TALISH.ORG ann.az saytına itinadən xebər verir ki, noyabrın 19-da naməlum adamlar tərəfindən bıçaqlanan tanınmış yazıçı Rafiq Tağı bu gün saat 15:30 radələrində xəstəxanada vəfat edib.
Noyabrın 20-nə keçən gecə əməliyyat edilən Rafiq Tağı çoxlu qan itirsə də həkimlər onun həyati təhlükəni adladığını bildirmişdilər. Ayın 21-də reanimasiyadan adi palataya köçürülən yazıçın halı qəfildən pisləşib.
Klinik Tibbi Mərkəzin baş həkimi Tərlan Bəbirov faktı təsdiqləyib. Həkimin sözlərinə görə, R. Tağının vəziyyəti normal olub. Lakin qəfildən vəziyyəti pisləşib. Hazırda meyit müayinə olunur. Allah rəhmət eləsin.
Qeyd edək ki, baş verən bıçaqlanma faktı ilə bağlı Xətai Rayon Prokurorluğu tərəfindən Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə cinayət işi başlanmışdı. Hadisə Nəsimi rayonu ərazisində baş verdiyindən cinayət işi istintaqın davam etdirilməsi üçün aidiyyəti üzrə Nəsimi Rayon Prokurorluğuna göndərilib.
Daxili İşlər Nazirliyi və Baş Prokurorluq işin istintaqını xüsusi nəzarətə götürmüşdü.
RAFİQ TAĞININ BİOQRAFİYASI
Tağıyev Rafiq Nəzir oğlu 5 avqust 1950-ci ildə Azərbaycanın Masallı rayonunun Xoççobanlı kəndində anadan olub. 1966-cı ildə Masallı rayonu Təklə kənd orta məktəbini, 1972-ci ildə N.Nərimanov adına Azərbaycan Dövlət Tibb İnstitutunun müalicə-profilaktika fakültəsini bitirib.
1981-1983-cü illərdə İ.M.Seçenov adına I Moskva Tibb İnstitutunun "daxili xəstəliklər” üzrə klinik ordinaturasında oxuyub. Terapevt-kardioloq, kardioloq-reanimatoloq idi.
1972-1974-cü illərdə Sabirabad rayonu Yolçubəyli kənd ambulatoriyasının baş həkimi, 1974-1979-cu illərdə Masallı rayonu Həsənli kənd xəstəxanasının baş həkimi vəzifələrində çalışıb.
1979-cu ildə Kalinin vilayəti Konakovo şəhər poliklinikasında sahə terapevti, 1979-1983-cü illərdə Moskva şəhəri "Medsantrud” adına 23 saylı şəhər klinik xəstəxanasında, 1983-1990-cı illərdə Moskva şəhəri Təcili və Təxirəsalınmaz Tibbi Yardım Stansiyasında həkim işləmişdir. 1990-cı ildən indiyə kimi Bakı şəhəri Təcili və Təxirəsalınmaz Tibbi Yardım Stansiyasında həkim işləməkdədir. Bu illərdə paralel olaraq Bakı şəhəri Mərdəkan qəsəbəsində yerləşən "KM” Müayinə-Müalicə Mərkəzində çalışıb.
Rafiq Tağı ilk gənclik illərindən bədii yaradıcılıqla məşğul idi. 1968-ci ildə ilk şeiri Masallının "Çağırış” rayon qəzetində, "Fərqanə” adlı ilk hekayəsi 1977-ci ildə "Ulduz” jurnalında çap olunub. Çoxsaylı şeir, hekayə, esse, məqalə, oçerk və portret yazıları respublika və xarici ölkələrin dövri ədəbi mətbuatında mütəmadi dərc edilib. Yazıları həmişə ictimai rezonans doğurub, ciddi polemikaya səbəb olub.
2004-cü ildə "Qafqazın qartalı Şaumyan belə…”(Səməd Vurğun) adlı essesinə görə, 1988-ci ildən üzvü olduğu, Azərbaycan Yazıçılar Birliyindən xaric edilib, 2006-cı ilin 15 noyabrında "Sənət qəzeti”ndə dərc etdirdiyi "Avropa və biz” essesinə görə həbs olunub, 3 il cəza alıb. Lakin 29 dekabr 2007-ci il tarixdə dövlət başçısının əfv fərmanı ilə azadlığa buraxılıb.
"EQO” Yaradıcılıq Ordeninin üzvü olub. Son vaxtlar Azad Yazarlar Ocağının sədri, daha sonra üzvü olub.
Çap olunmuş nəsr kitabları: "Yanaşı ulduzlar”(1987), "Düşmənimin xatirinə”(1991), "Pozitiv.Neqativ”(1996), "Şahzadə Dipendranın məhəbbəti”(2005), "Ucaboy liliput”(2005), "Gənc qraf Kenterberiyski”(2006). Yaxın vaxtlarda "Ekstremal şeirlər” kitabını və esselərdən ibarət ikicildliyini çap etdirmək arzusunda idi.
