 Mənim bir həmşəhərlim var - vicdan Sabir! Yox, o ayamanı ona mən qoymamışam, özü götürüb, onun bir "Vicdan” xeyriyyə cəmiyyəti var idi ki, ona çox populyarlıq gətirdi. Söhbət Milli Dövlətçilik Partiyasının sədri, İrəvan mühacir dövlətinin prezidenti (?), Sumqayıt maşın bazarının sahibi Sabir Tarverdiyevdən gedir.
Sabir Tarverdiyevlə şəxsi tanışlığım yoxdur, amma onu bilirəm ki, Əvəz Zeynallıya "qardaş” deyənlərdən biri də odur. Niyə mən Sabir Tarverdiyevdən başladım? Çünkü bu gün həmən "qardaş” "qardaşı” Əvəzin üzünə durur və iddia edir ki, hər həftə Əvəzə 100 manat verirmiş. Mən Sabir məllimin yalan danışdığı iddiasında deyiləm, çünkü Sabir məllim üçün kiməsə hər həftə 100 manat vermək, mənim üçün bir stəkan "dənə” almaq, eyni şeydir. Baxmayaraq ki, Sabir Tarverdiyev özünü ən kasıb, ən məzlum adam kimi aparırdı, sən demə bu adamın hər həftə "əlavə” 100 "manıtı” olurmuş Əvəzə verməyə (Əvəzə verməyə olmasa da, "başqa yerlərə verməyə” lap bir neçə sıfırlıq məbləği də olardı).
Amma.. amması odur ki, bu Sabir Tarverdiyev bir şey olmamış qaçırdı "Xural”a ki, mənə dəstək olun. Hətta bir dəfə "Xural”a bildirmişdi ki, əgər İlham Əliyev onu eşitməsə, ondan mərhum Heydər Əliyevin qəbrinə şikayət edəcək. Bütün bunları ona görə yazıram ki, Əvəz "vicdan” Sabir kimi tanınan, Sabir Tarverdiyev üçün də "fərə gəlib”. Indi Sabir Tarverdiyev potensial şikayətçidir, hətta deyilənlərə görə şikayət etməyi ona "vicdanının səsi” tapşırıb. Kimin kimə nə tapşırmağının mənə aidiyyatı olmadığı üçün, mən bu məsələnin üstündən sükutla keçirəm, amma onu bilirəm ki, "vicdan-vicdan deməklə adamın vicdanı çoxalmaz”, vicdan çox olsaydı Sabir Tarverdiyev maşın bazarına girişi bir az aşağı salardı, şənbə və bazar günlərində maşın bazarına yığılan minlərlə maşının heç olmasa bir neçə yüzündən aldığı "para”nı keçirdərdi "hökumətin şotuna”, daha bazarın genişlənməsi üçün xərcləməzdi. Məni bir sual maraqlandırır: niyə Astaralı Rufullanın üzünə Astaralıları, "yeraz” Əvəzin üzünə yerazları durğuzurlar? Ola bilsin bütün bunlar təsadüfdür, amma necədə eyni ssenariyə oxşayır...
Xanım deputat danışdı..
Gülər Əhmədova danışdı və ilk olaraq mənim şübhələrimin üstünə bir az da şübhə toxumu səpdi. Gülər xanım bildirib ki, Əvəzin səsini yazmaqda ona elə Əvəzin ən yaxın dostları köməklik ediblər... İnandırıcı deyil? Amma mən inanıram, diqqətli oxucu mənim "Selcanın məmləkəti” yazımda da belə bir şeyə işarə vurduğumu sezə bilərdi. Niyə də yox? Axı Əvəzin səsini ən yaxşı elə onun ətrafında olanlar yaza bilməzdilərmi? Bilərdilər, deputat xanımın dediyi düzdürsə, bildilər də...
Xanım deputat sonra deyir ki, hansısa küçə adamlarının onun haqqında yazmalarına qətiyyən fikir vermir, hətta o adamların çoxunu "şərəfsiz” də adlandırır, onun təbirincə belədir: "boş-bekar insanlardı da, qoy yazsınlar”. Amma Gülər xanımın dedikləri biri-birini tamamlamırdı, "mən həmişə haqqı demişəm” deyən xanım deputat, nədənsə saxta parlamentə necə seçilməsini unudur. (indi məni də "reket” adlandıracaq). Amma deputatın dediklərinin içində çox maraqlı bir epizod da var idi. Xanım deputat hər cür ciddi-cəhdlə Rauf Arifoğlunu təmizə çıxarmağa çalışır, mənim şəxsən Arifoğlu cənabına qarşı heç bir pritenziyam yoxdur, amma xanım deputatın dönə-dönə onu təmizə çıxarması nələrinsə tam açılmadığı qənaətini yaradır. Nə isə, bu mövzudan çox yazıb, oxucumu yormaq istəmirəm, keçid alım o yana...
Əlikram Hümmətov... İrəvanda?
İrəvanda ikinci Talışşünaslıq konfransı keçdi, bu konfransa şəxsən mənim heş bir marağım olmadığı üçün, konfrans və onun qərarları haqqında heç nə yaza bilməyəcəm, bircə onu qeyd etmək istəyirəm ki, Respublika Talış Mədəniyyət Mərkəzinin sədri Əli Nasir bu konfransı qətiyyətlə pislədi və bunu qəzetdə yazmağımı dönə-dönə tapşırdı, mən də Əli Nasir ilə eyni fikirdəyəm ki, biz öz problemlərimizi özümüz də həll edə bilərik, sadəcə bir az həvəs və çalışqanlıq lazımdır. Amma dövrü mətbuat bu konfransın üstünə yaman getdi, hətta "aparıcı müxalifət” qəzetləri də bu konfransı bildikləri kimi şərh edirdilər. həmən qəzetlər tutuquşu kimi ağız-ağıza verib, Əlikramı "apardılar” İrəvana, Əlikram nə qədər and içdi, nə qədər aman elədi ki, o İrəvana getməyib, inanmadılar ki, inanmadılar. İnanmamaqları cəhənnəm, başladılar Talışları təhqir etməyə, "saat 12” və buna oxşar cümlələr işlətməyə, düzdür, sosial şəbəkələrdə belə "ulağ-mulağların” cavabları tam verildi, amma mən də özümçün bir araşdırma apardım, sən demə bizim haqqımızda pis yazanların əksəriyyəti "fırt eləyib burnumuzdan düşənlər”dir, bu "fırt” 12-dən sonra olub, qabaq olub, bilmirəm, amma fakt odur ki, bu "fırt” olub, maraqlısı odur ki, bu "fırt”ığlar da "düşdükləri burunu” bəyənmirlər. indi gərək bir-bir həmən "fırt”ığları tapıb, onlara başa salmaq gərəkir ki, adam mayasının üzünə ağ olmaz..Nə isə, bu Əlikram da bir "povod” olub bu orığ-torığlara, a kişi, savadsızlıq olar, bu boyda yox da.. bütün dünya yazır ki, konfransda iki nəfər talış, adları ilə göstərilirlər, olub, bunlar elə Əlikramı soxurlar İrəvana, bu bədbəxtlər elə bilirlər ki, indiki hakimiyyət Əbülfəz Əliyevin hakimiyyətidir, onu şantaj edib, Sürət Hüseynov, Əlikram Hümmətov ilə qorxuzmaq olar, ay-hay "qıdı bəylər”, gedin özünüzə başqa siyasi yol tapın, bəsdirin şər-şəbədə dediz, bəsdirin milli münasibətlərə xələl gətirdiz, bəsdirin ucuz populizmə qaçdınız, bu təfəkkürlə siz nəinki hakimiyyəti, heç "Azadlıq” meydanını da görməyəcəksiz...
Qəzetin yayınlanması...
Qəzet artıq mütamadi olaraq həftədə bir dəfə dərc olumacaq, düzdür, bu çox çətin məsələdir, amma bu bir şərəf məsələsidir ki, burda bir yol var-İRƏLİ! Geriyə yol olmadığı üçün bütün oxucularımdan bir xahişim var-qəzeti yalqız qpymayın! Qorxuram yalqız qalıb, yalquzaqa dönək. Deyə bilərsiz ki, yalquzağın nəyi pisdir ki? Mən demədim yalqyzağın nəyisə pisdir, sadəcə mən yalquzaq olub, ulamaqdan qorxuram. Ulamaq demişkən, sizlərə gələn nömrədə ulamaqla bağlı maraqlı, amma məmləkət üçün, onun imici üçün utancgətirici bir əhvalat nəql edəcəm, bizi izləyin, siz izləməsəz...
Rafiq Cəlilov,
Tolışon Sədo, №06, 18.11.2011
celilovrafiq@mail.ru
|
