37 il öncə mən bu parkın (talış xanlarının bağı) davamı olan bir həyətdə yerləşən bir doğum evində dünyaya gəldim.
Bu parkın iki addımlığında böyüdüm. Lənkəranın ilk və o vaxt üçün yeganə karuselində də, bu parkda uçdum göylərə. Bu parkın bir ucunda yerləşən məktəbə getdim 11 il. Bu parka baxan şahmat məktəbində profesionalca şahmat oynamağı öyrəndim. Uşaq könlümün dəcəlliyi tutanda da dərsdən qaçıb bu parkda yerləşən bilyardxanaya getdim və tenis məktəbi keçdim. Gizlin-cizlin ilk siqaret qullablarını da bu parkda vurdum. Bu parkın içində yerləşən açıq hava kinoteatrında uzun yay gecələrində sentimental filmlərə baxdım.
Bu parkın dəmirağaclarının altında yerləşən çayxanada Lənkəran çayının tamı ilə özləşdim. 200-300 illik yaşı olan bu ağacların arasından görünən yolun bir ucu bizim evə, bir ucu Dəmir yol vaqzalına baxır. Məhz bu yol məni indiki, 37 il sonrakı Xalid Bağırova gətirib çıxartdı.
İndi 200-300 dostdan təbrik ala bilirəm bir günə. Az deyil bir toyluq adamdır. Amma arxaya dönüb baxanda o ağacları görmürəm. Əliyev rejiminin qulbeçəsi olan İdiotun biri sevmədi o ağacları. Bu rejim sevmədi mənim keçmişimi. Bu rejim sevmədi, mənin sevdiyim şeyləri, dəyərləri və insanları.
Mən həmişə demişəm: Vətən mənim üçün daş, torpaq, taxta deyil. Vətən mənim üçün sevdiyim insanlardır. Əgər 10 il qabaq onlar sevdiyim 5-6 nəfər idisə, indisə onların sayı o qədər çoxdur ki, məni təbrik edən dostlarım; tanıdıqlarım və tanımadıqlarım; göyçaylılar, naxçıvanlılar, gəncəlilər... Hətta mən Daşkəsinin Çovdar kəndinin mırıq diş sakinlərini sevdim. "Oğlumun ölümünü siyasiləşdirməyən" (bu sözün mənasını anlamadan) əsgər analarını, "Gömrüyə rüşvət verməyəcəm" - deyən Mamed kişini sevdim, özünün prokuroruna "allah sənin qapını açsın" deyən Hilal Məmmədovu sevdim, o qədər çox insanı sevdim ki...
Mənim üçün köçüb getmək heç zaman söz konusu olmadı. Bəziləri bu yerləri qoyub gedə bilmədisə, mən insanları qoyub gedə bilmədim. Bəlkə də getmək olardı...
Ryazanovun "Небеса обетованные" filmində olduğu kimi bütün sevdiyin adamları bir böyük gəmiyə yığaraq uzaq "vədd olunmuş göylərə" getmək. Gəlin göydən yerə enək, sevdiyimiz insanların olduğu yerə. Heç kəs bizim dalımızca, bizi vəd olunmuş yerə aparmaq üçün gəmi göndərməyəcək. Odur ki, qalıb bu ölkəni yaşamalı ölkəyə çevirməliyik.
Təbriklərinizə görə təşəkkürlər.
Xalid BAĞIROV
Bu gün xalqın vəkili Xalid Bağırovun doğum günüdür. Bu statusu da o, facebook səhifəsində doğun günü ilə bağlı ona ünvanlanan təbriklərə rəğmən yazıb. Biz də bu təbriklərə qoşuluruq. Qoy Allah Xalidi öz xalqına çox görməsin. Ona hər şeydən öncə sağlamlıq, vəkillik peşəsinin Vətəndə hörmətə minməsi, uğrunda mübarizə apardığı idealların tezliklə reallaşmasını arzu edirik! Təvəllüdünüz mübarək, Xalid Boyli!
