 Yusifi İlqar Ramazani zoə (İlqar Miyonkuj) moədə bıə 1976-nə sori yanvari 25-də Masali rayoni Miyonku diyədə. Miyonku miyonə (tam) məktəb oroxniyəşe 1993- sori. Xeyzonxıvande, hestışe 2 zoə. Şer nıvıştedə 7-8 siniku. İminə kərə dərc bedə İlqari şeeron. Xıdo nığo bıdo bəçəy təbi.
ÇƏMƏ BANDON
Jıqo-jəqo kam tı bışi,
Bə çəmə məhol, boy beşi,
Dıroz bıkə ıştə kəşi,
Bıçın pidə kom ləl-qılon,
Boy tı bıvind çəmə bandon.
Tıtım, ambu, ser, syotorə,
Əno, viz, sef, hındəmorə,
Ji pidəbu sa şest sorə
Iyo dəvon ıştə rujon,
Boy tı bıvind çəmə bandon.
Doon sə rəsdə bə osmoni,
Ha rəğədə çanə honi,
Ki piedəşe ıştə coni
Bıdə bəhəy noz-neməton,
Boy tı bıvind çəmə bandon.
Ruy ovonış "abi-zəmzəm”
Çe vəyşti bu çəyku səydəm,
Rujbərujon cıvon beydəm,
Həvosətış coni dəmon,
Boy tı bıvind çəmə bandon.
Bıməs, çiçon hestin hələ,
Bəlləbur de Şindon ğələ,
Çe anburi hay kandulə
Nyo kardedə çandə sırron,
Boy tı bıvind çəmə bandon.
Çəmə xəlği nom detıye,
Tı de xəlğiş, xəlğ ıştıye.
Ki diyəroy, ki betıye,
Ijən detı jiedə har con,
Çəmə bandon, çəmə bandon!
BƏŞMƏ ZOMO BIƏ RUJİKU
Xok bə çımı ağıli sə,
Bə conim dəşə vəsvəsə,
Şinə umri oxo rəsə,
Bəşmə zomo bıə rujiku.
Orəxə-şə çokə rujon,
Beşin bə dim coni dojon,
Bə şəv – bə ruj məsdəm dımjon,
Bəşmə zomo bıə rujiku.
Çəş vindəni oxnə vaxton,
Quşon nosaz, məsedəm qon,
Kəçəl bəm, emedə muyon,
Bəşmə zomo bıə rujiku.
Nə xəy mandə, nə bərəkət,
Nə hol mandə, nə hərəkət,
Çımı ha ruj bıə mısibət,
Bəşmə zomo bıə rujiku.
Jen əğəye, azən nokə,
Pıt-pıtiku dılım təkə.
İlqar, vəse, həni səkə,
Dıl pandomə vot-vıjiku,
Bəşmə zomo bıə rujiku.
AMUZOƏ
Vicdon təmiz, namusı ıştı poke,
Bo ıştəni, bo ha kəsi vey coke,
Toykiyə şəvon bənə vəşə ço təki.
Nomış otəş, beayb, bənə ovi zoə,
Dılım detı vıl okardə amuzoə.
Bənə Həşi vəşedəş osmonədə,
Niyo beydə ovşum tını vindeədə .
Hejo barziş çe avlodon dılədə,
Pı-moə detı fəxır kardə qidi zoə,
Dılım detı vıl okardə amuzoə.
Çiç kardedəş bəyo əvəz pidəni,
Nəfsı ıştı həromi nez haşdəni.
Həxədə bə nohəxi po doydəni,
Həx detıye, tı de həxiş, çokə zoə,
Dılım detı vıl okardə amuzoə.
Iştə coni bətı ğıbon az bədom,
Fikim karde, coke şeer bıvotom:
Bıdə bıji həzo soron ıştı nom:
Handəkəson bızının kiey jıqo zoə:
Dılım detı vıl okardə amuzoə.
FƏSLİ-POZ
Avə qırdbıə osmono,
Həşi bəmə kardə noz.
Voş voydə, vo qınedə,
Omə-beşə fəsli-poz.
Emedə çe don livə,
Ha tərəf bıə quculi.
Bəştə lonə qırd bedən
Melı-məvuş təcili.
Boğono ləlqıl rəsə,
Zard bedə bif, ambu, sef.
Qəvədə əv o bedə,
Hardəkəsi doydə kef.
Qırdə bedən pərəndon,
Pəredən dastə-dastə.
Şedən bə tatə vıron,
Bomen vavaz bəpeştə.
Doydə limo-mandərin,
Boğədə zardi-zardi.
Ləlqıl qoni kardedə
Elaşkən bənə sırdi.
İm çe cur mocuzəye?
Doədə çəkedə əno.
Bəhə pidəşe bəhəy,
Sı kardə qəvi kəno.
Hay bəvon i ranq jəydə
Zəmin, osmon, həvo, boz.
Ha tərəf tulı-horə,
Jıqo bedə fəsli- poz.
MOA
Har kəsi dıl pure de məhəbbəti,
İnə har sıxano səydə ğıvvəti.
Şəvı-ruj mandedə bə çəmə ğayğu:
Çəmə roədə sipi kardedə səy mu.
Haştəni avlodon bıkəşon xıvət,
Hejo bə dıvoye, doydə nəsihət.
Bəçəy hay umuji heste eytiyoc,
Mavuji vəyştədəş kardeyədə ğoç.
Bə kovrə eğando əğıl ıştə ro,
Bızın bəy kardedə koməq moa dıvo.
Zıvon, Vətən moaye, moa zıvon Vətən,
Hərome çəy doə nun, əy yodo bekən.
NOMOJ VOTEDƏŞ
Diyəro beydə şərə konku ıştı nom,
Sıxanı doə, həni əhəniş hərom.
Xıdo dindo bəndə bəbeş, bəseş kom,
Xıdo roədəş, dini əməl kardedəş,
Bə həx oməş, həni nomoj votedəş!
Ağıl oməş, ko qətdəniş hədərə,
Mıhi səjdə şedəş ruji çan kərə,
Yasin, Ğıron, kəlom handəş "əzbərə”
Dumə məlon, şeyx-axundon fırsedəş,
Bə həx oməş, həni nomoj votedəş!
Vəse anə qətəbe nohəxə kon,
Con bebəlo, oməş esə bə imon,
Zikir kardəş donzə imomi nomon,
Bənə məlo şələ riş oğətedəş,
Bə həx oməş, həni nomoj votedəş!
Şedəş məşhəd, bə Hac ijən Kərbəlo,
Xıdo oğəto tıni çe har bəlo.
Məsəkəson bıjənon har ton səlo:
Bo har kəsi dini təblığ kardedəş,
Bə həx oməş, həni nomoj votedəş!
Piyan əbiş, iyo-əyo əqıniş,
Jimoniku si coni tı oqıniş,
İ ruj bə şəv bə Şəytoni peqıniş,
Bəsə dəşiş: de nohəxə roy şedəş,
Bə həx oməş, həni nomoj votedəş!
Sədə kılo, dastədə yusur təsbi,
Bı nezeno məlo bıbuş tı ğasbi.
Saru-sape bətojneş ıştə asbi,
Zərofət ni, mıhisə təvil noydəş,
Bə həx oməş, həni nomoj votedəş!
MİYONKU VİŞON
Çe ğəşənqe, çe reçin, çəmə bandon de vişon,
Çısə-bəsə havzəcon ruşnə doydən bə çəşon.
Bo har dardi dəmonin iyo bemə aləfon,
Vəşti vinde piyəkəs, boy bə Miyonku vişon!
Həzo sor tarıx hıtə, har sıği bındə iyo,
Şah İsmayıl Xətai, Babək dəvardə çiyo.
Çəmə "Ğələ” sıbute, vey daveşon bıə iyo,
Tarıx vinde piyəkəs, boy bə Miyonku vişon!
"Siyo honi” de "Quni” zər-zinət doydə bətı,
"Tıbə rəğ”, "çıl ğəzon ğəb” i sinədəye detı.
Çəmə simvol "amburdo” iyo okardə qıtı,
Ambur vinde piyəkəs, boy bə Miyonku vişon!
Ser, siyoqılə de ambu, hardəkəs hardeş pidə,
"Sutə qulon”də mandəş həmmə ço tərəf çidə.
Peşom honi biyə ovi, odəmi dandon sidə,
Coni rohət piyəkəs, boy bə Miyonku vişon!
Bə çand dardi dəmone: ser, hındəmo, vəjələ,
İyo şoə xəbə doydə şonəpəppu, kəjələ.
Kom dəmonədə pidə, qırdə bıkə i şələ.
Dardi dəmon piyəkəs, boy bə Miyonku vişon!
Kulə bındə vənəşon şo kardedən odəmi,
İyo yodo bekardəş ıştə har dardi- ğəmi.
İyo harçi hardedəş, doydə çe vəşti təmi.
Xəşə coni piyəkəs, boy bə Miyonku vişon!
Doon dılədə kandımuz,qırdə kardə anqivin,
Maştə-maştə hardedəş,qəvi, xuni kardə şin.
Qəv pure de ləzzəti, çəşonən bedən ruşin.
Umri diroz piyəkəs, boy bə Miyonku vişon!
Bınışt "Qamov” ovədə dəjedəbu ıştı con.
Təzyiqı bə pentone? Şinqilə çay çəy dəmon!
Bızəriş de qəzənə koon bənoy bə səhmon,
Mocuz vinde piyəkəs, boy bə Miyonku vişon!
VALLAH, HANDEM PİDƏNİ
Deştə curon i kərə qırdə bimon bə ivrə,
Votımone: boy bimi bıkəmon iqlə çarə.
Bə məktəb şe-oməku nınqonımon be yarə.
Iştə dardi votedəm, hiç kəs çarə kardəni.
Dast bıkəşən çımıku, vallah, handem pidəni.
Deştə curon i kərə qırdə bimon bə ivrə,
Votımone: boy bimi bıkəmon iqlə çarə.
Bə məktəb şe-oməku nınqonımon be yarə.
Iştə dardi votedəm, hiç kəs çarə kardəni.
Dast bıkəşən çımıku, vallah, handem pidəni.
Boçi devlət-hukumət bıkəşi ım əzyəti?
Bənə mı dərs nəhandı omə əncəx ləhnəti.
Bənə mı son lozim ni bə çəmə cəmiyəti,
Çımı hande-nıhande hiç kəsi marağdə ni,
Dast bıkəşən çımıku, vallah, handem pidəni.
Dıqlə həy cəvi bıdoş , əy baxş karde dılım ni.
Kilo, metrə, sot, hektar- jıqo çiyon meylım ni.
Penci səpe pencən boy, əy həll karde holım ni.
Çe həndəsə, fizikə, bəmı ləzət doydəni;
Dast bıkəşən çımıku, vallah, handem pidəni.
Xəbə səydən çımıku: Ki nıvıştəşe "Xəmsə”?
Jıqo çiyon çı bəzne bənə mı bə xok bəsə?
Xəbə bıstən çımıku: Kon qılə kinə ki sə?
Dərsi sıxani məkə,səm çəyku beşedəni;
Dast bıkəşən çımıku, vallah, handem pidəni.
Bıdə bəmı i hektar sahə, həmmə bıromom,
Çe vişədə da metrə ruji ezım bıkırnom,
Bıdə çand dastə mol-pəs, az əvoni bıçovnom,
Əmma dərs-məktəb məvot, bəçımı sə dəşdəni,
Dast bıkəşən çımıku, vallah, handem pidəni.
|
