"Azadlıq” qəzeti martın 31-də narkotik ittihamı ilə həbs olunan ilahiyyatçı Taleh Bağırovun martın 24-də məscidlərin birində söylədiyi xütbənin mətnini yayıb:
- ...Hansısa bir nazirə söykənib aləmi bir-birinə qatır. Nə gəldi – danışır, hara gəldi – gedir, kimi istədi – öldürür. Qanunsuzluq baş alıb gedir. Soruşanda niyə belə edirsən, deyir mənim adamım filankəsdir. Filan nazirdir, baş nazirdir, yaxud ölkənin başçısıdır.
Sənin arxanda kim dayanıb? Sənin arxanda Allah dayanıb. Bəs sən niyə qorxursan? Niyə çəkinirsən? Onun adamı heç kimdir. Sənin söykəndiyin isə yerin-göyün xaliqidir. İndiki zalımlar, zalım hakimlər kimdir ki, fironların qarşısında. Bunlar dünən çıxıb ortalığa. Tarixin fironları olub, zalımları olub. Bunlar kimdirlər ki? Bunların yüzünü bir tərəziyə qoysan, bir firon ola bilməz.
Bu gün biz fironların, zalımların qarşısında dayana bilmiriksə, özümüzdə problem var. Əgər bir insanın qəlbi geniş olsa, bir insan həqiqətən əqidə sahibi olsa, inansa ki, yerin, göyün sahibidir Allah və bilsə ki, Allah-təala bizi bu dünyada imtahan üçün yaradıb, bu zalımların qarşısında dayanmaq lazımdır, o insan heç kimdən qorxmaz.
Nə qədər torpaqlarımızı Azərbaycanda işğal ediblər. Nə qədər yerləri alıblar. Haram-haram pullarla, xalqın pullarıyla. Hələ onların haqq-hesabını danışmırıq. Xalqın torpağın əlindən almısan, neftini yemisən, pulunu yemisən, sot-sot torpaqlarla yer almısan, sənə söz deyən yoxdur. Gör nə qədər həddini aşmısan, indi gəlib məscidin içində hökmranlıq etmək istəyirsən? Bu həddi aşmaq deyil, nədir? Bu yer Allahın yeridir. Məscid Allahın evidir. Hansısa boynuyoğun məmur olsun, kim olur-olsun, gəlib məscidin içində hökm edə bilməz.
Biz sakit dayanırıq, biz səbr edirik, hədlərini aşırlar. Bu nə deməkdir: məscidə gəlmək olmaz. Qorxurlar. Yığdıqları pullar, mülklər, var-dövlət əllərindən çıxar. Bundan qorxursunuz. Biz canımızı verəcəyik, malımızı verəcəyik, qorxmayacağıq, ancaq sizi də qoymayacağıq rahat yaşayasınız. Artıq vaxt keçib. Bu qədər xalqa zülm edəsən, bu qədər cinayətləri edəsən, özünü məsum aparasan. Bizlər deməliyik ki, xalqın torpağını işğal eləmisən, çıxın. Bu sözlər ki, burada danışılır, kim bunları danışmalıdır? Cinayətkarlar danışmalıdır, yoxsa xalqın dinini, namusunu qoruyanlar? Erməni 20 faiz torpaqlarımızı işğal eləyib. Bir dərdimiz bu. Bəziləri də gəlib öz məmləkətimizdə torpaqlarımızı işğal ediblər. Xalqın malını, mülkünü öz haqq-hesablarına keçiriblər. Pulunu, malını, neftini, qazını – hər bir şeyini alıb mənimsəyiblər. Bununla kifayətlənməyib dindarların, cavanların da üstünə də gəlirlər.
Əgər Allaha bir insanın etiqadı olar, bu məsələdə dönüklük göstərməz. Bu məsələdə kim geriyə addım atdı, bilsin ki, Allaha imanı yoxdur. O şeytan ordusu, şeytanın adamı gör nə qədər cürət tapıb, bizim üstümüzə gəlmək istəyir. Əgər sən həqiqətən Allah istəyən dinə, əqidəyə sahibsənsə, Allaha inanırsansa, güc səndədir. Güc möminlərdədir. Onların rəbbi Allahdır. Sənin o tüfəngin, topun, qara maskalın, göy maskalın, ağ maskalından bizə bu dünyada bir şey edə bilərsən. Biz demirik ki, heç nə edə bilməzsən, ancaq bu dünyada edə bilərsən. Bizi bu dünyada öldürə bilərsən, ancaq onu bil ki, özün də öləcəksən. Onu bil ki, bu şəhadətlər, bu həbslər sənin axırına çıxacaq. Necə ki, Yezidin axırına çıxdı, İmam Hüseyni şəhid elədi, Əməvi xilafəti silkələndi, vallahi artıq bu şeylər görünməkdədir. Bu günün Əməvi xilafəti silkələnir artıq.
