Главная » 2011»Май»4 » Xəzər Lankon Azərbaycan kubokunun finalında
23:22
Xəzər Lankon Azərbaycan kubokunun finalında
Kubokun yarımfinalının cavab oyununda "Bakı” ilə qarşılaşan "Xəzər Lankon” bütün maneələrə baxmayaraq finala adını yazdıra bildi.
"Xəzər Lankon” oyuna ilk yarımfinal oyunundan bir qədər fərqli heyətlə çıxmışdı. Müdafiənin sağında Elnur Allahverdiyev, solunda isə Muşat yer almışdı. Elnur Abdullayevin kart cəzası üzündən olmaması Dieqo Souzanın start heyətdə yer almasına şərait yaratdı. Lankondakı oyunda cəzalı olan Pit isə bu dəfə yarımmüdafiənin solunda yer almışdı. Yeganə hücumçu Uinston Parks idi.
İlk dəqiqələr və ümumilikdə ilk hissə meydanın mərkəzində sıx mübarizənin getməsi ilə yadda qaldı. Hesab hər iki komandanı bir qədər ehtiyatlı olmağa məcbur edirdi. "Xəzər Lankon” hücumlarını əsasən cinahlarla qururdu. Sağda Vobay, solda isə Pit mümkün qədər rəqib qapısına yaxınlaşmağa çalışırdılar. İlk zərbə isə Parksdan gəldi. Cərimə meydançasına soldan daxil olan kubokun bombaridiri müdafiəçini keçərək qapıya zərbə endirdi, amma top dirəydən aralı keçdi.
Ardınca Pitin cərimə zərbəsi yadda qaldı. Vobayın keçidinin qarşısını rəqib kobudluqla aldı və təyin oluna cərimə zərbəsini Pit doqquzluğa yollasa da, qapıçı topu götürə bildi. Bundan bir az sonra Pit bu dəfə oyundan qapıya zərbə endirmək şansı qazandı, lakin bu dəfə top üstdən keçdi.
İlk hissənin ən maraqlı epizodu isə fasiləyə yaxın baş verdi. Rəqib qapıçısının topa uğursuz çıxması nəticəsində top sağda olan Vobaya düşdü. Onun solaxay zərbəsini yerinə qayıdan qapıçı çətinliklə dəf etdi.
İkinci hissə dəyişikliklə başladı. Julius Vobayın yerinə Opara daxil oldu və komandamız iki hücumçu ilə oyunu davam etdirdi. Hissənin başlanğına qapımıza qol vuruldu. Cərimə meydançasının xətti üzərində təyin olunan cərimə zərbəsini Roşa dəqiq yerinə yetirdi və iki oyunun ümumi hesabını bərabərləşdirdi.
Qoldan dərhal sonra "Xəzər Lankon” irəli atıldı və Pit qola çox yaxın oldu. Sağ cinahdan verilən ötürmədən donra qapıdan bir neçə metr məsafədə olan yarımmüdafiəçinin zərbəsini qapıçı qaytardı. Ardınca Parks qapıçı ilə təkbətək çıxarılsa da, Şarlia onu qabaqladı. 58-ci dəqiqədə isə hesab bərabərləşdi. Kyaku mərkəzdən topu sağda olan Oparaya ötürdü. Yan xəttə rəqib müdafiəçi ilə mübarizədə onu gözəl şəkildə keçən hücumçu topu cərimə meydançasında rəqibin əhatəsində olan Parksa yox, penalti nöqtəsinə doğru boş mövqeyə ötürdü. Orada isə Rahid Əmirquliyev uzun fasilədən sonra qol vurmaqla adını tabloya yazdırdı – 1:1.
Qoldan psixoloji üstünlüyü ələ alan komandamız meydanda da üstünlüyü qorumağa davam etdirirdi. Sol cinahda Pit cərimə meydançasında olan Oparanı gördü, sonuncu isə topu Parksa ötürdü. Uinston çətin vəziyyətdə olmasına rəğmən zərbəsini endirdi və qapıçının müdaxiləsi hesabın artmasına imkan vermədi. "Bakı” isə artıq 67-ci dəqiqəyə hər üç dəyişiklikdən istifadə etmişdi. Bununla belə rəqibin oyunda tam üstünlüyə yiyələnməsinə imkan verilmirdi.
Oyun sona yaxınlaşdıqca "Xəzər Lankon” daha rahat oynaya bilirdi. Rəqibin iki qol vurmalı olduğu halda, komandamız heç yerə tələsmirdi. 82-ci dəqiqədə isə ikinci əvəzetmə həyata keçirildi – Parks yerini Stankuya verdi. Bundan bir az sonra isə cərimə meydançasında qarışıqlıq zamanı sanki oyuna intriqa qatmaq istəyən baş hakim qapımıza izahı çətin olan bir penalti təyin etdi. Nöqtəyə yaxınlaşan Ramim "Bakı”nı hesabda önə keçirdi.
87-ci dəqiqədə isə Dieqo Souzanı Alim Qurbanov əvəzlədi. Qarşıda olduqca gərgin dəqiqələr qalırdı. Hakim oyuna beş dəqiqə artırdı. Meydana yeni daxil olan Alim bu vaxt ərzində qapıçını yoxlamağa da imkan tapdı, lakin Şarlia iki cəhddən topu tutdu. Ardınca isə Kamran Ağayev başla zərbəni tullanaraq tutdu.
Beləliklə, böyük gərginliklə keçən oyunda "Xəzər Lankon” layiq olduğu qələbəni qazanaraq tarixinin dördüncü kubok finalını təmin etdi.
"Oyun haqqında heç nə demək istəmirəm, özünüz hər şeyi gördünüz", - deyə oyundan sonra təşkil olunan mətbuat konfransında komandamızın məşqçisi Mihay Teja bildirdi. "Öz komandamı təbrik etmək istəyirəm. Keçən mövsüm nə baş verdiyini bilirdik, və ona görə bu gün oyunçularımızda motivasiya yüsək idi. Azarkeşlərimizə minnətdarlıq bildirmək istəyirəm, onlar həmişə komandamızın yanındadırlar və axıracan öz dəstəklərini əsirgəmirlər", - deyə Teja vurğuladı .
Öz növbəsində "Bakı”nın baş məşqçisi Aleksandr Starkov komandasının finala çıxmaması ilə bağlı məyusluğunu ifadə etdi: "Biz burada da, Lankonda da öz şanslarımızı boşa verdik. Oyunçularım əllərindən gələni etdilər, ancaq təəssüf ki, onlarda alınmadı".
