 Orta məktəblərin buraxılış imtahanlarında adətən Talış regionu ən aşağı nəticə göstərirlər. Ötən il respublika üzrə Masallı, bu il isə Astara (Ostoro) rayonu sonuncu yerdə qərar tutub.
Masallı rayon təhsil şöbəsinin müdiri Astan İbişov bu il 1243 nəfərin attestat aldığını deyir. Onlardan 238 nəfəri ali məktəblərə daxil olub. Bunların da 39 nəfəri 500-dən, 11 nəfəri isə 600-dən yuxarı bal toplayıb.
Masallıda çıxan «Cənub xəbərləri» qəzetinin redaktoru Zahir Əmənov isə hesab edir ki, buraxılış imtahanlarının nəticələri şərtidir: «Bu il attestat alanların bir çoxları 100 baldan yuxarı keçə bilmədi. Bu attestatların verilməsi də dəqiq deyil. Harada ki nəzarətçilərlə dil tapa bilirlər, orda nəticəni yüksəldə bilirlər. Harada bu alınmır, orda aşağı olur. Ötən il ölkə mətbuatında çıxış etdik ki, attestatlar üçün pul yığılır. Bundan sonra Təhsil Nazirliyi bunu nəzarətə götürdü. Bir çox məktəblərdə saxtakarlıq edə bilmədilər. Nəticədə Masallı attestat alanların sayına görə sonuncu yeri tutdu. Həmin nəzarət respublikanın hər hansı bir rayonunda olsaydı, yəqin ki, orda da buna oxşar nəticə olardı».
Astara təhsil şöbəsində də belə hesab edirlər ki, buraxılış imtahanları heç də təhsilin aşağı olduğunu göstərmir. Rayon təhsil şöbəsinin müdiri Qızbəs Məmmədova deyir ki, bu ilki qəbul imtahanları onlar üçün uğurlu keçib. Bu il 1124 nəfər orta məktəbi bitirib. Onlardan 143 nəfəri respublikanın müxtəlif ali məktəblərinə daxil olub. Ali məktəbə daxil olanlardan 4 nəfəri 600 baldan, 23 nəfəri 500 baldan yuxarı toplayıb. Ötən il bunların sayı 11 nəfər olub.
Astara rayon Şiyəkon kənd 2 saylı orta məktəbin müəllimi, Yeni Azərbaycan Partiyasının üzvü Həbib Həbibov isə bu göstəricilərin təhsilin aşağı olduğunu sübut edən faktorlar sayır: «Keçən il Astara təhsil şöbəsinin müdirini «Tərəqqi» medalı ilə təltif edən Misir Mərdanov bu il deyir ki, Astara təhsili ən axırıncı yerdə gedir. Kimdir günahkar? Son dövrlər bir sinfi idarə edə bilməyən, təhsildən başı çıxmayan adamlar vəzifəyə gətirilirlər. Verdiklərini geri almaq xatirinə dəridən-qabıqdan çıxırlar. Müəllim əməyinə, müəllim adına ləkə gətirirlər».
Həbib Həbibov hesab edir ki, vəziyyətin müsbətə doğru dəyişməsi üçün birinci növbədə dəmir intizam lazımdır: «Güclü nəzarət lazımdır. Kadr siyasətini düzgün qurmaq lazımdır. Bir zamanlar valideynlər iclası çağırılardı. Son zamanlar bunlar əhəmiyyətini itirib. Bizim rayonda təhsil iki yerə bölünüb. Bir var 5 günlük iş həftəsi, bir var 6 günlük iş həftəsi. Nə 6-cı saat, nə də 7-ci saat keçirilir».
Həbib Həbibovun dediyinə görə, heç bunun üçün şərait də yoxdur. Siniflər qızdırılmır. Bufetlər işləmir: «Təhsili idarə edənlər onun səmtini başqa yerə aparırlar. Təhsil müvazinətini itirir. Astarada təhsil uçuruma gedir».
Lankon Müəllimlər Cəmiyyətinin sədri Rahim Nuriyev (foto) də mərkəzə nisbətən bölgələrdə təhsilin ildən ilə gerilədiyini söyləyir: «Respublikada təhsillə bağlı islahatlar aparılır. Çox təəssüf ki, islahatlar birtərəfli aparılır. Bu gün islahat aparılır, proqramlar sahəsində, dərslik sahəsində. Amma idarəetmə sahəsində heç bir islahat aparılmır»”.
Rahim Nuriyev deyir ki, bütün mövcud problemlər təhsildə idarəetmənin düzgün təşkil olunmadığından irəli gəlir: «Təhsil sahəsində nailiyyəti olmayan, uğuru olmayan adam əməkdar müəllim adını alır. Zəhmət çəkən, gecə-gündüz işləyən adamlara qiymət verilmir. Məktəblərin qızdırılması, vəsaitlərlə təmin olunması məsələlərində də problemlər var. Nazir özü də deyir ki, məktəblər kompyuterləşdirilib. Bir kompyuter otağı ilə məsələni həll etmək mümkün deyil. Bu gün nəticələr göstərilir, səbəb yox. Birincisi, direktor yerində deyil, ikincisi, müəllimlər lazımi səviyyədə deyil, üçüncü isə müəllimlərin işinə nəzarət yoxdur. Ən nəhayət, onların təminatı yoxdur».
AzadlıqRadiosunun materialı üzrə
|
