İsmayil Şabanov: "RATİ təşkilatçılarına hücum – hamıya zərbədir"
Azərbaycan rəsmilərinin AzərRos prezidenti Söyün Sadıqova qarşı başladığı kampaniyaya Rusiyada fəaliyyət göstərən digər diaspora təşkilatlarından da cavab gəlir. "Talış diasporası” RİT-nın prezidenti İsmayıl Şabanov da S.Sadıqova qarşı olan hücumları pisləyən bəyanatla çıxış edib.
Diaspora rəhbətinin "Azadlıq”a göndərdiyi bəyanatda deyilir:
Məlum olduğu kimi, son vaxtlar Azərbaycanın rəsmi şəxslərinin dilindən Rusiya Azərbaycan Təşkilatları İttifaqı təşkilatçılarının, qurumun sədri Abbas Abbasovun, xüsusən də AzərRos prezidenti Söyün Sadıqovun və tanınmış kinorejissor Rüstəm İbrahimbəyovun ünvanına əsassız və qərəzli fikirlər müntəzəm xarakter alıb. Əslində isə bu hücumlar ifadə azadlığı və Azərbaycandan gələnlərin də bir hissəsi olduğu Rusiya cəmiyyətinə qarşıdır. Onlar özlərini bu ölkə ilə, ordakı dəyərlərlə eyniləşdirir, Rusiya qanunları əsasında fəaliyyət göstərir və bu qanunlara əsaslanaraq ictimai təşkilatlar yaradır, Rusiyanın ictimai-siyasi həyatında iştirak edir.
Məlum olduğu kimi, bu kimi milli ictimai təşkilatlar yaratmaq üçün digər ölkələrin siyasətçiləri, o cümlədən bizim kiçik vətənimizin nümayəndələri ilə məsləhətləşməyə ehtiyac yoxdur. Hesab edirəm ki, bizim bəzi azərbaycanlı deputat və məmurların bu kimi hücumlarına göz yummağa haqqımız yoxdu. Dünən öz hüququnu tələb edən sadə azərbaycanlılar təhqirlərə məruz qalıb, bu gün – Rusiyada yaşayan ziyalılar və diaspora nümayəndələri, bəs sabah kim…? Ona görə biz nəinki öz əsas dəyərlərimizi aşılamalıyıq, həm də onları birgə müdafiə etməliyik. Heç bir halda bizim icma və ziyalılarımızı təhqir etməyə imkan verməməliyik.
Bu yaxınlarda azərbaycanlı deputatların Söyün Sadıqovun ünvanına hücum və təhqirləri nəzərə alaraq mən gələcəkdə bu kimi münaqişələrin qarşısını almaqda icma rəhbərlərinin oynaya biləcəyi əhəmiyyətli rolu gözdən keçirirəm. Məhz onlar birgə cavab verməli və xarici ölkələrin hakim strukturlarına öz yerini göstərməlidir. Hesab edirəm ki, bu kimi hallarda Rusiya hakimiyyəti də müvafiq reaksiya verməlidir və xarici ölkə nümayəndələrinin Rusiyadakı ictimai təşkilatların fəaliyyətinə qarışmasının yolverilməz olduğunu anlatmalıdır.
«Talış diasporası» RİT-nın prezidenti kimi AzərRos prezidenti prezidenti Söyün Sadıqova dəstəyimi ifadə edirəm və hesab edirəm ki, onun RATİ çərçivəsində fəaliyyəti çoxmillətli Rusiya cəmiyyətində millətlərarası həmrəyliyin möhkəmlənməsi yönəlib. RATİ təşkilatına və onun təsisçilərinə ictimai-siyasi fəaliyyətlərində uğurlar arzulayıram. İsmayıl Şabanov, «Talış diasporası» RİT prezidenti Azadlıq Qəzeti
