək istəmişdi. Lakin onu cəzaçəkmə müəssisəsinə buraxmamışdılar. Bu olaydan sonra xanım Kroes açıqlama verərək bildirmişdi ki, məhbuslarla görüşün icazəsini I.Əliyevlə görüşdə ondan almışdı. Lakin prezidentin söz verməsinə baxmayaraq, onu həbsxanaya buraxmadılar.
Prezident Administrasiyasının ictimai-siyasi şöbəsinin müdiri Əli Həsənov isə "Turan” agentliyinə açıqlamasında xanım Kroesin prezidentin dediklərini düzgün başa düşmədiyini, ümumiyyətlə, dövlət başçısının "belə kiçik məsələ ilə” məşğul olmadığını bildirib:. "Cənab prezident ona yəqin ki, bildirib ki, Azərbaycanda həbsxanalarda ümumi rejim qaydalarına müvafiq olaraq istənilən məhbusla görüşmək olar”.
Xanım Kroesin sözçüsü isə Əli Həsənovun dediklərini təkzib edib. "Prezident bizə dedi ki, işçilərinin bizim həbsxanaya səfərimizi təşkil etməsini təmin edə bilər”, - deyə cənab Heath bildirib. Onun sözlərinə görə, prezident bu "vədi” xanım Kroesə çərşənbə günü keçirilən görüşündə verib.
"Cümə axşamı isə Əliyevin ofisinin işçiləri Avropa Ittifaqı səfirinin zənglərinə gün ərzində cavab vermədilər”, - Avropa Komissiyası vitse-prezidentinin sözçüsü əlavə edib.
Cənab Heathin sözlərinə görə, zənglərə cavab almadıqda onlar "digər nömrə ilə” prezidentin işçilərinə zəng ediblər, "ondan sonra isə məmurlar məsələni bir-birinin üstünə atmağa başlayıblar”.
Ryan Heath bunu "gizlətməyə heç nəyi olmadığını iddia edən hökumətdən məyusedici davranış” kimi qiymətləndirib.
Ə.Həsənov isə bildirib ki, istintaq altında olan məhbuslarla görüşün "öz rejimi, qaydaları, normaları var”.
