(poemaku vəsləon)
Çı maholi tarıx ıştı sinədəy,
Zınəkəs ni, vallah, sinı çanədəy?
Bo Ğızlıvo şinə şonəy Bandəro,
Çı Xanəli dədəy-nənəy Bandəro.
Ə ğədimə nomını çok oqətə.
Çəvon səpe çəmə dədon po qətə.
Əv "Kanəso”, əv "Zomi band”, "Kurə də”,
"Məsəlo so”, "Qırdə zəmin”-"Korə də”,
"Tojə səbon”, "Kanə səbon”, "Kanə cu”,
"Kanə cuə”ku co-co əbiy çanə cu...
"Gasımi so” "Əğəverdi pambə hi”.
Bino noəbə sıftə iyo çəmə di ,
"Çəndıri so”, "Golomi hi”, "Kanə ro”,
"Molon tıbə”, vey gədimə "Tıbə co”,
Çı Xəlili, İbrahimi qədə so,
Çı Kərəmi, çı Durkinə dədə so.
Im "Siyo tul”, əvrə "Mi şam”, "Quli se”,
Məvotənən bıvrəy teylə tuli se.
Bəştə qoroş nomışbə har zəmini,
Im zəminən obod kardə Nəmini,
"Sığınə se” , "Tahiri se”, "Butə sə”...
Bo zəminon xəlxe dıli sutə sə.
Boy bışəmon Mədğasımi honi sə,
Tovostone rohət bəbe con esə.
Verdi vişə tobə pəynə mandəbe,
Miri vişə ıştə mahne handəbe.
Mir Cəvodi vişə hejo toki be,
Bəlel, Ambur, Nil-çə doon çoki be.
"Əli honi” , "Korə honi” bə nom bin,
Bıxorədə seon, ruon həmom bin...
Bandərobe Kaspi dıyo ləpəjən,
Lotkə əvoy dılədəşən çəp əjən.
Jinton dıyo, penton vişon-reçin be,
Vişə kijon, ovə kijon –reçin be.
Dıyo-vişə bə i yəndı dəmandin,
Moyon, solon çı amburun peəmandin.
Dıyo, vişə çı Xıdo doə xınbebən,
Bı vırono jimon bıkə kambebən.
...Soron, manqon tarıxiku davarde,
Dıyo bəştə kanə lonə oqarde.
Ezım ıyo, kijə-kəvul, moy ıyo,
Bə değıjon xəbə rəse boy ıyo.
Çı bandiku, çı Likiku beşimon ,
Bə Bandəro tatə vanqo dəşimon.
Dınyo zındə Tolış dincə bandə ni,
Bəşəv-bə ruj tolış beko mandəni.
Dəçəy dasti ın Bandəro obod be,
Çı vişəku, kımutiku ozod be.
Çı Ostoro, Ardəbili, Nəmini,
Aliəbodi, Sori, Vizəzəmini,
Vaməzgoni Çəyoruku, Necuku.
Yolə zuən, çəmə qədə Dicoku,
Çanə zırək ome beşe ənıyo,
Beşe bə band nışte, eşe bə dıyo.
Dı leysaron bəməl ome "Leysonbə”
Qoçə bəq de Cıqə bəqi i con bə.
Ha oməkəs boştə luzi fəhlə be,
"Peysə” çı di peynə sədə məhlə be.
"Sanbu” ome , "Ğəzəğ” ome, "Toy” ome,
Bə odəmon çəş-dıli şoy-şoy ome.
Dıyo nıbe, Kaspi qıley otəş be,
Qa okırye, qa dəkırye, qa peş be,
Çəmə dədon bə canq beşin bə dıyo.
Bum –zəminon haşdışone ənıyo,
Şartuk bəqəm kardedəni har tuki.
Dıyo kənon obod be bo şartuki,
Kaşdışone qandım, şartuk, cəv, arzın,
Boxlə, noxod, laqə, məju-daparzın.
Oqətəbe, perosnəbe qumuş, qo,
Oqarde bə nunə lokə Bandəro...
(hestışe idomə)
"Tolışon Sədo” N: 57
26 noyabr 2013
