Qarabağ Azadlıq Təşkilatı (QAT) DİN rəhbəri Ramil Usubovun Yerevana səfərini kəskin nifrətlə pisləyib, onu milli maraqlara, erməni təcavüzünün qurbanlarının ruhlarına xəyanətdə ittiham edib.
QAT-ın bəyanatında deyilir ki, heç bir bəhanə bu səfərə bəraət qazandıra bilməz. Ramil Usubovun bütün şəhidlərimizin, o cümlədən Xocalı şəhidlərinin, Xocalıda ermənilərin xüsusi qəddarlıqla qətlə yetirdikləri öz qohumlarının, Daxili İşlər Nazirliyinin şəhid olmuş əməkdaşlarının qanı üstündən heç nə olmamış kimi keçərək qatil ermənilərin hüzuruna getməsinə heç nə ilə haqq qazandırmaq olmaz.
"Özünə hörmət edən, azacıq insani keyfiyyətləri olan istənilən adam bu cür addım atmazdı. Daxili işlər naziri postunu tutan, özü də Xocalıdan olan bir şəxs bu addımı atmamalı idi, hətta istefa vermək bahasına olsa da, bu addıma getməməli idi. Görünür, vəzifə hərisliyi bu adamlar üçün hər şeydən üstündür. Vəzifələrini saxlamağın xatirinə hər cür ləyaqətsizliyə getməyə hazırdırlar. Ramil Usubov nə vaxtsa vəzifədən də, həyatdan da gedəcək, amma bu ləkə onun və nəslinin üstündə əbədi qalacaq”, - bəyanatda vurğulanır.
"Biz Ramil Usubovun adını Qarabağın qara kitabına salır və onu şəhidlərimizin ruhları qarşısında lənətləyirik” , -sənəddə deyilir.
R.Usubov MDB ölkələri daxili işlər nazirləri Şurasının iclasında iştirak etmək üçün Yerevandadır.
DİN bu qurumdan Yerevana heç kimin getməyəcəyini bildirmişdi. Odur ki, çox güman ki, Yerevana getmək qərarı Azərbaycan rəhbərliyi tərəfindən qəbul olunub. Usubov bu əmrə məhəl qoymaya bilməzdi.
Bundan əvvəl Azərbaycanın təhsil, səhiyyə və kənd təsərrüfatı nazirləri, həmçinin digər rəsmi şəxslər Ermənistana səfər ediblər. Bu səfərlər beynəlxalq təşkilatlar və regional hadisələr çərçivəsində baş verib. Bu, həmçinin dəfələrlə Bakıya səfər edən erməni rəsmi şəxslərinə də aiddir.
