Главная » 2012»Май»17 » Almaniyanın daha bir nəşri "Əliyevlərin ifşası"na qoşuldu
14:03
Almaniyanın daha bir nəşri "Əliyevlərin ifşası"na qoşuldu
Nüfuzlu «Ştern» jurnalı da hakimiyyəti tənqid atəşinə tutdu
«Neft pulları da Azərbaycan hakimiyyətinə tənqidlərdən qaçmağa kömək etmədi»
Almaniya mediası Azərbaycanda keçiriləcək "Eurovision” musiqi yarışmasının fonunda bu ölkədəki ictimai-siyasi durum, insan haqları və söz azadlığının vəziyyətilə bağlı oxucularını məlumatlandırmaqda davam edir. Həmin məqalələrdə Azərbaycandakı bərbad durumla əlaqədar birbaşa hakimiyyət hədəf göstərilir və anti-demokratik idarəçiliyə görə sərt tənqid olunur. Bildirilir ki, Azərbaycan hakimiyyəti "Eurovision” musiqi yarışmasına külli miqdarda pul xərcləməklə dünyanın diqqətini bu ölkədə insan haqlarının pis vəziyyətindən yayındırmağa, özünün mənfi imicinin yaxşı formada təqdim olunmasına çalışır. Bu qəbildən olan məqalələrin biri də Almaniyanın məşhur "Ştern” (Stern magazine) jurnalında yayımlanıb. Əsası 1948-ci ildə qoyulan jurnalda dərc olunmuş məqalə ölkəmizin ictimai-siyasi həyatından bəhs edir. Məqalə gənc repçi Camal Əlinin gənclərin 17 mart aksiyası zamanı oxuduğu mahnının sözlərinə görə döyülməsi faktıyla başlanır: "Təxminən 2 min nəfər gənc illərlə davam edən qadağalardan sonra ilk dəfə siyasi tələbli aksiyaya qatılmaq üçün Bakının kənarındakı meydana toplaşdı. Onlar insan haqlarına hörmət olunmasını və siyasi məhbusların azadlığa buraxılmasını tələb edirdi”. Ömürlük prezidentliyin önü açıldı
"Ştern” yazır ki, Azərbaycanda müxalif düşüncəli insanlar, tənqidçi jurnalistlər və ictimai fəallar tez-tez həbs və təzyiqlərlə üzləşirlər: "Jurnalistlərə qarşı hücumlar indi də davam edir. Çoxlarının fikrincə, ”Eurovision"dan sonra ölkədə vəziyyət daha da pisləşəcək". Jurnalda o da qeyd olunub ki, Azərbaycanın hazırkı rəhbəri 2003-cü ildən ölkəni avtoritar qaydalarla idarə edən Ilham Əliyevdir. O, hakimiyyətə atası - keçmiş "KQB” generalı Heydər Əliyev tərəfindən gətirilib: "Ilham Əliyev 3 il əvvəl Konstitusiyada dəyişiklik edərək, ömürlük prezidentliyə qoyulan maneəni aradan qaldırdı. Çoxları hesab edir ki, Azərbaycanda varislik prinsipilə sülalə hakimiyyətinin əsası qoyulub”. "Mafioz struktur”, "mütəşəkkil cinayətkarlıq” və...
Məqalədə vurğulanır ki, Azərbaycanın təbii ehtiyatlarla zəngin olması və coğrafi baxımdan strateji məkanda yerləşməsi də Qərbin bu ölkədə insan hüquqları və demokratiyanın durumuna görə hakimiyyətə qarşı tənqidlərinin qarşısını ala bilməyib: "Bakıdakı ABŞ diplomatlarının məxfi məktublarında Azərbaycan hakimiyyəti haqda ”mafioz struktur", "mütəşəkkil cinayətkarlıq” terminlərindən istifadə olunurdu. Ilham Əliyev "Xaç atası” filmindəki "Sanni Karleoni”yə bənzədilirdi. Lakin iş və strategiya həmişə insan haqları və demokratiyadan öndə gəlirdi. Bundan istifadə edən Azərbaycan hakimiyyəti böyük neft şirkətlərini Bakıya dəvət etdi, onlarla sıx əməkdaşlığa önəm verdi. Azərbaycan hökuməti yaxşı imic formalaşdırmaq üçün lobbi şirkətlərilə yaxından əməkdaşlıq edir. Prezidentin xanımı Mehriban Əliyevanın rəhbərlik etdiyi Heydər Əliyev Fondu dünyanın müxtəlif ölkələrində milyonlarla pul xərcləyərək sərgilər və digər mədəni tədbirlər keçirir. Almaniyada bəzi şirkətlər Azərbaycan hakimiyyətinin yaxşı imicdə təqdim olunması üçün lobbi işləri aparır". "Təşkilati işləri hakim ailənin şirkətləri həyata keçirir”
"Ştern” yazır ki, lobbi işinə sərf olunan pullara baxmayaraq, Azərbaycan hakimiyyətinə yönəlik tənqidlər dayanmır: "Xüsusilə də Almaniya bu Qafqaz ölkəsində baş verənləri diqqətdə saxlayır. Almaniya Xarici Işlər Nazirliyinin Azərbaycanda repressiv hakimiyyətin hökm sürməsinə dair açıqlamasını hüquq-müdafiə təşkilatları tez-tez təkrarlayır. Almaniyanın insan hüquqları üzrə Ombudsmanı Markus Löninq bu ölkədə azad sözə və insan haqlarına qarşı hücumların dayandırılmasını israrla tələb edir. Bundan başqa, Bundestaqın üzvü Kristofer Ştrasser də Azərbaycan hökumətinin ünvanına sərt tənqidlər səsləndirir. Artıq 3 ildir ki, o, Avropa Şurasının Azərbaycanda siyasi məhbuslar üzrə məruzəçisidir. Indiyə qədər o, dörd dəfə Azərbaycana getmək istəsə də, buna imkan verilməyib”. Almaniya jurnalı Azərbaycanın "Eurovision” musiqi yarışmasına hazırlığına da toxunub. Jurnal yazır ki, yarışma ilə bağlı təşkilati işlərə dövlət başçısının xanımı Mehriban Əliyeva rəhbərlik edir. Konsert zalının tikintisi, yeni parkların salınması, küçələrin təmir olunmasını həyata keçirən şirkət və firmaların isə hakim ailənin nəzarətində olduğuna dair iddialar yayılıb. Məqalədə araşdırmaçı jurnalist Xədicə Ismayıla qarşı təzyiqlərdən də bəhs olunur. Bildirilir ki, Xədicə Ismayıl hakim ailənin biznesini araşdırdığına görə şantaja məruz qalıb. O, araşdırmalarını davam etdirdikdən sonra isə şəxsi həyatıyla bağlı görüntülər yayılıb (Tərcümə Azadlıq Qəzetinindir).
