 "Mən Amerikanı sevirəm, amma o, mənim xoşuma gəlmir”
Bu sözlər LUİS SİNKLERƏ- ABŞ-ın Nobel mükafatına layiq görülən ilk yazıçısına məxsusdur ("Seçilmiş əsərləri”, B. 2010, səh. 5).
Oxşar ifadəni Azərbaycana da şamil etmək yerinə düşər. Bəli, əksər Azərbaycan vətəndaşları irqindən, cinsindən, millətindən asılı olmayaraq onu sevir.
Bəs xoşlarına gəlməyən nədir?
Çoxlu real əsaslar olsa da, bəzi olaylar indi hər kəsi narahat etmədədir. Ən birincisi, hər dövlətin bel sutunu onun hüquq mühafizə orqanlarıdır.
Baxın, görün Azərbaycanda nələr baş verir?
Ötən il "Gündəlik Bakı” qəzeti, demək olar ki, hər gün öz səhifələrində Hacı Mazanın narkobaronluğu barədə silsilə yazılar verirdi. Daşdan səs çıxırdı, Hüquq Mühafizə orqanlarından yox, hələ də səs çıxmır. Qarşı tərəf də yazılanları nə təsdiq, nə də təkzib etmədi. Niyə?
Narkomaaniya ilə əlaqədar Azərbaycanın hüquq sistemində əndirəbadi bir ifadə var: " ... filankəs oğlu "qanunsuz yolla” filan qram heroin satarkən, əməliyyat tədbirləri nəticəsində polis orqanları tərəfindən həbs edilmişdir”. Ya buna bənzər bir şey uydurulur.
Düşünürəm ki, "kişilər” düz deyir də... Dövlət sərhədindən tonlarla narkotik maddələrin Azərbaycana gətirilməsi və ötürülməsi barədə yazan "Gündəlik Bakı” qəzetinin yazarlarına deyirəm ki, mənim əzizlərim, onlar "qanuni yolla” bu işləri gördüklərinə görədir ki, Hüquq Mühafizə işçiləri cınqırını çıxarmadı da.
*
"İftixar etdiyimiz” Azərbaycan Ordusu nə gündədir?
Xalqın ən kasıb təbəqələrinin övladlarından formalaşan bu Ordunu elə xalqın özü- əsgərlərin valideynləri yedizdirir. "Atəşkəs” deyilən şoğəribi özləri üçün xiyar kimi göyərdən rəhbərlərin gözü qarşısında sıravi əsgər zabitləri güllələyir, əsgər yoldaşlarını bıçaqlayır, zabitlər əsgərlər üçün hamının gözü qabağında "zifaf gecələri” təşkil edir, əsgər mənliyini heçə endirir... (İlahi, yəni Lut peyğəmbərin dövrünə qayıdırıq?!)
( Bu sətirləri yazdığım dəmdə ANS-də "El gizli axşamlar” verilişində yetim Xəyalənin müəllimi tərəfindən zorlanmasını, bu cinayətin cəzasız qalmasını yana-yana, göz yaşlarıyla, hıçqıra-hıçqıra danışması və studiyadakı "hüquq müdafiəçilərinin” ona laqeyd münasibətini görəndə, əsəbdən ixtiyarsız olaraq mən də göz yaşlarımı saxlaya bilmədim...)
*
Azərbaycanın təhsili ondan min dəfə danışmaqla, min dəfə yazmaqla düzələn deyil
Müəllim tanıyıram ki, ixtisasca tarixçi olsa da, SSRİ tarixindən ala-babat bilməklə Azərbaycan, dünya tarixindən xəbəri yoxdur. Yaxın günlərdə bu müəllim inək- davarını satıb, Rusiyadakı qohumlarından, Kreditbankdan pul götürüb, aparıb verib Masallı rayon təhsil şöbəsinin "başqanı”na. "Başqan” qağa da onu uzun illər bərbad hala salınmış öz kənd məktəbinə direktor təyin edib ( Bu barədə ayrıca söhbət açacağıq).
Deyirəm, adamın işi gətirməyəndə gətirmir də.
Söz gəzir ki, ağsaçlarına qapqara həna qoyan, üstünə də vazelin çəkən bu sözü gedən tarix müəllimi çox bəd vaxtda 8 min manat rüşvət verib vəzifə alıb. Nə biləydi ki, belə qısa vaxtda dünyanın siyasi palitrası bu cur tez dəyişəcək. Hətta bizim rəhbərlərimiz də ölkədə rüşvət və korrupsiyaya qarşı "mübarizəyə” start verəcək?! Elə ona görədir ki, bu direktoru bir neçə gün bundan əvvəl çox yazıq bir vəziyyətdə gördüm: 2 kq kartofu nisyə alırdı?!
*
Deyirsiniz Azərbaycan səhiyyəsi toya getməlidir?
Ay mənim əzəzlərim, nə qədər yazaram, nə qədər karikaturalarını çəkərəm? Bu dövlət müəssisəsi işçiləri – Hippokrat andlı bu həkimlər ölüyə də rəy verəndə qəyyumundan pul alır! Ölüm şəhadətnaməsini ərazi nümayəndələri pula satır. Ölkədə nə qədər belə neqativ hallar var. Deyərsiniz, hamı belə deyil, içində təmizi də var. Əzizlərim, aramızda bircə dənə də antipod varsa, yenə çoxdur!..
Uzun müddətdir ki, Yardımlı rayonundakı Notariat konturuna müdir tapılmır. Tapılmır deyəndə bir az yanlışlıq olar, çünki çox sayda gənc hüquqşünaslarımız var ki, işsizdirlər, bu vəzifəni tutmaq istəyirlər, amma bu vəzifəyə "tələb olunan vəsaiti” düzüb-qoşa bilmirlər.
Yardımlıda notarius müdiri olmuş Əlövsət müəllim vaxtilə Masallıda notarius işləyən xalası oğlu (hazırda Bakı məhkəmələrinin birində hakimdir) Qubadəli cənabları ilə "şərikli” sevdaya girib, Masallı Rayon Notarius müdiri kreslosunda oturdu. Qubadəli cənabları Masallı "Ustisu” pansionatındfakı mülkləri ilə vidalaşaraq Abıyevlərin əlindən yaxasını yaxşı qurtara bildi...
*
Bildiyimiz kimi, bələdiyyələrdə baş alıb gedən özbaşınalıq, qanunsuzluq və dələduzluq heç bir ölçüyə sığmır.
Xalqa, dövlətə, kəndliyə məxsus torpağı hamının gözü qarşısında bazar qiymətinə bir neçə nəfərə satan bələdiyyədən nə gözləmək olar? Belə getsə, Qarabağ torpaqlarını geri alacağıq, yoxsa yeni-yeni bölgələrimizi beynəlxalq maqnatlara satıb xaricdə göydələnlər, villalar tikəcəyik. Vətən torpaqlarımızın alqı-satqısından əldə edilən milyon-milyard pulları xarici banklarda yatıracağıq?!
*
Sadalayıb qurtara bilməyəcəyimiz, dövlətçiliyimizin imicinə utanc gətirən belə neqativ halları mətbuata çıxaran biz jurnalistlərə "çox sağ ol”mu deyirlər? Yox, yox, təhqir, şantaj. təhdid etməklə qalmırlar, ağzımıza "əridilmiş” qurğuşun da tökürlər. Bu günlərdə jurnalist qardaşımız Elmar Hüseynovun qətlinin ildönümü idi. Hələ də həmin qətli törədənlər cəzalarına çatmayıblar.
Bəlkə ürəklərimizdə tunc heykələ dönən akademik Ziya Bünyadovun qatilləri tapılıb mühakimə edilib? 1941-1945-ci illərdə -Böyük Vətən müharibəsi dövründə düşmən onu öldürə bilmədi, amma günün günorta çağında, evinin qapısı ağzında "özümüzkülər” tərəfindən güllələndi...
Qurama ittihamlarla göz altına alınan mərhum professor, jurnalist, alim Novruzəli Məmmədov haqsızcasına olmazın işgəncələrlə qazamatda öldürüldü...
General Rail Rzayev də küçə qapısı ağzında güllələndi. Qanlısı hələ də azadlıqda gəzir...
*
Acı həqiqət də olsa, bu olaylar bu günümüzün reallıqlarıdır.
Əziz oxucu, yazını oxuyub demə ki, burada sevgidən çox, problemlərdən bəhs etdim. Doğrusu, Azərbaycanımıza olan sevgimin izharı üçün sanki ədəbi dilimizdə söz qıtlığı hiss edirəm. Elə bu fikirlə problemlərimizi önə çəksəm də, sevgim öz yerində qalır. ABŞ yazıçısı Luis Sinklerin təbirincə desəm: Mən Azərbaycanımı sevirəm, amma o, mənim xoşuma gəlmiir.
Mətləb DADAŞİ
Azərbaycan Jurnalistlər Birliyinin üzvü.
Əlaqə telefonum: 050 579 59 24
|
