 REÇİN
Reçin, hejo dəvardedəş,
Çəmə kuçə qardışiku.
Nozə kardəş, vəşedəm az,
Dast bıkəş çı vərdışiku.
Pidə bətı erəxım az,
Vəşe-vəşe orəxom az,
Oxo çoknə bırəxom az,
Iştı çəşi otəşiku?
Nozə məkə bomı həni,
Nomı beşə demı həni.
Reçın, bıbi çımı həni,
Oxo, mardim dard kəşeku.
BOŞTI ÇƏŞON
Şanqo nıhıtomən dılə dojonku,
Bıznəmon dıyo to dardım kəşəme.
Iştı lıputonku, ıştı çəşonku,
İjən ləzzət bədo dardi peşome.
Az boştı çəşono noxəşim oxo,
Az boştı çəşono şeir nıvışdəm.
Iştı votəyonku, boştəyo jıqo,
Iştəni botıno hədərə kışdəm?
Tı çoko novındəş ə sığə dıli?
Hejo dəvardedəş mıku,
İ lısqə omdəni bomı bəboli,
Oxo jıqo nəbe, diovojə kinə.
İjən dardi bıdə ıştə çəşiku,
Oxo, zınedəş ki, şine bomıno.
Az tıni, az tıni vində rujiku,
Dardiku co nəve qone bomıno.
Şanqo nıhıtomən dıli dojonku,
Bıznəmon dınyo to dardım kəşəme.
Iştı lıputonku, ıştı çəşonku,
İjən ləzzət bədo dardi peşome.
IŞTI QƏDƏ DILİ
Iştı qədə dıli bədızdem i şəv,
Iştı qədə dıli baham, şin-şini.
Tı çımı i vənqo onıbə sırriş,
Tı çımı i çanqə şinə ruşini.
Az bənəy, voşədə tar bə vənəşə,
Iştı məhəbbətdə liskə bəm oxo!
Bənəy pəpıruzi orəxəm, sutəm,
Işət i mutə bəm, lısqə bəm oxo!
Bomı nozə məkə, zıvon beməkə,
Mıni sute-sute oməqət jıqo.
Az bənəy yətimə astovə ruşnə,
Iştı çəşonədə pepuşyəm, kinə!
Tı jıqo məzın ki, hələ əğılim,
Tıku ıştə hayfi bebəşem, kinə!
Iştı qədə dıli bədızdem i şəv,
Iştı qədə dıli baham, şin-şini.
NİBƏBE
Xıdoən jıqo piənişe,
Bəs çımı ko çoknə bəbe?
Votdəm, tıni bıvitvonom,
Çəğın votdəm, çok nibəbe.
Kırdi jəydəm, sığən siydə,
Çımı sıli rəğən siydə.
Tıni vindəm--fəxəm siydə,
Eh, bı dardi şək nibəbe!
Çoko bətı az mot nıbum?
Co bınəvoj--hiç pərt nıbum?
Məvot ki, məhəbbət nıbu
Bəvdə yolı-ruk nibəbe...
"Tolışon Sədo” rüjnomə nöm: 01(13)
07 yanvar 2011
|
