 Ğələmi dod
Boştə dayzoə, bo şair Baladdin Veşoro
Rışxand məqət bo ğələmi
Mənə çəy səpe sələmi
Iştən opotdəş aləmi.
Tanə məjən, tanə səpe.
Ğələmi çı qınoş heste?
Ğələm ıştə roədə roste
Əy çəp bıkə ıştı daste.
Çəpiş, votdəş ğələm çəpe?
Fəhmı tijbu, tij bəbıre.
Fəhmı gijbu, gij bəbıre.
Ya ki nıbu, çiç bəbıre?
Iştı qəpon nısyə qıpe.
Ğələm bəbu bətı tabe,
Əçəy quzor çıko bəbe?
De arışte məkə tambe
Im çı xosyət, ım çı dəbe?
Dasti çəpi düz bıkə ki,
Ğələmən nınvışto tırki,
Enıkə bə dəftər çırki.
Həx qəp bıjən, həx, ədəbe.
Ğələm ıştı dasto məzlüm,
Çəpi qətə ğələmi düm
Roy oqətdəş, dəştəş bə şüm,
Qıno emdə əçəy səpe.
Hələ xomiş bı dıynoədə
Fikri-fəhmkə qədə-qədə
Dasti dəftərisə noədə,
Biə bə yod, Nicot məktəbe!
Huri mələykəş
Ay kinəle, honi roysə peməmand.
Məsut mıni, bə eşği kiə eməğand.
Bənə şo bılbıli bomıro bahand.
Azən botı raxskəm, okəm de şoy kəş,
Az ğılmonim, tınən huri-mələykəş
Im məmləkət çəmə qədə cənnəte
Cənnətədə nəve çəmə sənəte.
Eşği bəhər boəmə Xıdo minnəte
Ta ki mıni tı çı yodo beməkəyş.
Az ğılmonim,tınən huri-mələykəş!
Çi cənnəti Odəm azim, Həvvo tı.
Çı cənnəti ğıyət azim, vəfo tı.
Ki şo karde bəzne mıni sıvo tı?
Ha kenə ki, tı şin-şini bəsırəş,
Az ğılmonim, tınən huri-mələykəş!
Ha nəvedəş vəyşti vılon dılədə,
Iştı reçe dəvatdə har vılədə.
Iştı nomım nıvıştəme dılədə,
Nohəx mıku tı rəncidəş, bə qırəyş,
Az ğılmonim, tınən huri-mələykəş!
Ha nəvedəş vılıstoni de nozi.
Vıl dəçındəş bə müəxolon dırozi.
Az con doy-doy, mıku mandəş norozi,
Deştə nəzə bəmı çəp-çəp diə məkəyş.
Az ğılmonim, tınən huri-mələykəş!
Damə nıkaş mıni əqəm, bəmardem.
Iştı nomi deştə bə ğəv bəbardem.
Jıqo məzın sıxaniku bəqardem.
Nicot marde? Boəy çaşə ars eməkəyş.
Az ğılmonim, tınən huri-mələykəş!
Ğəzəl
Mı votme ki. deştə eşği, çımı eşği şin bəkardeş
Çı bənəm ki,tı beinsof, çımı dıli xün bəkardeş
Bətı votme çımı Leyliş, vote bəmı az Leyli nim,
Leyli bıbuş, ya ki nıbuş, aşiği Məcnun bəkardeş.
Ay kinəle, ve noz məkə, noziən ıştə vırəş heste,
Az eşğ doy-doy, tı noz kay-kay, mıni kosib, sun bəkardeş.
Çiç nıdome bətı, kofir? Eşği səpe dılmən dome.
Çok nığodə dastdə dıli, bə zəmin noy, gin bəkardeş.
Orzum heste, komım heste, Xıdo bıdə dilək bəmı,
Çımı eşği ğəbul bıkəş, dıli səy sərin bəkardeş.
Az Nicotim, eşğım poke, ıştı eşğe çımı damon,
Tı bəmı nəzə bırosnoş, çımı orzuon çin bəkardeş.
Umır qone…
(Bo çımı düsti, bo şair Nəriman Ağazadə. "Dardi şələ” soneti cəvob)
Ay Nəriman, umır qone, şələ ni.
Okırnedə əv əməni bə ğəzo,
Zıvon tələy, çaşon, quşon tələ ni,
Zyodə qəpon doydən bəmə har cəzo.
Bəxt dışmene, əçəy xəyım piedəni,
Iştə zınəy bəka əv de iqboli.
Çandə sore bəxti rüşnə çiedəni
De zılmoti hardə umri, ay boli.
Dıli qoni dard ebarde, ğəm hardey
Co qınoş ni, qıno fəhmi qınoye.
Fəhmi mərom, məxsəd dıli poə kardey,
Coni bə dard, bə zilləton dənoye.
Çı şairon dıl ğomğəye, vəşedə,
Har telə dard çəmə umri hardedə.
Fəhm bıkəyon bə həzo dard dəşedə,
Bo umri səy, əzroili vardedə.
Çiç bıkəmon dıyno jıqo bino bə,
De fəhmi dard ekardəmon bəştş dıl.
Əqəm inson dardi-ğəmi enıbə,
Əv inson ni, zot ğəlize, dıl pəxıl.
De biə, şəxtə jəydə bəxt bə umri naxş,
Bıpyoən ıme, nıpiyoən ıme çəmə baxş.
|
