 Ponə sori aprelə mangədə çəmə millət ıştə qiləy yolə zoəşən qinış karde – Qəhrəmanov Davlət Muslimi zoə.
"Toloşi Sədo” qəzeti ımsornəki fevral nomrədə dərc bıə "Azi Aslanov - General Şimon” oçerkədə Davlətə mamu həxədə xəyli məlumat doəmonbe. Bilavasitə əçey zəhmətbe ki, bəmə iyən bə dınyo Həzi Aslanovi həxədə ve marağinə fakton oşko be. Bə Davlət mamu qəzeti im tojə beşə nomrə rosneədə, iyən əv ə risalə handeyədə ıştə çəşə arsonış ogəte zinəşnıbe.Əlbəsahət ıştə diko - Ostoro rəyoni Şiəkaniko bəmə zanqış kardəbe ki, bəs, "az ım nıvıştəyon handeko si bedənim və şıməko ve xaiş kardəm ki im oçerki çı uruson qazetonədəən çap bıkən, bıdə həmmə insonon bıznon ki, Həzi kom dərəcədə toloşi zoə toloşebən”. Peşo, bəmə vıtışe ki, az ıştə ha manqinə pensiyə i hissə bə "Toloşi Sədo” komək bəvgandem ki, bıdə əv niməroədə nımando, bıdə hejo beşo... İm çand mang bəna sobət be deəy... Hətta, bəçəmə telefoni "otboy” ədə ki, "Bokuədə bəşmə pül lozim bəbe, bıdə ve kontur nışo”. Im kosibə merdi – sipirişi dıl çəxtə hovüj be, iqləm Xıdo zındəbe...
Davlət mamu hələm 1990-91-nə soriku çəmə tolışə cəmiyyəton aktivist be, əçey ve iclasonədə iştirak əkəy, ıştə məsləton ədəy... Əv Nəvuzəli muəllimi qəte bəpeşt bə rəsmion ıştə etiraz bıkə iminə odəmondə be... Bo milləti omə rujon fik karde-karde, dılış süte-süte əmənı tərkış karde Davlət mamu...
Xıdo rəhmət bikə tıni, Davlətə mamü! Xido ıştı vırə cənnətin bikə İnşallah...
Azərboyconi iən Toloşi məhşur şairə zoə Mehman Qaraxanoğlu ıştə "Bəy bışum Xıdo?” kitobədə bə Davlət Qəhrəmanovi həsr bıə "Sıği zoə sığimbən az...” şeeri məhz əçey zıvoniko votedə. İm şeerədə Davlətə mamu bəçəmə milləti sə vardəbə tarıxi behəxətion, iyən xəlxi bə ım behəxətion bənə ə sığon çoknə tov varde sute-sute təsvir bedə... İm şeer əncəx çi Mehmani ne, həmən çı DAVLƏTə mamu fəryade...
Rəhməttığ Davlətə mamü ım fəryadi bıdə bəyjiə odəmon bıməson...
Sıği zoə siğimbən az...
Dunom tij kay... rosım bıryə,
Dərğəz bəm az... soğon bəm az.
Umrum doə, sığım hıryə,
Sıği zoə sığimbən az...
Təyli mandəm ya de bonəm,
Bıkıştən, bə zəmin bınən,
Azən qıləy sıği bınəm,
Sıği zoə, sıginbən az...
Çımı ğəbi sığon bəy şin?
Nımande, zəminiku beşin.
Çımı ğəbi sığon şin,
Sıği zoə sıginbən az...
Mandin, dashordə mandin,
Çanqə, dasondə mandin,
Çaşə arsondə mandim
Sıği zoa sığinbən az...
Redaksiyə Heyəti
|
