 Miəllim:
Jıqo zındəm, həmmə konım səroste:
Məktəbədə, kədə vıjorım heste.
Həm hukməto, həm əğliku pul bəstem;
Pidəşe lap şoqirdım manqurt bıbu!
Fərğış çiçe, dıroz bıbu, kırt bıbu,
Əsas əve, bo milləti xırd bıbu.
Kofir:
Nə Xıdo zındəm, nə imom, peyğombər,
Nə nomoj votdəm, nə rujəm sərbəsər.
Şəytonən mıku bə dode, əlhəzər!
Bəvdə bə dıl xof dəbəşe, mard bıbu.
Fərğış çiçe, dıroz bıbu, kırt bıbu,
Əsas əve, bo milləti xırd bıbu.
Vəyəvon:
Da cur xorək mizon səpe ləjəne,
Raxsbıkəyon veyni ərəğ bıjəne.
Co karde beydəni merde, ya jene;
Kam mandedə, bəq ləğə ji hırd bıbu.
Fərğış çiçe, dıroz bıbu, kırt bıbu,
Əsas əve, bo milləti xırd bıbu.
Məmur:
İ ruj nıbo dərəmudım, şıl bəbem,
Rışvə nıstənom, dıli səm hıl bəbe.
Yolon vədə dandononım kıl bəbe;
Bə çəvon kə bəpe bardı-vard bıbu.
Fərğış çiçe, dıroz bıbu, kırt bıbu,
Əsas əve, bo milləti xırd bıbu.
Vıjorə moynə:
Ruj obeku vıjorədə qardedəm,
Çiyo-çəyo qonə şələ bardedəm.
Şanqo bedə, con dəjedə, mardedəm:
Bə həsrətim, kədə qıləy merd bıbu...
Fərğış çiçe, dıroz bıbu, kırt bıbu,
Əsas əve, bo milləti xırd bıbu.
Məllo:
Qəvım, çəşım vi be, dastım vi nıbe.
Panə luzım i kərə təyli nıbe,
Çı ehsono bə ehson şim, si nıbe;
Bə osmonən bəşem, əyo hard bıbu...
Fərğış çiçe, dıroz bıbu, kırt bıbu,
Əsas əve, bo milləti xırd bıbu.
Mərsiyəhand:
Yasə məclisdə bə nome səlovət,
Jenon bə dast vardə dome səlovət.
Xıdo, peyğombər, imome səlovət!
Ğoym bıvotən, behiştiro pard bıbu.
Fərğış çiçe, dıroz bıbu, kırt bıbu,
Əsas əve, bo milləti xırd bıbu.
2011.10.11, Mədo, Masallu
|
