“Xəzər Lənkəran”a sırf biznes nöqteyi-nəzərdən yanaşsaq, bu klubu da Mübariz Mənsimovun bir biznesi saymaq olardı. Amma bu biznes gəlirsiz biznes idi. Maddi cəhətdən xeyir vermirdi. Ticarətdə bir biznes növü xeyir vermirsə, bu ticarət sahəsi “xəstə” sayılır. Adətən belə hallarda digər sahələri yoluxdurmamaq üçün belə biznesdən tez qurtulmağa çalışırlar, yəni bağlayırlar. Mübariz Mənsimov da belə etdi. Amma mən inanmıram ki, bunu gəlir vermədiyinə görə edib. Bu klubun gəlirsiz olması və mövsüm ərzində “yediyi” bir neçə milyon çətin ki, illik dövriyyəsi milyardlarla ölçülən o boyda kompaniyaya ziyan vursun.

Bu fikri PFL prezidenti Ramin Musayevin “Xəzər” TV-də yayımlanan “Futbol saatı” proqramında səsləndirdiyi sözlər də təsdiqləyir. Onun fikrincə də, problem maddi sarıdan olmayıb:

“Sadəcə, klubun sahibi Mübariz Mənsimov incidi. Çünki bu qədər əziyyət çəkdi, ancaq heç nəyə nail ola bilmədi. Deyərəm ki, Mübariz müəllim müflisləşdi, yox. Nəyi var, özünə qismət. Biz heç kəsin pulunu saymırıq. Mənsimovun pulu var. Yəqin ki, onu küsdürdülər”.

Kim küsdürdü? Musayev burda çox güman, “Xəzər Lənkəran”ı idarə edənlərə işarə vurur. Amma bu sual birinci PFL prezidentinin üzərinə tuşlanmalıdı. Lazım gəlsə, internetdə axtarış verib, hakimlərin bu komandanın başına nə oyunlar açdığına dair onlarla sübut tapıb göstərərəm. Sadəcə, buna nə vaxt, nə həvəs, nə də heç ehtiyac yoxdu.
Zatən görünən kəndə bələdçi lazım deyil. Hamı hər şeyi çox gözəl bilir. Niyə özümüzü yoraq? Yəqin ki, kimsə burda ya özünü, ya da camaatı axmaq sayıb “PFL-n hakimlərə nə aidiyyatı” sualını da verməz.

Ramin Musayev bir də onu deyir ki, Mübariz Mənsimov bu qədər əziyyət çəkdi, heç nəyə nail ola bilmədi. Niyə ki? Çox şeyə nail olub. Məsələn, PFL və eyni zamanda onun şefi olmayan vaxt “Xəzər Lənkəran” Azərbaycan çempionu olub. Sadəcə, insan arzuladığı kimi görür. Sevdiyində çox şey görər, sevmədiyində heç nə görməz. Nə isə, bu fəlsəfi, psixoloji fikirlərdən sonra keçək mətləbə.

Bəli, komandanın dağılmasının əsas səbəblərindən biri çempionatı keçirənlər tərəfindən cənub klubuna çoxlu haqsızlıqların olması oldu. Bu haqsızlıqlara dözmək lazım idimi? Yoxsa dözməyib komandanı dağıtmaq düzgün addım idimi? Məncə, ikinci variant düzgün idi. Yəni komandanı dağıtmaq. Bu cür çempionatda yarışıb haqsızlıqlara dözməkdənsə, uzaqlaşmaq daha məqsədəuyğun idi.
Belə yerdə komanda çıxarıb yarışmaq, Mübariz Mənsimovun səviyyəsinə uyğun deyildi. Və atdığı ağıllı addımlar hesabına milyarder olan adam növbəti ağıllı addımını atdı. 

“Barselona” barədə təklif 

“Xəzər Lənkəran”ın dağıdılmasında başqa bir cəbəb kimi isə bu komandanın var olmasının separatçılıq meyllərinə yol açması barədə danışılan söz-söhbəti göstərirlər və sair və ilaxır. 

Bilmirəm belə söz-söhbət olub, ya yox. Amma onu bilirəm ki, futbol heç zaman parçalamayıb. Futbol barışdırıcı, sülh gətirən oyundu. 

İspaniya katalonlar, qalisiyalılar, basklar və bir çox xalqların yaşadığı ölkədi. Bu saydığım və saymadığım xalqların birləşməsi İspaniyanı təşkil edir. Ara-sıra onlarda da separatçılıq meylləri baş qaldırır. Ən çox bunu Kataloniyada müşahidə etmək olur. Bu bölgədə isə “Barselona” kimi klub var. Katalonlar zaman-zaman ayrılmaq istədikləri barədə fikirlər yürüdürlər. Məşhur “Real” – “Barselona” derbisinin prinsipiallıq daşıması səbəblərindən biri də budu. Bir neçə il öncə Katoloniya müstəqillik barədə referendum keçirmək istəyirdi. Bu zaman “bu bölgə müstəqil olsa, “Real”- “Barselona” görüşləri necə olacaq” sualı yarandı. Bu işə cavabdehlik daşıyan məsul qurumdan bildirdilər ki, Kataloniya müstəqil olsa, “Real” – “Barselona” görüşləri bir daha olmayacaq. Bu söhbətdən sonra Katoloniyanın müstəqil olmaq istəyi barədə söz-söhbət kəsilib. Bax, futbol belə oyundu. O parçalamır, birləşdirir! 

“Barselona” İspaniya üçün nə deməkdisə, “Xəzər Lənkəran” da Azərbaycan üçün (bizim səviyyəmizə görə) təxminən elə o demək idi. Bəs ispanlar niyə dağıtmır “Barselona”nı? Görünür, bizimkilər qədər ağılları yoxdu. Deyirəm “Barselona” azarkeşləri bir də separatçı şüarlar səsləndirsələr və ya orda separatçı meyllər yaransa, bunun səbəbini həmin klubda görsələr, ispanlara təklif edək, bizim təcrübədən yararlansınlar – yəni “Barselona”nı dağıtsınlar. Bacarmasalar, çağıraq, gəlib komanda dağıtmağı bizdən öyrənsinlər. Hətta onlara seminar keçib “sözə baxmayan komandanı necə dağıtmaq olar” adlı mühazirə də oxumaq olar. İspanlar da bizə təşəkkür edərək, sonra da gedib “Barselona”nı bizdən qazandıqları təcrübə hesabına, asanlıqla dağıtsınlar, canları qurtulsun.

Məmməd MİRZƏ 
aztoday.az