Главная » 2012»Сентябрь»9 » Rafiq Cəlilov İctimai Palatanın koordinasiya şurasına seçilib
12:48
Rafiq Cəlilov İctimai Palatanın koordinasiya şurasına seçilib
Şənbə günü Müsavat Partiyasının qərargah-mənzilində İctimai Palatanın növbəti sessiyası keçirilib.
Sessiyada AXCP lideri Əli Kərimli son bir ayda koordinasiya şurasına sədrliyi dövründə görülmüş işlər barədə hesabat məruzəsi ilə çıxış edib.
Hakim elitanın 48 mlrd. dolları ölkədən çıxarması məsələsi şuranın diqqət mərkəzində olub, beynəlxalq təşkilatların araşdırmalarında da bu barədə bəhs edilib.
Bundan başqa, İctimai Palata ordu quruculuğu problemi, təhsil sahəsinə, cəzaçəkmə yerlərində vəziyyət, media azadlığının pozulması, Naxçıvanda avtoritarizm haqqında müzakirələr aparıb.
Daxili siyasi problemlərə toxunan Kərimli bildirib ki, Əbülfəz Elçibəyin guya zəhərlənməsi haqqında cinayət işi açılması hakimiyyətin 2013-cü il prezident seçkiləri ilə bağlı planıdır.
"Bu işin hüquqi nəticələrinin necə olacağını söyləmək çətindir. Amma siyasi nöqteyi-nəzərdən bu plan müvəffəqiyyətsizliyə uğrayıb”, deyə Kərimli bildirib.
Sessiyada həm də təşkilati məsələlərə baxılıb. Hilal Məmmədovun hüquqlarını müdafiə Komitəsinin sədri, "Tolişon Sədo" qəzetinin baş redaktoru Rafiq Cəlilov İctimai Palatanın koordinasiya şurasına seçilib.
Sessiyada İctimai Palatanın 2013-cü il seçkiləri ilə bağlı memorandumu təqdir edilib. Memorandumda bütün demokratik qüvvələrə azad və ədalətli seçkilər keçirilməsi məqsədilə birləşmək çağırışı yer alır.
Sənəd müəllifləri hesab edir ki, ölkədə dəyişikliklərə gedən yol rejimin dinc seçki yolu ilə dəyişməsindən keçir. Həmçinin, siyasi məhbusların azad edilməsi tələbi ilə bəyanat qəbul edilib.
