"Müxalifət fəallarının və jurnalistlərin siyasi motivli həbslərinə son qoyulsun”
Article 19 təşkilatı Azərbaycanda siyasi azadlıqlar və insan hüquqları ilə bağlı vəziyyətin qiymətləndirilməsinə dair hesabat açıqlayıb. "BMT-nin son universal dövrü icmalından sonra Azərbaycan siyasi motivli həbslərlə fəalların və jurnalistlərin təqib olunması praktikasını davam etdirir. Onların saxta ittihamlarla, o cümlədən narkotik maddə, qanunsuz silah saxlamaq ittihamı ilə həbs olunmasında məqsəd tənqidi səslərin susdurulmasıdır”, - deyə hesabatda bildirilir.
Article 19 Azərbaycan hakimiyyətini söz, ifadə azadlığı hüququnu reallaşdırmağa görə həbs olunanları azad etməyə, toplaşma azadlığı haqqında qanuna son düzəlişləri ləğv etməyə çağırır.
Təşkilat qeyd edir ki, Azərbaycan hakimiyyətinin öhdəliklərinə baxmayaraq, sosial şəbəkə istifadəçilərinin, İnternet blogerlərinin təqib olunması davam edir. 2013-cü ilin əvvəlindən Azərbaycanda vətəndaş cəmiyyəti prezident seçkiləri ərəfəsində daha da fəallaşır.
"2013-cü iin martından NİDA təşkilatının yeddi fəalı siyasi motivlərlə həbs olunub. Bundan əlavə, digər fəallar və blogerlər də təqiblərə məruz qalıblar. Onların ümumi sayı 20-yə yaxındır”, - deyə sənəddə bildirilir.
Article 19 Azərbaycan hökumətini 2012-ci ilin noyabrında toplaşma azadlığı haqqında qanuna edilmiş düzəlişləri ləğv etməyə çağırır və öz fikrini ifadə etmək hüququnun reallaşdırılması ilə bağlı həbsdə olunanların azadlığa buraxılmasını tələb edir. Bunlar İlqar Məmmədov, Bəxtiyar Quliyev, Şahin Novruzoğlu, Məhəmməd Əzizov, Rəşadət Axundov, Üzeyir Məmmədli, Zaur Qurbanlı, Daşqın Məlikov, Əvəz Zeynallı, Fərəməz Novruzoğlu, Fuad Hüseynov, Hilal Məmmədov, Tofiq Yaqublu, Nicat Əliyev, Araz Quliyev, Mehman Hüseynov, Vüqar Qonaqov və Zaur Quliyevdir.
Təşkilat həbsdə olan və məsuliyyətə cəlb edilən şəxslərlə amansız davranış və işgəncə halları barədə bütün məlumatların araşdırılmasına, məhbuslarla davranışda BMT standartlarına hörmətlə yanaşmağa çağırır (Azadlıq Qəzeti).
