Premyer Liqanın 3-cü turunda"Xəzər Lankon” öz meydanında "Turan”ı qəbul etdi.
İlk dəqiqələrindən "Xəzər Lankon” meydan sahibi statusuna uyğun olaraq təşəbbüsü ələ almağa başladı. Beşinci dəqiqədə ilk təhlükəli epizod baş tutdu. "Turan”ın hissə ərzində Kamranın qapısı önündə yaratdığı ən təhlükəli epizod 15-ci dəqiqəyə təsadüf etdi. Rəqib futbolçu cərimə meydançamıza daxil olub mərkəzə ötürmə verə bilsə də, ötən oyunda olduğu kimi, bu dəfə də Beqiri başla topu qapı xəttindən çıxarıb təhlükəni sovuşdurdu.
Bundan sonra komandamız daha bir neçə hücum həyata keçirdi. Sağ cinahda Rahid və Bonfim yenə də daha yaxşı anlaşma sayəsində rəqib qapısına təhlükəli ötürmələri təmin edirdilər. Öz növbəsində Rikardo da vaxtaşırı hücumlara qoşulsa da, bu onda heç də pis alınmırdı.
Fəallığın nəticəsi 34-cü dəqiqədə bəlli oldu. Sağ cinahdan verilən ötürmədən sonra top Subaşiçin qarşısına düşdü. Önündə olan müdafiəçilərdən uğurla yayınan yeni hücumçumuz cərimə meydançasının sağından elə sağ ayağı ilə topu qapıçıdan uzaq küncə yolladı. İti bucaq altında vurulan bu qol futbolçunun "ağ-yaşıl” formada vurduğu ilk qoldur.
İkinci hissəyə "Xəzər Lənkəran” əvəzetməsiz başladı. Oyunun gedişatı da elə ilk hissədəki kimi gedirdi. Fasilədən sonra Pitin hücumlara daha tez-tez qoşulduğunu qeyd etmək olar. Hələ ilk hissədə Rednikin Adriandan bunu tələb etdiyini görmək olardı.
Hissənin əvvəlində Elnur Abdullayev növbəti dəfə qapıya zərbə endirdi. Cərimə meydançasının xətti üzərindən qapıya göndərilən topu rəqib qapıçı tuta bildi. Pitə qarşı edilən kobudluğa görə təyin olunan cərimə zərbəsini isə Beqiri yerinə yetirdi, lakin onun zərbəsi canlı səddən geri döndü.
57-ci dəqiqədə isə sağ cinahdan rəqib qapısına doğru cərimə zərbəsi təyin olundu. Topa Pit yaxınlaşdı və uzaq dirəyə doğru asma yerinə yetirdi. Burada isə Elvin Beqiri başla təkcə müdafiədə yox, həm də hücumda yaxşı oynadığını nümayiş etdirdi və topu meydana qaytardı. Lazımi mövqedə topu gözləyən Branimir Subaşiç isə dubl edərək, tribunaları ayağa qaldırdı – 2:0.
Azarkeşlər yenicə Subaşiçi adını çəkib ona təşəkkür etmişdilər ki, "Xəzər Lənkəran” artıq tam sürətlə "Turan”ın qapısına doğru yürüyürdü. Katalin Doman cərimə meydançasına daxil olun topu onunla birgə bura gələn Rikardoya ötürdü. Qomeş isə heç bir problemsiz üçüncü qolu rəqib qapısından keçirdi. Rikardo üçün də bu qol komandamızın heyətində ilk qol kimi yadda qaldı.
69-cu dəqiqədə isə daha bir dəyişiklik edildi. Elnur Abdullayev yerini Alim Qurbanova verdi. Oyunun sonu yaxınlaşdıqca və rəqib heç bir təhlükə yaratmayınca, oyunun sürəti də nisbətən aşağı düşdü. Tablodakı hesab komandaya rahat oynamaq üçün tam imkan verirdi. 84-cü dəqiqədə isə oyunun ən yaxşısı Subaşiç alqış sədaları altında yerini gənc Fikrət Ulduzluya verdi.
Bundan bir neçə dəqiqə sonra isə hesabda fərq azaldı. Komandamızın qapısına təyin olunmuş cərimə zərbəsini Kamran Ağayev altılıqdan uğurla çıxarsa da, Nadir Nəbiyev topa hamıdan tez çataraq onu qapıdan keçirdi.
Bundan sonra "Xəzər Lənkəran”ın oyununda bir canlanma yarandı. Katalin Domanın təhlükəli hava ötürməsi qapıya istiqamətlənsə də, rəqib qapıçı topa son anda toxuna bildi. Pit isə rəqibin bir neçə futbolçusunu keçib cərimə meydançasına daxil oldu, amma zərbəsi alınmadı.
Beləliklə, bu həftə də qələbə qazanan "Xəzər Lənkəran” yüz faizlik nəticə ilə turnir cədvəlində başçılığını davam etdirir.
