 Yaxud Masallı rayonunun kəndlərində olan kurqanlar bəzi məmurların əli ilə dağıdılmasının səbəbi nədir?
Öncə rayonun Babakücə (Bobokujə) kəndinin adının asimilyasiyaya məruz qalması barədə:
Bu kəndin adı qədim zamanlardan Bobokujə, sonralar Babakücə ilə (Foto: qəbristanlıqda tikilmiş ev) əvəzlənmiş, yeni müstəqillik dönəmində isə kənd camaatının şəxsiyyət vərəqələrində, sənədlərdə səhv olaraq Babakujə əvəzinə Babaküçə kimi yazılmıdır. Aidiyyəti ünvanlara çoxsaylı şikatətlərimdən sonra, mənim və qohumlarımın şəxsiyyət vərəqələri düzəlişlə dəyişdirildi. Digər vətəndaşlarımız isə vəsiqələrini rüşvət verməklə dəyişdirdilər...
Bu kənddə əvvəl fermer təsərrüfatı, sonradan bələdiyyə sədri olan Hacı Əyyar Nuriyev və hazırda ərazi üzrə icra nümayəndəsi İsrafil Əliyev əhalinin payıbəlli torpaqlarını elə bir hala salıblar ki, fələk də baş aça bilməz. Bu azmış kimi, kəndin əsrlərcə tarixi olan uşaq qəbiristanının yerini sataraq orada fərdi evlər tikintisinə yol veriblər. Bu haqda da çox yazdıq ki, bu qəbiristan "Kurqan”dır, tariximizdir. Mədəniyyət və turizm nazirliyinin nümayəndəsi gəldi, aldığını aldı, arayiş da verildi ki, Babakücə adlı kəndinin ərazisində "Kurqan” adlı tarixi abidə yoxdur. Uşaq qəbiristanı isə həyətyanı torpaq kimi ona-buna paylandı, biz baxa-baxa qaldıq...
Babakücə kəndindən üçcə km aralıda Kolatan (Kuləton) kənd ərazi vahidliyində də oxşar özəlliklər vardır. Bu kəndə daxil olan hər kəs yolun sağ-soluna baş çevirəndə, gözlərinə dik və məğrur baxan qoşa-qoşa "Kurqan”lar ona sanki deyəcək ki, "mənim içimdə əzəmətli Talış diyarının, qədim Midiya, Mannanın sirləri gizlənib. Gəl məni araşdır!”
Yenə qarnından irəlini görməyən yerli, milli məmurlar kəndin girəcəyindəki "Kurqan”ın lap yuxarı hissəsini həyətyanı torpaq kimi ona-buna satıblar.
 Allaha inanclı adamların diqqətini bir anlığa "Lenin baba”ya yönəltmək istəyirəm. Bircə diqqət edin: Leninin kommunist-ateist övladları həmin "Kurqan”lara dəymədilər, "tariximizdir, qəbiristanımızdır, "Kurqan”lara dəysək, babalarımızın ruhu inciyər”, - dedilər. Amma indiki "allahlılar”, ”mömin dindarlar” o "Kurqan”lara qıydılar, yerlə yeksan edib, üstündə evlər, imarətlər, hamamlar, tualetlər tikdilər. Və Allah birinə öz möcüzəsini göstərdi. Adını çəkmirəm, amma fotosunu ayrıca çəkib verirəm. Bir varlı-karlı kolatanlı o "Kurqan”ların birində həyətyanı torpaq aldı, yurd bünövrəsini tökdü, hətta evini yarıyacan götürdü də. Lakin hansı səbəbdənsə, tikili öz-özünə uçulur, hansı qüvvə isə binanın tikilib başa çatmasına imkan vermir...
 Bu günlərdə məlub olub ki, digər "Kurqan”lar da həyətyanı sahə kimi satılıb əhatəyə alınıb. Hətta ev tikmək üçün mişar daşları da tökülüb. Rəsmilərdən bu barədə məlumat toplamaq istədim. Əfsus ki, bu ölkədə məmurlardan lazımi informasiya almaq müşkül məsələdir.
Görünür, KİV haqqında qanun, AR Konstitusiyasının 50-ci və 80-ci maddələrinin tamamilə ləğv edilməsi barədə məmurlarımız çoxdan baş sındırırlar. Yəqin ki, "yaptokrat” deputatlarla MM-dəki süni "cırtdan-müxalifət” deputatlar bir araya gəlib KİV haqqında qanunun yuxarıda göstərilən maddələrinin ləğv olunmasına nail olacaqlar.
Onsuz da, "bizim məmurlara” yol verdikləri qanunsuzluqları heç cur isbat etmək olmur. Hətta "bizim polisimiz” xalqı yox, onları müdafiə edir: ortada ölüm faktları olsa belə, həyasızcasına başqa don geydirib qanlını, qatili safa çıxardır...
Bu barədə söz çoxdur, mətləbdən uzaqlaşmayaq. Bəzən düşünürəm ki, tariximizə, keçmişimizə görə narahat olmağa dəyməz bəlkə də. Onsuz da tarix çox vaxt saxtalaşdırılır, əsl həqiqətləri bərpa etməyə uzun illər lazım olur, lap elə dünən gözümüzün önündən keşən tarix kimi...
O qədər problemlərimiz var ki, yazar birindən digərinə keçid alır, heç bilmir, hansını önə çəksin. İcra nümayəndiliyi və bələdiyyələrə tövsiyəmiz budur ki, Allahın yaratdığı, babalarımızın qoruyub bizə əmanət qoyduğu torpaqlarımız gen-boldur, oralarda hərlənib- fırlanıb həmişəlik olaraq, Sizə də, "ağalarınıza” da bəs qədər "yem” var. Nə qədər yeyir, tıxırsınız, özünüz bilərsiniz. Amma bir gün o "Kurqan”ların birində Siz də torpağa qarışacaqsınız. İstəmirsinizsə, qəbirlərinizi dağıdıb sümüklərinizi tualet sularında yumasınlar, bəri başdan irs-ənənə qoyun, "Kurqan”lara dəyməyin, qoy altında yatanlar rahat uyusunlar!
"Kurqan”ların ləğv edilməsi tarixə dönüklük, millətə xəyanət, ən ağır cinayətdir. Buna hər vətəndaş məsuliyyət daşıyır, bundan heş kəs yaxasını qırağa çəkə bilməz. Bu gün olmasa, sabah cəzasını çəkəcək, dirisi olmasa, ölüsü mükafatını alacaqdır.
DADAŞİ Mətləb
Azərbaycan Jurnalistlər Birliyinin üzvü
|
