Talış dili üzrə tanınmış mütəxəssis, filoloqiya elmləri doktoru, Gilan və Ərdəbil Universitetlərinin fəxri professoru, politoloq Sabir Şindaninin 54 yaşı tamam olur. Bununla əlaqədar olaraq biz Sabir müəllimin keçdiyi həyat yoluna bir daha nəzər salmağı vacib hesab edərək, hər anı mübarizə olan bu yolun bir sıra məqamlarını oxucularımızla bölüşməyə qərar verdik. Qərar verdik ən azından ona görə ki, SABİR müəllimi bir daha yaxından tanıyaq.
Sabir Şindani (Sabir Hüsəyni zoə Hüseynov) 22 avqust 1957-ci ildə Astara (Ostoro) rayonun Kakalos kəndində anadan olub. O, orta əsrlərdə yaşayıb yaratmış məşhur talış maarifçisi Şeyx Seyid Cəmaləddinin qardaşı və Səfəviyyə təriqətinin banilərindən olan Baba Məhəmmədin nəslindəndir.
Uşaqlıq illərində Rusiya və Kazaxstanda yaşayan Sabir Şindani Lankon şəhərində orta təhsil almış, Bakıda M.F.Axundov adına Pedaqoji İnstitutu bitirmişdir.
Hələ tələbəlik illərindən aktiv ictimai-siyasi fəaliyyətə başlayan Sabir müəllim həm də idmanla məşğul olmuş, alpinizm üzrə idman ustası dərəcəsi almışdır.
80-cı illərin axırlarında keçmiş SSRi-də başlayan ümumxalq hərəkatını fəal şəkildə müdafiə edən S.Şindani Talış Mədəniyyəti Cəmiyyəti "Avesta”ya qoşulur, ilk talış yaradıcılığ teatr qrupunu yaradır və silahdaşlarıla bir yerdə Azərbaycan Xalqların Bərabərlik Partiyasının yaranmasında fəal iştirak edir. İlk əvvəl Partiyanın Lankon rayon şöbəsinə rəhbərlik edir, sonralar Partiyanın rəhbərliyində təmsil olunur.
Eyni zamanda pedaqoji fəaliyyətlə məşğul olan Sabir müəllim Bakı Dövlət Universitetinin Lankon filialında, sonralar Lankon Dövlət Universitetində (LDU), Rəşt şəhərində yerləşən Qilan Universitetində mühazirələr oxuyur. Siyasi baxışlarına görə LDU-dən qovulur və buna görə Avropa hüquqmüdafiə təşkilatları tərəfindən siyasi represiya qurbanı kimi tanınır.
Sabir Şindani talış dilinin və floklorunun öyrənilməsi üzrə mütəxəsis və könüllülərdən ibarət tədqiqat kollektivi yaratmış və ona başçılıq edir. Bu kollektivin ortaya qoyduğu çoxlu sayda qədim talış nağılları və əfsanələri ilə oxucularımız "Tolışi Sədo” və "Талышский вестник” qəzetlərindən tanışdırlar.
2003-2005-ci illərdə Sabir müəllim Moskvada çap olunan "Талышский вестник” qəzenin baş redaktorluğuna dəvət alır. O, bu illərdə Talış Milli-Mədəni Muxtariyyatının işində fəal iştirak edir, təşkilatın vitse-prezidenti seçilir, eyni zamanda Moskva "МедиаСоюз" jurnalist birliyin üzvü seçilərək Moskva Millətlərarası Məsləhət Şurasının və Moskva Millətlər evinin fəaliyyətində fəal iştirak edir.
S.Şindani Azərbaycanda və İranda talış dilinin dialektləri haqqında doktorluq disertasiyası müdafiə etmiş, Ərdəbil və Gilan Univesitetlərinin fəxri professoru seçilmişdir.
Ömrünün kamillik çağına qədəm qoyan Sabir müəllim bu gün həm bir politoloq, həm də bir filoloq olaraq talış xalqının tarixi ənənələrinin yaşaması üçün yorulmadan fəaliyyətini davam etdirir. Ona bu yolda uzun ömür, can sağlığı və gələcək yaradıcılıq ugurları arzu edirik.
