Главная » 2012»Апрель»4 » Xədicə İsmayılova: Videoçarx hakimiyyət tərəfindən hazırlanıb
22:51
Xədicə İsmayılova: Videoçarx hakimiyyət tərəfindən hazırlanıb
Reportyorların Azadlıq və Təhlükəsizlik İnstitutunun (RATİ) Preventiv Qrupu "Azadlıq” radiosunun icmalçısı Xədicə İsmayılovanın videomüşahidəsinin dövlət qurumları tərəfindən təşkil edildiyi qənaətinə gəlib.
Aprelin 4-də keçirilən mətbuat konfransında martın 17-18-də İsmayılovanın mənzilində çəkilmiş videosüjet nümayiş olunub. Süjetdə İsmayılovanın mənzilinə səsdinləmə üçün çəkilmiş məftillər əks olunub. Bu məftillər ATS-38-ə birləşdirilib, deyə RATİ rəhbəri Emin Hüseynov bildirib.
"Bu gün mənə qarşı aksiyanın Azərbaycan prezidentinin ailəsinin biznesi ilə bağlı araşdırmalarıma görə həyata keçirildiyinə daha çox inanıram”, deyə Xədicə İsmayılova bildirib. O qeyd edib ki, sırf prezidentin şəxsi işləri ilə məşğul olmurdu. "Nə araşdırsam, hansı iri layihələri öyrənsəm, hər yerdən prezidentin ailəsi ilə bağlı firmalar çıxır”, deyə o bildirib. Bu layihələr sırasında o, Bayraq Meydanındakı işləri, Azerfon telekommunikasiya layihəsini qeyd edib.
İsmayılova onu gözdən salan görüntülərlə ilk xəbərdarlığı martın 7-də alıb, amma qorxmayıb və martın 9-da Baş Prokurorluğa və DİN-ə müraciət edib. Bu qurumlar isə onun müraciətlərinə məhəl qoymayıblar.
Martın 13-də Amerika hostingində olan bir günlük musavat.tv saytında İsmayılovanın intim roliki peyda olub və elə həmin gün hakimiyyətin nəzarətində olan üç qəzetdə - "Yeni Azərbaycan”, "Səs” və "İki sahil”də ləkəyaxma kampaniyası başlayıb.
Turanın artıq məlumat verdiyi kimi, martın 14-də kampaniya ifşa olunub və prezident administrasiyasının nümayəndələri bu videoçarxı pisləyiblər.
İsmayılova bildirib ki, martın 15-də Bakı Prokurorluğu onun 9 mart tarixli müraciəti üzrə cinayət işi açıb.
"Mən işin CM-in 156-cı (şəxsi həyata müdaxilə) və 163-cü (jurnalistin fəaliyyətinə maneçilik törətmə) maddələri ilə açılmasında israr edirdim, lakin istintaq yalnız 156-cı maddəni tətbiq etdi”, deyə o bildirib.
Vəkil Adil İsmayılovun sözlərinə görə, istintaq xüsusi entuziazm olmadan aparılır. Xüsusən, aşkar edilmiş məftillərin və videomüşahidə kameralarının yerləşdirilməsinin ekspertizası uzadılıb.
Sonda kabellərə baxmaq üçün ATS-38-in sahə rabitəçisi çağırılıb, məlum olub ki, o, özü evin mənzil olan girişində paylayıcı lövhədən məftil çəkib. Rabitəçi etiraf edib ki, bunu rəhbərliyin göstərişi ilə edib. Bunun üçün 2011-ci ilin iyulunda yeni telefon nömrəsi ayrılıb. Bir neçə gün əvvəl (videoçarx qalmaqalından sonra) nömrə ləğv edilib.
İsmayılova bu əməliyyatda Milli Təhlükəsizlik Nazirliyindən şübhələndiyini bildirib. "Jurnalistlərin döyülməsində və qətlində adı keçən MTN əməkdaşı Çovdarovun general rütbəsi almasından sonra əminliyim daha da artıb”, deyə o qeyd edib.
İsmayılova bildirib ki, ABŞ-da bir vəkillik kontoru rolikin Amerika hostingində yerləşdirilməsi faktı üzrə onun hüquqlarını müdafiə etməyi öhdəsinə götürüb.
Preventiv Araşdırma Qrupunun rəhbəri Şahvələd Çobanoğlu deyi bki, praktiki olaraq eyni vaxtda üç domen qeydiyyata alınıb, musavat.tv üçün onlardan istifadə edib.
Mətbuat konfransının sonunda İsmayılova bildirib ki, hökumətyönlü qəzetlərdə qarayaxma kampaniyası davam edir, lakin Mətbuat Şurası heç bir reaksiya vermir.
"Mətbuat Şurası bu qəzetlərə qarşı addım atmasa və mənə cavab verməsə, qurumu məhkəməyə verəcəyəm”, deyə o bildirib.
