Əli Axundov kənd xəstəxanasında həkim olmadığını bildirdi. Bununla belə həkimsiz xəstəxanaya təcili yardım maşını verilib. Nəticədə hələ də xəstələri şəhərə tabutda aparırlar:

«Xəstəyə həkim gərək iynə vursun. Həkim isə yoxdur. Özümü müalicə etmək üçün kredit götürmüşəm. Lankonda kim ot, yarpaq yeyir ki, mən yeyim?».

Müsahibimiz sosial yardımın verilməsində də ədalətsizliyə yol verildiyini deyir: «Ünvanı sosial yardımı hər kəs ala bilmir. Kimin imkanı, maşını var alır. Fağır-füqəra yardım ala bilmir».

Kəndin əkin sahələri boşdur. Sahələr əkilmədiyindən torpaq yararsız hala düşüb. Gözə az da olsa mal-qara dəyir. Kənd yolunda rast gəldiyimiz adamların əksəriyyəti danışmaq istəmir. Səbəbini soruşanda, deyirlər ki, bunun xeyri yoxdur.

Kənd sakinlərindən bəziləri isə vəziyyətdən razılıq edirlər. Cahid Tahirov deyir ki, Azərbaycan müstəqillik qazanandan sonra kəndə xeyli irəliləyiş var: «Yollar, Allaha şükür ki, xeyli düzəlib. Əvvəllər bura ərzağı traktorla, hətta 1969-cu ildə vertolyotla gətiriblər. Yol olmayıb. Şükür Allaha ki, dövlətimiz müstəqillik əldə etdikdən sonra yolumuz da bərpa olunub».

Kənd sakinlərin deməsinə görə, qış burada sərt və uzun çəkir. Qar yağandan sonra kənddən kənara çıxmaq olmur. Buna görə yay və payız aylarında qışa hazırlıq görülür. Əsasən ərzaq tədarük olunur. Hər ailə çörəklə özünü təmin edir. Demək olar ki, hər evdə təndir gördük.

Qəqıron ərazi icra nümayəndəsi İsmayıl Cəfərov isə görülən işlərdən danışır. Kəndlərə elektron telefon xətləri çəkilib. Bir çox yerlədə içməli su problemi öz həllini tapıb:

«Bəzən Bakı şəhərində işıqlar kəsilir, bizim ərazimizdə isə işıqlar yanır. Sayğac quraşdırılıb. Yolların asfaltlaşdırılması nəzərdə tutulub».

İcra nümayəndəsinin deməsinə görə, kəndə yolları asfaltlaşdırandan sonra sıradan çıxmış çay sahələri bərpa olunacaq. Bu da kəndlərdə işsizliyin azalmasına səbəb olacaq. O deyir ki, bu yaxınlarda avtobus məsələsi də düzələcək: «Avtobus sahibi ilə görüşmüşəm. Bu yaxınlarda işə başlayacaq».

Qəqıron kəndi bizə keçmişi xatırlatdı. Buradakı evlər əsasən Sovet dövründə inşa edilib...