 ABŞ-ın bu günə qədər Azərbaycana təyin etdiyi 8 səfirdən 5-i rəsmi Vaşinqtonun enerji və iqtisadi məsələlər üzrə yüksək çinli məmurları olub. Eyni halda ABŞ Azərbaycan müstəqil olandan bu günə qədər ölkəmizə qarşı daima enerji maraqlarından çıxış edib. Lakin demokratiya və insan haqları sahəsində ölkəmizdə bu günə kimi kifayət qədər problemlərin olmasına baxmayaraq, rəsmi Vaşinqton islahatların həyata keçirilməsi ilə bağlı hər hansı bir addım atmayıb.
FaktXeber.com-un verdiyi "baş verənlərə görə demək olarmı ki, ABŞ Azərbaycana yanacaqdoldurma məntəqəsi kimi baxır”,-sualını cavablandıran Yaşıllar Partiyasının həmsədri Mayis Güləliyev maraqlı fikirlər səsləndirdi. Ekspert qeyd etdi ki, ABŞ Azərbaycanda insan haqlarının pozulmasına görə, hər hansı məsuliyyət daşımır: "Eyni halda ölkədəki islahatları ABŞ aparmamalıdır. İslahatlar Azərbaycan hökuməti tərəfindən həyata keçirilməlidir. Bu proseslər üçün Azərbaycan cəmiyyəti və siyasi partiyalar hökumətə təsir göstərməlidir. Azərbaycandakı vətəndaşların həm təhlükəsizliyinə və həm də ki, haqlarının qorunmasına görə bir başa hakimiyyət məsuliyyət daşıyır. Ölkədə hər hansı bir dəyişiklik üçün hakimiyyət və Azərbaycan vətəndaşları maraqlı olmalıdırlar.”
Rəsmi Vaşinqtonun öz vətəndaşlarının və ABŞ-dakı hakim zümrənin qorunması üçün mümkün addımlar atdığını qeyd edən Mais bəy, "həm Milli Təhlükəsizlik Konsepsiyası, həm enerji siyasəti, həm də ki, dünya və Azərbaycan üzrə ABŞ-ın xarici siyasətində bir başa öz vətəndaşlarının maraqları durur”,-deyə bildirdi: "Birbaşa olaraq bütün baş verənlərin hamısının mahiyyətində ABŞ-ın maraqları dayanır. Digər ölkələrin maraqlarının qorunması məsələsini ABŞ siyasətində axtarmaq sadəcə olaraq sadəlövhlükdür. Çox təəssüf ki, Azərbaycan siyasilərinin və politoloqlarının əksəriyyəti həmişə ABŞ maraqlarının qorunmasına dair fikirlər səsləndirirlər. Praktiki olaraq həmin siyasilər və politoloqlar ABŞ maraqlarının Azərbaycanda təmin olunmasını dəstəkləyirlər.”
Partiya həmsədri onu da qeyd etdi ki, bu cür dəstək ən azı axmaqlıqdır: "Aydın məsələdir ki, rəsmi Vaşinqton öz maraqlarını qorumaq üçün lazım olan bütün addımları atacaq. Hətta lazım olsa belə silahdan, atom bombasından istifadə edəcək. Necə ki, bu günə qədər Yaponiyaya və digər ölkələrə qarşı istifadə edib. Yəni bu ABŞ-ın maraqlarına aid olan bir məsələdir.”
Ziyalıların, siyasilərin və QHT-lərin mövqelərinin Azərbaycanın maraqlarına xidmət etməli olduğunu bildirən ekspert, bu maraqlar içərisində ilk öncə Azərbaycan vətəndaşlarının təhlükəsizlik məsələsi durduğunu vurğuladı: "Təhlükəsizlik deyiləndə vətəndaşların həm fiziki, həm mənəvi, həm də ki, bioloji təhlükəsizliyi nəzərə alınmalıdır. Eyni halda bu təhlükəsizliklər xırdalanılaraq enerji, ekoloji, təhsil, dini və s. kimi hissələrə bölünməlidir. ABŞ-Azərbaycan əlaqələrinə münasibət bildirərkən ilk öncə ölkənin və vətəndaşların maraqları nəzərə alınmalıdır."
Təyin edilən səfirlərin yalnız enerji məsələləri üzrə müşavir və ya yüksək rəsmi olması məsələsinə də münasibət bildirən Mais Güləliyev, bunları bildirdi: "Enerji məsələləri ABŞ-ın üçün Azərbaycanda prioritet məsələlərdən biridir. Yəni ABŞ Azərbaycanda demokratiya axtarmır və axtarmayacaq. Onlar demokratiya axtarmadığına görə yox, demokratiyanı bəhanə gətirərək ikiüzlülük etdiyinə görə tənqid olunmalıdır. Əgər desələr ki, biz Azərbaycanda hər hansı bir demokratiya axtarmırıq və əcəbdə edirik. Onda bu təbii qəbul olunaraq uyğun mübarizə aparılmalıdır.”
Partiya rəsmisi onu da bildirdi ki, ABŞ ölkədə insanları kütləşdirmək üçün müxtəlif variantlar axtarır: "Rəsmi Vaşinqton Azərbaycandan enerjini daşıyıb aparmaq və gələcəkdə Orta Asiya enerjisini Azərbaycan dəhlizi vasitəsilə xaricə çıxarmaq istəyir. Bu variantlar isə tələb edir ki, ölkədə demokratiya qurulmasın və Azərbaycan, Ermənistan və Gürcüstan kimi ölkələri müstəqillik eyforiyası ilə aldadaraq bu ölkələri demokratiya oyununa salınsın. Eyni halda rəsmi Vaşinqtonun əsl istəyi budur ki, əhalinin savadsızlığından istifadə edərək böyük bir mənfəətlə öz transmilli koorporasiyalarını regionda yerləşdirsin.”
Sonda özümüzün müqavimət gücümüzün formalaşdırılmasının lazım olduğunu qeyd edən partiya həmsədri, "ABŞ-ın cəmiyyəti pis vəziyyət salmaq və təzyiq vasitəsi kimi istifadə etdiyi siyasətdən öz xeyrimizə istifadə olunmalıdır”,-deyə bildirdi: "Müqavimət nəticəsində qarşı tərəfi məcbur etməliyik ki, bizim xeyrimizə olan siyasəti həyata keçirsin.”
faktxeber.com
|
