Sədrəddin müəllim nəki yolə riyaziyat elmi alim, həmən ıştə ınə zıvoni, mədənyəti və tarıxi çok zınəy rüşonfikonko qıləy be. Çəy de Az Ari Spitüm ləqəbi "Tolışi Sədo”ədə dərc bə - "Avesta – dünya sivilizasiyasının beşiyi” ("Avesta- çı dınyo sivilizasiya qofe”) nominə silsilə elmi-fəlsəfi nıvıştəyon çı Tolışi tarıxi tədqiqi roədə ve ğıymətinə xıdmət iən ve yolə ərməğone.
2009-nə sori fevralədə "Tolışi Sədo” qəzeti sər-redaktor prof. Nəvuzəli Məmmədovi beqanunə həbs iən qəzeti nəşri damande bənə çəmə co rüşonfikon, bə Sədrəddin müəllimən xəyli bevəcə təsirış karde. Əfsus bıbo ki, i tono ım hadisə, i tonoən çəy coni nosozəti imkon nıdoşe ki əv ım ğıymətinə movzu dəvom bıkə... İjən jəqo, peştepüremon ki, Sədrəddin müəllimi arxivədə hələm ve dərcnıbə co materialonən hestin ki i ruj əvoniən bə çəmə handəkəson nəzə bərosnemon.
Sədrəddin müəllim 1958-nə sorədə Lankoni rəyoni Şəğləse diədə moəko bə. Iştə di məktəbi sə kardeko peş bə Boku Davlət Universiteti mexanikə-riyaziyyat fakultə dəşə və 1978-də əvrə səş kardeko peş 3 sor məkətəbə muəllimətiş kardə. 1981-1983-də Azərbaycani Milli Akademiyə Riyaziyyət iən Mexanikə İnstitutədə qədə elmi işçi, 1983-1987 soronədə Azərbaycan Politexnik İnstitutədə de riyazi-fizika ixtisasi bə aspirantura daxil bə. 1988-də namizədə dissertasiya mıdafiəş kardə və 1987-nə soriko ta bə rəhmətşə ruji əyo (de dosent elmi nomi) bə tələbon dərsış doə.
Sədrəddin müəllim ıştəko 3 qıləm əğılış oğətə: Nəcib (1987), Südabə (1988) və Mir Səid (1993). Nəcib İqtisad Universiteti maqistraturaş səş kardə və hərbi xidmətiko peş maliyyə sahədə ko kardə. Südabə xanımən alim məktəbi səş kardə və əvən iqtisadçiye. Sədrəddin müəllimi rükə zoə - Mir Səid Neft Akademiyə tələbəye.
Sədrəddin müəllim həm ıştən, həmən çəy xanım – İradə Əsədi kinə çı Tolışı ve yolə-rüşonfikon nəslikon. İ müddət çəy pə Mirmohsun səvxoz direktori bə. İradə xanımən yolə-rüşonfikon nəslikoye. Çəy pə Əsəd mamüən xəyli vaxt sovxoz direktori bə, çəy moə Gülarə xanım həm müəllim, həmən çəmə Tolışi folklori və ədəbiyyati həm ve yolə zinəkəsonko, həmən əvoni bə çəmə milləti rosniəkəsonko bə. İradə xanumi bıvon - Fikrət Əsgərov, Oqtay Əsgərov müəllimonən çəmə milləti milli tarıxi inkişafi roədə beəvəzə xıdmətoşon heste...
Peştepüremon ki, Sədrəddin müəllimi sofə HONİ ov hiç vaxt hışk əbini, çəy bino kardə xəyə ro i ruj çey avlodon dəvom bəkan... Xıdo bə İradə xanımi və bə çəvon əğlon səbr və xəşəconəti bıdə. Sədrəddin müəllim daim ıştə milləti dılədə bəjie.
