Eldəniz Quliyev

Bilən də, bilməyən də, istəyən, istəməyən də, bacaran, bacarmayan da birlikdən, həmrəylikdən danışır, yazır… Bir yandan, əlbəttə ki, bu sayaq istək və arzular təbii və anlaşılandır. Bu gün talışların parçalanıb pərən-pərən düşməsinə və hər hansı daxili antoqonizm səbəbindən çatlar yaranmasına qətiyyən yol vermək olmaz. Xalqın təkamül və mövcudluğunun zəmanəti üçün MİLLİ BİRLİK faktoru olduqca mühüm şərtdir. Digər tərəfdən, təəssüflər ki, bu çağrışları edənlərin özləri bilməyərəkdən (bəzənsə bilərəkdən!) Talış xalqının real konsalidasiya cəhdlərinə ciddi zərbələr vururlar.

Bəs, milli həmfikirliyə, vahid mübarizə strategiyasına necə nail olmalı? Hansı üsul və vasitələrlə, hansı yol, yaxud yollarla hərəkət etməli? Ağı qaradan, haqqı nahaqdan, xeyirxahlığı bədxahlıqdan necə ayırmalı?.. Bu və bu kimi müqəddəratyüklü suallara cavab aramaq əvəzinə, məsələlərə bəzən: "Mən deyəni demirsənsə, məni yamısılamırsansa, deməli mənimlə deyilsən. Mənimlə deyilsənsə, deməli, düşmənimsən" prinsipi ilə yanaşılır. Belə mühakimə yürüdənlər, eynilə danqıldadıqca xaric səslənən zərb alətinə, yaxud oxuyanda «xoruz buraxan» naşı toy müğənnisinə bənzəyirlər.

HƏQİQƏT isə birdir! Və O, eyni məsələyə müxtəlif düşüncəylə yanaşma, eyni problemə müxtəlif rakurs və prizmadan baxış, eləcə də sağlam diskusiya və polemikalar sayəsində ortaya çıxır. Təki sən problem və müşküllərin pozitiv həllində həqiqətən maraqlı olasan!.. 

Ağıldan kəm, boş iddia və təkəbbürdə çox böyük olanlar gərək kənar qalıb ümumi işlərə pəl vurmasınlar. Onsuz da onlardan xeyir gəlməyib, gəlmir və yəqin ki, heç gəlməyəcək də — bu dil pəhləvanları heç olmasa, ziyanəvərlik eləməsinlər…

Əlbəttə, bu gün — inam və ümid işartıları göründüyü həssas bir məqamda, Respublika Talış Mədəniyyət Mərkəzinin, Azəri-Talış İctimai Birliyinin təşəkkül tapdığı bir ərəfədə hər bir mütərəqqi düşüncəli talış öz xalqının istək, arzu və məqsədlərinə doğru birgə, yan-yana, çiyin-çiyinə addımlamalıdır. Milli-mənəvi dəyərlər sistemini, dilini, dinini, adət- ənənəsini, mental kodlarını, mədəniyyətini, nəhayyət -Milli Kimliyini qorumaq naminə. Ən azından, süni şəkildə Talışın ünvanına, az qala «nakolka» təki döyülüb — həkk olunmuş «separatçı» damğasından bilmərrə xilas olmaq xatirinə!..

Ən başlıcası isə, bu gün hər kəs Birlik, Həmrəylik və Ünsiyyət zərurətinin sosial ehtiyacdan yarandığının fərqində olmalıdır. Məhz elə bu səbəbdən də, bir-birimizə (bunu, özümü sizlərdən ayırmadan qeyd edirəm) dediyimiz səmimi sözü, məsləhəti və iddiaları anlamalı, dərk etməli və xalqın — ulu Talış Xalqının BİRLİYİ, müvafiq olaraq, GƏLƏCƏYİ naminə sözdən əmələ keçidi ehtiva edən möhkəm və davamlı VƏHDƏT körpüsü qurmaq üçün toparlanmalıyıq.

Talış xalqına və Talış zonasında yaşayanların hamısına xoşbəxtlik arzusu ilə!

Azinform.az