 Yaxud əzəmətli Talış sıra dağlarının ətəklərindəki kəndlərin hər üç evdən biri nədən qıfıllıdır?
Son günlər Masallı rayonunun Sığdaş kənd ərazi nümayəndəliyi üzrə bəzi araşdırmalarımızı hörmətli oxucularımızın diqqətinə çatdırmaq istəyirəm.
Sığdaş ərazi vahidi üzrə nümayəndəliyinin tərkibində 4 kənd vardır.
Ərazinin kəndləri Talış sıra dağlarının ətəklərində yerləşir. Bu kəndlər gözəl relyefi, istedadlı insanları, müdrik ağsaqqalları ilə həmişə seçilmişlər.
SSRİ dağılandan sonra sanki bu kəndlərin ağlar günləri başlamışdır. Heyvandarlıq, balçılıq, çayçılıq və bağçılıq təsərrüfatları darmadağın edilmiş, torpaqlar qanunsuz olaraq məkrli insanlar tərəfindən mənimsənilmişdi. Danışan ağızlara isə qıfıl vurulub. Yəqin buna görədir ki, Talış bölgəsində ən "xodovoy” şey qıfıldır. Soruşa bilərsiniz ki, nə üçün qıfıl "xodovoy”dur?
Maraqlansanız görərsiniz ki, bu kəndlərin məktəblərində təhsil yox səviyyəsindədir. Rüşvətxorluq, korrupsiya ucqar Xanalion kəndinə qədər nüfuz edib. Təsəvvür edin, varlığı kağız üzərində olan bu kənddə tibb məntəqəsinin binası yerli-dibli yoxdur. Yollar bərbad vəziyətdədir. Kasıb kəndlinin rayon mərkəzinə gedib çıxması muşkül məsələdir. Belə neqativ hallar barədə KİV-də kifayət qədər karikatura və tənqidi yazılarla çıxışlar etmişəm. Əlaqədar təşkilatların tədbir görməsi əvəzində polisin "qıfılları” ilə təhdid edilmişəm.
Ərazidə baş alıb gedən özbaşnalıq və qanunsuzluqlarla əlaqədar bu kəndlərin icra nümayəndəsi İsrafil Əliyevə, Masallı rayon icra başçısı Qəzənfər Ağayevə verdiyim jurnalist sorğularım qulaq ardına vurularaq, onlara heş bir cavab verilmir.
Gənclərimiz şəxsiyyət vəsiqəsini rüşvətsiz ala bilmir. Ordudan tərxis olunanlar rüşvətsiz qeydiyyata düşə bilmirlər… Bu məmləkətdə gənclər özlərini heç kimə lazım olmayan kimi hiss edərək, doğma yurdlarını tərk edib Rusiyaya və digər xarici ölkələrə getməyə üstünlük verirlər. Gözəl qızlarımız öz tale qismətlərini gözləməkdən "rəşidələrə” çevrilirlər…
Dərdlərimizdən yazmaqla "qıfılın” mahiyyətini az qala unutmuşdum.
Bu ölkədə düz danışanı "separatçı”, "təxribatçı”, "ekstremist”, "xuliqan”, "narkoman”, terrorçu”, "polisə müqavimət göstərən” və başqa adlarla damğalayıb damlayırlar. Buna baxmayaraq, bəzi qeydlərimi oxucuların diqqətinə çatdırmağı özümə borc bildiyimdən, biri digərindən 1-2 km məsafədə yerləşən ərazimizdəki dörd kəndi tənbəllik etməyib gəzdim.
İlk baxışdaca çoxlu maraqlı faktlar üzə çıxdı. Rəsmi qeydiyata görə bu kəndlərdə guya 3850 nəfər yaşayır, bu kəndlərdə 578 ev vardır. Hesablamalarımıza görə bu əhalinin 1302 nəfəri xarici ölkələrdə yaşadığından düz 144 fərdi evin qapılarından qıfıl asılmışdır.
Stalinizm dövründə çox ocaqlar söndürüldü, məşhur din xadimləri, böyük alimlər, talantlı sənət adamları Rusiyanın qarlı, buzlu reqionlarına, əsasən də Sibirə, Qazaxstanın boz səhralarına departasiya, sürgün edildilər. Bu gün isə minlərlə vətəndaşlarımız mövcud hökumətin səriştəsizliyindən cana doyaraq, bir tikə çörək dalınca, o yerlərə öz istəkləri ilə məəcburi departasiyaya məhkum edilmişlər. Hələ bədbəxt, talesiz "Fatma, Tükəzbanları” - ana-bacılarımızı nə hala düşdüklərini demirəm. Bu ayrı araşdırmaların utanc gətirən mövzusudur.
Bu yerdə sanki alverlə məşğul olanlara bir tövsiyə etmək yerinə düşür: qoy çoxlu qıfıl sifariş verib gətirtsinlər Masallının təzə tikilmiş bazarına. Bu əhali ki, bu cürə köç edib gedir, qapılardan asmağa tezliklə QIFIL tapılmaz…
DADAŞİ Mətləb,
Masallı rayonu, Sığdaş kənd sakini,
25.01.2011
|
