Kamal Abdulla: “Əvvəllər azsaylı xalqlar deyirdik. İndi, ümumiyyətlə, biz azsaylı xalqlar ifadəsini öz leksikonumuzdan çıxartmalıyıq. Xalq olur, azsaylı xalq olmur ki. Biz hamımız bir-birimizin yanındayıq və hamımızı birləşdirən Azərbaycan var”.

Bu gün - 1 aprel 2014-cü il tarixdə Azərbaycan Respublikası Prezidentinin Millətlərarası, Multikulturalizm və Dini məsələlər üzrə Dövlət muşaviri Kamal Abdulla Bakı Slavyan Univerisitetinin konfrans zalında Azərbaycanda yaşayan xalqların icma rəhbərləri ilə ilk tanışlıq görüşünü keçirib.

Giriş sözü ilə görüşü açan K.Abdulla bildirib ki, AR Prezidentinin ona etimad etdiyi bu məsuliyyətli sahədə var-gücü ilə işləyərək, yeni-yeni nailiyyətlər əldə etmək niyyətindədir. O, ölkəmizdə vətəndaşların milli özünü ifadə sahəsində mövcud olan problemlərin əksəriyyətindən xəbərdar olduğunu bildirərək, icma nümayəndələrindən və mədəniyyət mərkəzlərinin rəhbərlərindən xahiş etdi ki, onlar da bu məsuliyyətli sahədə əllərindən gələn köməklikləri əsirgəməsinlər. 

K.Abdulla qeyd edib ki, icmalarla bu məqamları qorumaq üçün bir çox işlər görəcək, müxtəlif layihələr icra ediləcək. Onun sözlərinə görə, bu layihələr xalqların mədəniyyətinin çiçəklənməsi, Azərbaycan ölkəsində təmsil olunan dillərin çiçəklənməsi, müxtəlif tarixi mədəniyyətin öyrənilməsi, ənənələrin davam etdirilməsi istiqamətində olacaq: “Bu istiqamətdə icmaların irəli sürəcəyi layihələri gözləyəcəyəm. Biz artıq çox intensiv şəkildə başlayaraq işimizi görməliyik. Azərbaycan dövlətçiliyi naminə hamımız əl-ələ verib çalışmalıyıq. Öz fəaliyyətimizlə həm öz icmalarımızın nümayəndələrini, həm də bütövlükdə Azərbaycanı və dostlarını sevindirməliyik. Azərbaycanı sevməyənlərin dəyirmanına su tökənlərlə bizim yolumuz bir deyil və olmayacaq. Onların məkrli niyyətləri, hiylələri və üstü bəzədilmiş ibarələri ilə heç kimi yanlışlığa, aldatmağa cəhd etməyə ehtiyac yoxdur. Onlarla bizim işimiz olmayacaq. Onlara qarşı sözünü dövlət deyəcək”.

Öz çıxışından bitirəndən sonra cənab K.Abdulla görüş iştirakçılara söz verib. 

Görüşdə Talış xalqını Azəri-Talış İctimai Birliyinin sədri Mehdibəy Səfərov, həmən birliyin sədr müavini Seyran Rəfiyev və Respublika Talış Mədəniyyət Mərkəzinin sədri, “Tolışon Sədo” qəzetinin baş redaktoru Rafiq Cəlilov təmsil etmişlər.. 

Mehdibəy Səfərov öz çıxışımda Kamal müəllimi bu təyinatla bağlı təbrik edib. O, həlli ilk növbədə vacib olan bir sıra problemlərdən danışaraq, milli özünü ifadə ilə bağlı qarşıda duran problemlərlə əlaqədar ölkə rəhbərinə bu yaxınlarda ünvanladığı müraciəti yenidən K.Abdullaya təqdim edib.

Görüşdə Rafiq Cəlilov isə,çox ağır və məsuliyyətli bir sahənin yükünü boynuna götürdüyü üçün cənab K.Abdullanı bu təyinatla əlaqədar təbrik etməyəcəyini bildirdi. R.Cəlilov da talış xalqının milli-mənəvi dəyərlərinin yaşaması üçün vacib olan bir sıra ciddi problemlərdən söhbət açıb.

Daha sonra digər icma rəhbərləri də söz alaraq Kamal müəllimi təbrik edib, ona işlərində uğurlar arzulayıblar. 

Görüşdə ən maraqlı məqamlardan biri də böyük ziyalımız Eldəniz Quliyevin çoxdan irəli sürdüyü "Azərbaycan (Xalqlarının) Evi" ideyası yenidən gündəmə gəlməsi olub. Bunu öz çıxışında ləzgi xalqının ziyalısı Sədaqət Kərimova irəli sürüb. Bu ideyaya tərəfdar olduğunu bildirən K.Abdulla bunu ölkə başçısının nəzərinə çatdıracağını söz verib.

Qarşılıqlı dialoq və səmimi ünsiyyət əsasında keçən görüşün yekununda dövlət müşaviri iştirakçıları əmin edib ki, bundan sonra belə görüşlər mütəmadi şəkildə keçiriləcəkdir.