 "Narkootdel”də Hilal Məmmədova deyiblər ki, sənin kimi çox jurnalist və hüquq müdafiəçisi burada "tərbiyələndirilib”
"Tolışi sədo” qəzetinin baş redaktoru, şərlənərək həbs edilən Kürdəxanı təcridxanasından "Azadlıq”a məktub yollayıb. Hilal Məmmədov məktubda necə həbs olunması ilə bağlı dəhşətli faktlar açıqlayıb. Məktubu oxucuların diqqətinə çatdırırıq:
ardı
Yırtıcı oğul və ondan nigaran olan ana
"Mənə tamamilə aydın oldu ki, bu quldurlar ağalarının sifarişlərinin yerinə yetirən ”nayomniklər"dir. Məni Narkotiklərlə Mübarizə Idarəsində özlərinin 1-ci mərtəbədə yığışdığı 6-7 nəfərlik otaqda saxladılar. Bu otaq güman ki, işgəncə üçün nəzərdə tutulmuş bir yer idi. Burada hərəsi öz stolunun arxasına keçdi və ayaqlarını stolun üsynə qoyub mənimlə psixoloji müharibəyə keçdilər. Xüsusi qəddarlığı ilə seçilən və məni ən çox döyən gənc kompüter arxasına keçib oyun oynayırdı. Hiss edirdim ki, hədsiz əsəbi hisslər keçirirdi. Barmaqlarının əsdiyini gördürürdüm. Onun mobil telefonuna zəng gəldi. Və o, telefonu açaraq "Narahat olma ana, hər şey yaxşıdır, yemişəm darıxma” deyəndə bu gəncin heç də robot olmadığını anladım.
Bir az öncə mənə "sənin kimi çox jurnalist və huquq mudafiəçiləri bizim bu otaqda ”tərbiyələndirilib" adam olub" deyəndə ondan soruşmuşdum ki, elə bir gün olub ki, insanları bu qədər döyüb-söyməkdən, sındırmaqdan vicdanın sənə əzab verib? Onun cavabı isə belə olmuşdu: "Olarmı bu suala cavab verməyim”. Onda vicdan hissi tamam ölməmişdi. Fürsətdən istifadə edib, digərlərinin də vicdan hissini oyatmağa çalışırdım.
Cibimə qoyduqları 5 qram narkotika ilə bağlı ifadələrim "yuxarıdakıları” qane etməmişdi. Ona görə də polislər jiletlərini geyinib evimizə yollandılar. Yol gedərkən isə aramızda belə bir dialoq yarandı:
- Hilal, evində nə qədər narkotika var?
- 2 ton.
- Onda gərək "KaMAZ” aparaq, onları daşımağa.
- Sizin narkotika daşıyan "KaMAZ”larınız çoxdur.
Onlar eyni zamanda yol boyu açıq-saçıq geyinən qızlara pozğun atmacalar atırdılar. Ürəyimdə dedim: "Yetişdirdiyi bu cür ”adamyeyənlərə" arxalananan hakimiyyət, sabah elə onların əli ilə devriləcəyini kaş biləydi".
And olsun balamın canına ki, bunu mən etməmişəm
Məni əvvəlcə 25-ci polis bölməsinə gətirdilər. Orada məni "Tı kto takoy, davay do svidaniya” meyxanasının qəhrəmanı kimi qarşıladılar. Hamının hər şeydən xəbəri var idi. Orada tələsik 10-15 polis də bu 6-7 nəfərə qoşulub evimizə gəldilər. Evdə qohum-əqraba ilə kobud rəftar edib onları bir otağa yığdılar. Yataq otağında cibimə atdıqları o ikinci "bağlamanı” çıxaranda mən o "qəhrəman”a dedim ki, ey namərd mən elə bildim ki, vicdanın tərpənib, bunu daha etməzsən. O isə "And olsun balamın canına ki, bunu mən etməmişəm” deyəndə bildirdim ki, fərqi yoxdur, kim bunu edibsə, əlləri qurusun. Evdə formal bir protokol tərtib etdilər. Təbii ki, mən paketin mənə məxsus olmadığını və hakimiyyət tərəfindən bir provokasiya olduğunu rəsmən qeyd etdim. Mənim üçün ayrılmış müstəntiq (həmin yalançı hal şahidlərinin iştirakı ilə) protokol tərtib edib evi tərk etdik.
Çöldə məni gözləyən şagirdlərim və qohumlarım göz yaşlarıni saxlaya bilmirdilər. Tələbələrim isə "biz səninlə fəxr edirik müəllim” deyərək mənə dəstəklərini ifadə etdilər. Evimizdən ayrılan zaman ürəyimdə fikirləşirdim ki, ya rəbb, yəni bu zülmün bir sonu olmayacaq?
Birdən həmin zülümkar gənc əlini çiynimə vurub "Hilal, nəhayət ki, nifrətin nə olduğunu anladın. Demək sən də dəyişəcəksən sabah” dedi.
Bu zülümkarlar hardan biləydilər ki, mənim qəlbimdən kin- küdurət, həsəd, riyakarlıq, təkəbbür və s. bu kimi mənfi xüsusiyyətləri Allah çoxdan silib. Ölkənin bir daha nə qədər mənən bərbad gündə olduğunu daha aydın dərk elədim. Birdən o gənc gülümsəyərək mənə "bəlkə bu ölkəni sən düzəldəcəksən, Allah bilən məsləhətdir, bizi də adam edəcəksən” dedi.
Biz dəyişən deyilik, sən ailəni fikirləş
Məni yenidən 25-ci bölməyə gətirdilər. Orada hamı bir-bir mənimlə görüşüb, xüdahafizləşdi. Hətta biri bağrına da basdı. Mən isə onlara "fikir etməyin, gec-tez düzələcək bu ölkə, siz də adam olacaqsız” dedim.
Mənim işimə baxan müstəntiq çox mədəni adam idi. Özü də böyük bir cinayətin aləti olduğunu dərk edirdi. Bəzi sənədləri və mənim izahatlarımı nəzərdən keçirib qeydiyyat apardıqdan sonra dilləndi: "Hilal, gəl bir yaxşılıq edim sənə, get ekspertizadan keç”. O görürdü ki, ayağıma və bədənimə dəyən zərbələrdən əziyyət çəkirəm. Dedim ki, nə faydası var, yəqin, ekspertiza rəy verəcək ki, hər şey öz qaydasındadır.
Amma müstəntiq inad etdi və ekspertizadan keçmək üçün "Azərsutikinti”nin xəstəxanasına yollandıq. Elə bil bütün həkim kollektivi "Tı kto takoy, davay do svidaniya” oxuyurdu. Bədənimdə olan xəsarət izlərini qeyd etdilər və biz yenidən bölməyə qayıtdıq. Artıq axşam idi. 70-80 səhifəlik "cinayət işi” hazır idi. Məni Xətai rayonundakı müvəqqəti saxlama təcridxanasına aparanda müstənqin qəmli-qəmli mənə baxdığını görəndə dedim: "Darıxma, belə getməz, dəyişəcək bu ölkə” dedim. Eyni sözləri məni təcridxanaya aparan polisə dedim. O isə cavab verdi ki, biz dəyişən deyilik, sən ailəni fikirləş.
Iki gün Xətaidəki təcridxanada qaldım. Oranın rəisi də mənə "məsləhət” verdi ki, mübarizənin heç bir xeyri yoxdur, "yuxarı”ya namə yaz ki, bir qələtdi eləmişəm. Təbii ki, bu "məsləhəti” qəbul etmədim.
Oradan isə məni Şüvəlandakı təcridxanaya gətirdilər. Insafən, orada da məni yaxşı qarşıladılar və "Titanik”də ən yaxşı kameranı mənə verdilər. Bütün təcridxana başıma gələnlərdən xəbərdar idi və mənə ürək-dirək verirdilər ki, belə getməz, haqq-ədalət öz yerini tutar və sən də azad olarsan...
İki arvadın varsa ETTELAAT-a işləyirsən
Iyunun 30-da Nizami rayon prokurluğundan yanıma bir müstəntiq gəldi. O mənə verilən işgəncə ilə bağlı prokurorluğa etdiyim şikayət əsasında gəlmişdi. Izahatımı aldı. Halıma acıyaraq "belə getməz” dedi. Mən isə cavab verdim ki, inanmıram, Nizami rayon məhkəməsi bu faktla bağlı cinayət işi başlanmasına qərar versin, axı mənim həbsim, döyülməyim sifarişdir. Müstəntiq dərindən ah çəkib "belə getməz..., açıq-aşkar ayağındakı zədələr görünür və bu barədə ekspertiza da var... Tələsmə... Səbr et...”.
O doğrudan da müsbət bir dəyişikliyin arzusunda idi. Amma nə biləydi ki, iyulun 3-də bu "narkotika” oyunları azmış kimi daha iki maddə - vətənə xəyanət və milli-dini ayrı-seçkilik maddələri üzərimə qoyulacaq. Sən demə mən Iranın "Səhər” kanalına müsahibə verməklə Azərbaycan dövlətinin imicinə zərbə vurmuşam. Sən demə mən, 1992-ci ildən bəri Iranda bəzi talış ziyalıları ilə görüşmüşəm ki, onlar da ETTELLAT-ın üzvləri imiş və məndən Azərbaycanın əleyhinə məlumatlar alırlarmış. Xülasə son dövrlərə qədər hüquqlarını müdafiə etdiyim rəhmətlik Novruzəli Məmmədovun işi ilə bağlı 4 saat MTN-də, 2 saat isə onun məhkəməsində dindirilmiş və oradakı bütün sualları müfəssəl cavablandırmışam.
Yeri gəlmişkən, məhkəmədə Novruzəli müəllimin üzünə dayanan Elmandan soruşanda ki, Əli Əbdolinin ETTELLAT-ın nümayəndəsi olduğunu hardan bilirsən? O cavam vermişdi ki, iki arvadı var!? Mən də ona demişdim ki, onda belə çıxır ki, kimin 4 arvadı var, 4 ölkəyə işləyir?! Bu cavabım bütün məhkəmənin gülüşünə səbəb olmuşdu...
ardı var |
