 Təxminən bir ay öncə Prezident Administrasiyasının bir rəsmisi bəyan etdi ki, ölkədə demokratiyaya tam keçidi təxminən 15-20 ildən(!) sonra düşünürük. Həmin rəsminin adını unutmuşam, amma onu deyə bilərəm ki, bu açıqlamadan bir neçə gün əvvəl Söyün Sadıqova qarşı sərt münasibəti ilə gündəmə gəlmişdi. Çox maraqlı açıqlama idi, arqument-filan yox idi, elə səbəbsiz-filansız deyirdi ki, məhz 20 ildən sonra ölkə dəyişəcək...
20 ildən sonra, yəni 2032-ci ildə, 95 yaşını qeyd edəcək Prezident Adminstrasiyasının rəhbəri Ramiz Mehdiyev isə, işçisindən fərqli olaraq, hansısa dəyişikliklərin 2020-ci olduğunu dəfələrlə bəyan etməsini xatırlatmağa belə ehtiyac yoxdur, ağsaqqal akademik hətta bu haqda kitab belə yazıb...
"95 yaşlı Ramiz Mehdiyev”.., heç kəs təəccüblənməsin, təbabət elmi artıq mümkün olmayanları gerçəyə çevirməyə qadirdir, yetər ki, pulun olsun. Dünyanın ən gəlişmiş klinikalarında insanları artıq maşın kimi hissə-hissə yığırlar, təkrar edirəm, yetər ki, pulun olsun...
Pulun isə necə gəldiyini Elşad Abdullayevin son videolarında əyani olaraq gördük... Təkcə bir deputat mandatı üçün ödənişdən, vasitəçilər Gülər Əhmədova və Sevinc Babayevanın "komisiyonnu”su tutulandan sonra, "yerdə qalan” məbləğ təxminən 950 min dollar etdi. Müqayisə üçün deyək ki, bu pulu ABŞ kimi nəhəng dövlətin prezidenti Barak Obama iki ilə güclə qazanır...
Yəni Amerika kimi dövlət, onu idarə edəcək şəxsə iki ildə ancaq bu qədər pul verə bilir, Azərbaycanda isə bu pula bir deputat kürsüsü satılır... Özü də necə?
Maaşı 150 manat olan adi bir kitabxanaçı, bahalı şəxsi maşınıyla (!) ikinci 500 min dolların dalınca gəlir, onu hüquq elmləri doktoru, eyni zamanda universitet rektorundan alır. Söhbət əsnasında isə, birinci 500 min olan çemodanın, ölkədəki korrupsiyaya qarşı mübarizəyə başçılıq edən (!) Ramiz Mehdiyevin kabinetində kustar üsulla necə açıldığını danışır...
Bəli, vəziyyət o qədər aydındır ki, hətta akademik baş verənlərə münasibət bildirməklə özünü daha gülünc vəziyyətə salmaq istəmir. Fikir verirsinizsə, rejimin başqa, daha doğrusu Ramiz Mehdiyevə rəqib sayılan rəsmiləri də susur. Başqa çarələri də yoxdur, çünki kiçik bir ehtiyatsızlıq Ramiz müəllimin "ağzının açılmasına”, yəni onların da ifşasına səbəb ola bilər...
Bu gün ölkə ictimaiyyətini bir sual maraqlandırır, görəsən Ilham Əliyev özündə cəsarət tapıb "Azərbaycan 2020" projesinin (!) müəllifi Ramiz Mehdiyevi ”təqaüdə yollaya" biləcəkmi?
Cavab birmənalıdır: - Xeyr, o bunu edə bilmək iqtidarında deyil, çünki vəzifəsindən gedəcəyi tədqirdə Ramiz Mehdiyevin itirəcəyi heç bir şey qalmayacaq, Gülər Əhmədovadan fərqli olaraq o, danışacaq.
Məsələn, ağsaqqal deyəcək ki, o pulları mən özüm üçün almırdım, mən sadəcə öz halal "komisiyonnu”mu götürürdüm.
Bu baş verərsə, sizi inandırıram ki, rejim ideoloqları "prezident yaxşıdır, ətrafı pisdir” mövzusunda danışmaq üçün televiziyaya çıxarmağa Zahid Oruc və Mübariz Qurbanlıdan başqa adam tapa bilməyəcəklər.
Mübarəki xatırlayın, müxalifətdən az sonra doğma partiyası da ondan imtina etdi...
Son olaylar özlərini müxalifətçi adlandıran işbazların, illərdir azad mətbuatın bir nömrəli qəzeti adına iddiaçıların da ifşasına çevrildi, onların illərdir mübarizəmizə arxadan zərbə endirdikləri bəlli oldu. Təsəvvür edin, bu liderlər və qəzet(lər) videoda adları epizodik keçən hər kəsə bir daş atırlar, amma "nədənsə” əsas qəhrəman Ramiz Mehdiyevi "görmək” istəmirlər.
Akademikin ağzının açılmasını istəməyənlərin arasında bizim dost bildiklərimizin də olması artıq faktdır. Başqalarını bilmirəm, mən özümü "Uzaq sahillərdə” filmində Karrantini tanıya-tanıya onunla kəşfiyyata gedən partizan kimi hiss edirəm və tək təsəllim onu tanımağımdır. Buna görə Ramiz müəllimə təşəkkür edirəm desəm, yəqin ki, oxucular məni başa düşər.
Ramiz Mehdiyev isə, bir gün mütləq danışmağa məcbur olacaq, bu boyda sirri o özü ilə apara bilməz...
...Sonda bir çoxlarını düşündürən bir sualı hüquq-mühafizə orqanlarına ünvanlamaq istəyirəm: - Sevinc Babayeva hardadır?
Xaqani ƏLİYEV
Azadlıq Qəzeti
|
