 Çiçi xote?
Im çı rüje, çı jimone, Xıdo həxi nohəx kıştə Tolış bo jiye pəşimone, Çəmə tale büt nıvıştə.
Həxi soəx konco mandə? Şəyton həzo şəron zandə "Dindoron”ən şərin handə, Bo milləti torin rıştə.
Takardedən yaltəğə şəy, Balən ğıbon kardedən bəy, Fəhm kardənin de nıbə səy Şər çı həxi rizi şıştə.
In iqtidor boki şine? Milli siyosət vəncine Tolış deştə dardon gine, Dardi səpe darde nıştə.
Nodon heste sərəsdəni, Deştə zoti perəsdəni, Bə xəlqi loy erəsdəni, Nodonəti xəlqi bıştə.
Tolış qardə zıvoniku, Votdə doydə ın zıvon bu, Şedən bə yodon sələfu, De hışkə umi bə maştə.
Rəğisə kıft rome-rome, Jıqo zındə rüj çok bome, Xəbəş nişe səş bə bume, Hışkə vədon bedə çaştə.
Nicot, ənnə "zıvon” vote, Zıvoni qəvədə pate, Millət qardə çiçi xote? Jəydə bə zıvoni taştə.
Nüə Tolış Bo Baladdin Veşero
Çaş vindəni ıştə ji poy, Qıne-qıne nıştə bə loy, Im Avropa tojə bəloy, Dəqijyedə kuə tolış Perəsedə nüə tolış.
Votdən Avropa məktəbe, İnteqrasiya tojə dəbe, Diyəkə həni çiçon bəbe? Bə dəb bome qıyə tolış, Perəsedə nüə tolış.
Veşo məvot fəhmədone, Diyəkə bıvind kom zəmone, Iştı dasto əl-əmone, Cifiş pur, səş təyə tolış, Perəsedə nüə tolış.
Dədon, nənon tolışə xon, Kaştən, zandən bezot, nodon, Ov kardən con bo ğətıon Şəyton bedə "feya”, tolış. Perəsedə nüə tolış.
Zıvon okardən, yod bedən, Boəməro tufon, bod bedən, Bo tolışon ofot bedən, Bo yodon şoy noyə tolış, Perəsedə nüə tolış.
Pərtə bıyon dəm kəşedən, Dıli puri ğəm kəşedən, Nodırıston çəm kəşedən, Beşdə bə puç zoyə tolış, Perəsedə nüə tolış.
Pərt bəkəson partokratin, Dəm jəkəson demokratin, Narkomanon Hippokratin, Əzoədə xun həyə tolış, Perəsedə nüə tolış.
Im votedə, əv məsdəni, Əv votedə, ım məsdəni, Xıdo həxi sərəsdəni, Həx hastə, be xəyə tolış, Perəsedə nüə tolış.
Zıvon həni beməsrəfe, Zıvondoron nitqon səhfe, Din, imon bə kon tərəfe? Bə co səmt dim doə tolış, Perəsedə nüə tolış.
Məjən tanə, ım çı tanəy? Zərdüsti kiyə həni kanəy, His bıdo çə kiyə ranəy, Dəqiş kardə moyə tolış, Perəsedə nüə tolış.
Çı Bobilo tasə Albon, Jimon əkəyn tolışə zon, Mətəl mandəm bı səmə kon, De co nomi şoyəy tolış, Perəsedə nüə tolış.
Həni məqət həxi nomə, Millət bə puli sa çəmə, Qur voşnedən ıştə tamə, Taməş tijə-tiyə tolış, Perəsedə nüə tolış.
Ay Baladdin, həni vəse, Dard peş bə xırtdə, etəse, Moğol be aryon həvəse, Cır bə ıştı düə, tolış. Perəsedə nüə tolış.
"Tolışon Sədo” N: 57 26 noyabr 2013
|
