 Açıq fikir
Yaxud müxalifət partiyalarının rayon şöbələrinin sədrləri ümumrespublika mitinqlərində hansı sayda üzvləri ilə öndə gedəcəklər?
"Hər şeyi öz adı ilə demək lazımdır”- belə buyurublar bizdən öncələr.
Bu yazının "linqinə” tam aydınlıq gətirmək heç də müxalifət partiyalarını indiki durumda tənqid etmək deyil, ancaq reallıqdan söz açaraq, Allahın buyurduğu: "Düz danışın, haqqı bilə-bilə batil etməyin!” müqəddəs kəlama istinadən öz şəxsi mülahizələrimi əziz oxucularımla bölüşmək qərarımla bağlıdır.
Respublikanın digər rayonlarına deyil, nümunə olaraq təkcə AXCP Masallı rayon şöbəsinə nəzər salanda görürük ki, YAP (Yalançı Azərbaycan Partiyasın)-dan fərqli olaraq bu şöbənin təmsilçiləri, məclis sədri (Şərq dövlətlərinin başçıları sayağı) uzun illərdir ki, guya müxalifəçidirlər (Əslində heç bir fəaliyyətləri yoxdur). YAP hakimiyyəti qamarlayandan sonra, xalqın müxalifəti təmsil edən zümrəsinin bir çoxu əqidələrinin bazarlığına üstünlük verdilər. Fakt olaraq onu deyə bilərəm ki, 2003-cü il Prezident seçkilərində Yardımlı-Masallı seçki dairəsinin 73-74 saylı məntəqəsində müşahidəşi qismində, mən AXCP-nin, İmaməli Salayev isə ADP-nin təmsilçisi idi. Mənə 500 dollar təklif etdilər ki, məntəqədən uzaqlaşım, lakin razılaşmadım. ADP təmsilçisi isə gözümün qabağında vicdanını 6 manat pula satdı. Sonrakı seçkilərdə həmin məntəqədə katib oldum, lakin heç bir protokola imza atmadım.
Bir qədər də geriyə - 1992-ci ilə qayıdaq. O vaxt AXC-dən Qarabağ müharibəsinə getdim, ancaq AXC rayon şöbəsi nə mənimlə, nə də ailəmlə maraqlanmadı. O dövrdən bu yana həmişə "mükafatım” təhdid, təhqir, həbslər olmuşdur.
Dövri mətbuat səhifələrində, saytlarda sözümü kəskin deməkdən çəkinməmişəm. Dost-tanışlarımın, demək olar ki, partiyalardan uzaqlaşaraq, bir çoxu da " bu ölkənin gələcəyi yoxdur”- deyib, öz ayaqları ilə Rusiyanın soyuq Sibirinə "sürgün oldular”. Sonradan partiyadaxili bir çox işlər oldu ki, talışlara qarşı biganəlik, laqeydlik AXC sıralarının boşalması ilə nəticələndi. Nə etməli? İqtidar belə, müxalifət ondan betər! Daha dərindən düşündükcə görürsən ki, mitinq elan edilir, orada 200-300-dən artıq adam olmur. Görəsən, bu müxalifət liderləri heç düşünürlərmi ki, bunun səbəbi nədir?
Xalq mənən əzilir, öldürülür, hər cür zülmə məruz qalır... Amma bununla belə müxalifətə inanmır, ona etibar etmir. Sual oluna bilər ki, o halda xalq necə azad yaşaya bilər? Hələ Qarabağı demirəm, sanki bütün Azərbaycan işğal altındadır.
Müxalifətin yürütdüyü siyasətə baxın: Cənub adlandırılan bölgənin rayon şöbələrində talış xalqının nümayəndələrini barmaqla saymaq olar. İnanmırsınızsa, 02.04.2011 tarixə elan olunmuş mitinqə İctimai Palatını təmsil edən rayon nümayəndələri siyahısına baxın: Masallıdan o mitinqdə neçəsi iştirak edəcək?
Əgər mənim partiya sədrim bu vaxta qədər bir talışı da özünə əqidə yoldaşı kimi təmsil etdiyi partiyaya üzv etməyibsə, çox müşkül məsələdir bu "Palata” söhbəti. Qətiyyətlə deyirəm ki, Azərbaycanda 23 aboragen xalq yaşayır, bunlardan sayına görə ikincisi talışlardır. Bu xalqları saya saymayan, tarixi arxivləri qıfıllayaraq, üstünə möhür vuran, istər iqtidar, istərsə də müxalifət istədiyinə nail ola bilməz.
Hər kəs bilməli və qəbul etməlidir ki, Azərbaycan adlanan məmləkət gözəl bir xalçadır, yuxarıda qeyd etdiyim xalqlar isə onu zinətləndirən naxışlardır. Onu da deyim ki, Azərbaycan xalqı bu iqtidarın işgəncələrindən artıq cana doyub, inqilab qaçılmazdır!
Lakin bir amması var! Bizim müxalifət liderlərinə baxın, desəm ki, M. Qəzzafidən də "beş çəmçə artıq” təkəbbürlüdürlər, heç yanılmaram. Bu zavallıların heç biri digərini bəyənmir, o ki qaldı xalqı!..
İctimai Palata barədə də bəzi fikirlər demək təkrarçılıq olmasın. Yenə öz fikrimdə qalıram ki, o yaradılan son qurumda hakimiyyətdən yağlı tikə, karyera, mandat ala bilməyən partiya sədrlərindən yox, sözümün əvvəlində qeyd etdiyim kimi, 23 azsaylı xalqın nümayəndələrindən ibarət əsi ziyalı insanlar təmsil olunmalıydı. Göründüyü kimi, İctimai Palatada təmsil olunanlar mitinqlərdə öndə deyil, vəzifəyə gələndə birinci olmaq iddiasındadırlar. Lap kobud desək, xalqı düşünən lider hələ yoxdur, məncə. Düşünürəm ki, yenə keçmiş zamanlarda olduğu kimi, dava yorğan davasıdır!
Mətləb DADAŞİ,
Azərbaycan Jurnalistlər Birliyinin üzvü,
xüsusi olaraq TALISH.ORG üçün
|
