Əssalamun -əleykum, ey Adəm övladları!

Ay canınıza daraşım, mən axı ötən əsrin sonunda demişdim Masallı rayonu arıq eşşəyin yaylağıdır. Bu rayona məlum regiondan rəhbər vəzifələrə transfer edilənlər arıq gəlir, “Köhnə bazar siyasilərinin“ mətbəxində yaxşıca yemləndikdən az sonra elə kökəlib əndazədən çıxırlar ki, “fiquraya “ düşmək üçün dieta saxlamaq da kömək etmir...

Əşşi nə başınızı ağrıdım, sabiq İHB-sı Ğəzi müəllim Kolatan kəndinə təbii qaz çəkməsi adı ilə RF-dan Kolatanlıların qaz çəkilişi məqsədiylə göndərdikləri 87 min ABŞ dolların həzm-mədarədən keçirtməsini, bələdiyyəçilərin gərgin “əməyi “ sayəsində qaz balonundan şlanqla məşəl yandırıb, Az.Tv-nin də üç dəfə Kolatan əhlinin firavan həyatını ölkəyə nümayiş etməsini yəqin ki, xatırlayırsınız.

Ay zavallılar !

Ğəzi müəllimi əvəz edən Rafil Hüseynovun ayaqları altında qurbanlıq qoyun kəsməyinizi başınıza qaxınc etmək fikrim yoxdur. Çünki o məsələ bir vicdan məsələsidir, o naqis işlə əlaqəli olan hər kəs ən azından Allahı qarşısında məsuldur.

Məni düşündürən məsələ budur ki, Kolatan kəndinə təbii qaz çəkilişi bitər-bitməz, heç kim o qazdan “bismillah “ etməmiş, qazçılar düşdülər qapı-qapı “qaz şirinliyi” yığmağa. Bu əməliyyat da bitər-bitməz, digər bir qrupun əlində SSRİ-dən qalma “qaz borcu” kitabı ilə hər evdən nə az, nə çox, 250-300 manat tələb edilir.

Bir yandan qeyd etdiyim səbəb, digər tərəfdən yaxınlaşmaqda olan “Deputatxanaya Millət vəkili“ seçilməsi, bu yandan da rayona doluşan ev oğrularının tüğyan edib at oynatması Kolatanlıların daralmaqda olan əsəblərini daha da tarıma çəkmişdir.

Rayonun bütün kəndlərində ev oğrularının açıqca “ fəaliyyəti “ hüquq-mühafizə orqanlarını az narahat etməsi bir çox məsələləri daha da qəlizləşdirir.

Düşündürücü budur: günün gunorta çağında Kolatanlıların evlərinin qarət edilməsi, qadınların zinət əşyalarının üstündən zorla alıb, polisin və kənd icra nümayəndəsinin gözündən cin kimi yox olması yüksək “peşəkarlıq”dır, yoxsa siyasi sifariş?.

Ən müəmmalı məsələ də budur ki, “Arıq eşşəyin yaylağı“ olan Masallıda, xüsusən Kolatanda peyda olan ev oğrularından rəsmi şikayətçi çox azdır.

Polislərin isə Kolatanda az qala komendant saatı tətbiq etməsi daha müəmmalı görünür...

Bu gün çayxana əhlindən eşidilirdi ki, guya molla İlham “kitaba baxıb” deyib ki, hakimiyyət çox təlatüm içindədir, seçki ərəfəsi partlamaqda olan ictimai vəziyyəti cilovlamaq üçün “Oğurluq“ şousu düşünülmüş bəhanədir. Hüquq-mühafizə orqanları əgər istəsə, çox qısa zamanda həmin oğruları zərərsizləşdirər. Görünən də budur ki, əhalini vahimədə saxlamaq hakimiyyətin marağındadır.

Lap sadə el dilində desək, əhalinin müzakirə mövzusu yalnız “qarət, oğurluq”dur. Yəni “ dirilər bizim, ölülər sizin“.

Ditdili PERO